‏ 2 Kings 2

Элияагай тэнгэридэ дэгдэлгэ

1Эзэн Элияае хуй һалхяар тэнгэри өөдэ иигэжэ дэгдүүлбэ. Элияа Элишаатай хамта Гилгаалһаа ябагаар гараба.

2Элияа Элишаада иигэжэ хэлэбэ:

– Ши эндэ үлэ. Эзэн намайе Бэт-Ээл эльгээнэ.

– Эзэнэй ба шинии амиды байгаа сагта би шамайе орхихогүйб гэжэ тангаригланаб, – гэбэ Элишаа.

Тэдэ хоёр Бэт-Ээл тээшэ ошобо.

3Бэт-Ээлдэ байһан лүндэншэдэй зүблэлэй гэшүүдэй түлөөлэгшэд тэдэниие угтаад:

– Мүнөөдэр Эзэн минии эзэниие абаашахань гэжэ мэдэнэ гүш? – гэжэ Элишаада хэлэбэд.

– Мэдэнэб, һанаагаа бү зобогты, – гэжэ Элишаа харюусаба.

4Элияа Элишаада хандажа:

– Элишаа эндээ үлэ. Эзэн намайе Ерихоон эльгээнэ, – гэбэ.

– Эзэнэй ба шинии амиды байгаа сагта би шамайе орхихогүйб гэжэ тангаригланаб, – гэбэ Элишаа.

Тэдэ хоёр хамта Ерихоон ерэбэд.

5Ерихоондо байһан лүндэншэдэй зүблэлэй гэшүүдэй түлөөлэгшэд тэдэниие угтаад:

– Мүнөөдэр Эзэн шинии эзэниие абаашахань гэжэ мэдэнэ гүш? – гэжэ Элишааһаа һураба.

– Мэдэнэб, һанаагаа бү зобогты, – гэбэ Элишаа.

6Элияа Элишаада хандажа:

– Ши эндээ үлэ, Эзэн намайе Иордан эльгээнэ, – гэбэ.

– Эзэнэй ба шинии амиды байгаа сагта би шамайе орхихогүйб гэжэ тангаригланаб, – гэбэ Элишаа.

Тэдэ хоёр хамта Иордан ошобо.

7Лүндэншэдэй зүблэлэй гэшүүдэй түлөөлэгшэд тэдэ хоёрые дахан ошолсожо, хараанай газарта үлэбэд. 8Элияа субаяа абажа эбхээд, тэрээгээрээ уһа сохибо. Уһанай хоёр тээшээ боложо харгы гаргахада, тэдэ хоёр хуурай газар дээгүүр мүрэн гаталба.

9Мүрэн гаталамсаараа, Элияа Элишаада хандажа:

– Минии шамтай байһан сагта, шамда минии юу хэбэл дээрэб? – гэжэ һураба.

– Танай эди шэдитэ бэлиг шадабари намда нэмэжэ, минии бэлигые хоёр дахин ехэ болгог, – гэжэ Элишаа хэлэбэ.

10– Хүшэр хүндэ юумэ гуйнаш. Хэрбэеэ тэнгэри өөдэ минии дэгдэхые харабалшни, гуйһан хэрэгшни бүтэхэ. Хэрбэеэ харабагүйлшни, бүтэхэгүй.

11Тэдэ хоёр хөөрэлдэһөөр, аян замаа үргэлжэлүүлжэ, харгыгаар саашалбад. Гэнтэ дайшалхы гал тэргэ, гал морид бии болоод, хуй һалхин эшхэржэ, Элияае Элишааһаа холодхон, тэнгэри өөдэ абаад ябашаба.

Элишээ Элияагай һүлдые залгамжалба

12Элишаа эдэ бүгэдые харамсаараа:

– Эсэгэмни, эсэгэмни! Израилиин дайшалхы тэргэ ба тэрэнэй морид! – гэжэ тэрэнэй хойноһоо хашхарба.

Элияа тэрэнэй нюдэндэ харагдахаяа болибо. Тиихэдэнь Элишаа өөрынгөө уйдхар гашуудал харуулжа, хабсаһаяа шудара татаад, 13газарта унаһан Элияагай субые абаад, Иорданай эрьедэ ерэбэ.

14Элишаа тэрэнэй субаар уһа сохёод:

– Элияагай Бурхан, Эзэн хаана гээшэб? – гэжэ асуугаад, тэрээгээрээ үшөө дахин уһа сохин шабхадаба.

Уһан хоёр тээшээ хубааран эбхэржэ, тэрээндэ харгы гаргаба. Элишаа хуурай газараар мүрэн гаталба. 15Ерихоон мүрэнэй эрьеһээ тээ саанахана зогсожо байһан лүндэншэдэй зүблэлэй гэшүүдэй түлөөлэгшэд энэ үйлэ хэрэг хараад:

– Элияагай һүлдэ Элишаада ороо! – гэжэ хашхаралдаад, тэрэнэй урда ерэжэ, доро дохиһоной һүүлдэ 16иигэжэ хэлэбэд:

– Танай барлагууд болохо маанадай дунда табин хүсэтэй шэрбүүһэтэй эрэшүүл байна. Эдэнэр минии эзэниие бэдэрхэеэ ошог. Магад, Эзэнэй Һүлдэ тэрэниие абаашажа, хадануудай гү, али хүндынүүдэй нэгэндэ хаяа аалам.

– Хэнииешье бү эльгээгты, – гэжэ Элишаа хэлэбэ.

17Теэд тэдэнэй үни удаан гуйхада:

– Зай, эльгээгты, – гэжэ тэрэ зүбшөөбэ.

Табин хүнүүд бүлэг бүлэгүүд болгогдожо, гурбан үдэр бэдэрээд олобогүй.

18Тэдэ бүлэгүүд Ерихоондо байһан Элишаада бусабад.

– Бэдэрхэеэ бү ошогты гэжэ би хэлээ һэмнайб, – гэжэ Элишаа хэлэбэ.

Элишаагай гайхамшагта үзэгдэлнүүд

19Тэрэ хотынхид Элишаада хандажа:

– Эзэн манай, харагты! Манай хото һайн газарта байна. Теэд эндэ муу уһатай, үрэжэлгүй хүрьһэтэй, – гэжэ хэлэбэд.

20Элишаа тэдээндэ хандажа:

– Намда шэнэ амһарта үгэгты. Тэрээн соогоо дабһа хэгты, – гэжэ хэлэбэ.

Тэрэ хотынхид эриһэн бүхы юумыень асаржа тэрээндэ үгэбэд.

21Элишаа булагай эхиндэ ошожо, урасхал руунь дабһаяа сасаад:

– Эзэн иигэжэ хэлэнэ: «Би энэ уһа арюудхабаб. Энэ уһанһаа дахин хэзээдэш үхэл тахал ба үрэжэлгүйдэлгэн болохогүй!» – гэжэ хэлэбэ.

22Элишаагай хэлэһэн үгэ бэелүүлэгдэжэ, мүнөө болотор тэндэхи уһан арюун сэбэр байгша юм.

23Элишаа тэндэһээ Бэт-Ээл ошобо. Хотоһоо гүйжэ гараһан үхибүүд харгыгаар ябаһан тэрэниие хараад:

– Халзан толгойтой, яба саашаа! Халзан толгойтой, яба саашаа! – гэжэ тэрэниие наада барин, хойноһоонь хашхаралдабад.

24Тэрэ гэдэргээ эрьелдэжэ, тэдэниие хараад, Эзэнэй нэрээр тэдэниие хараалда хүртөөбэ. Хоёр эмэ баабгай ойһоо гарамсаараа, үхибүүдтэ добтолжо, дүшэн хоёр үхибүүдые таһар удар татаба.

25Элишаа тэндэһээ Кармээл уулада ошоод, һүүлдэнь Самарида бусаба.