2Ki 24 | BxrBBL2024 | STEP | Тиихэдэ Вавилооной хаан Навуходоносор Иудын орон нютагта дайгаар добтолжо, Ёякиимые өөрынгөө мэдэл доро абаба. Ёякиим тэрээндэ гурбан жэлдэ алба хээд, эсэргүүсэн бодобо.

‏ 2 Kings 24

(2 Уг 36:5-8)

1 Тиихэдэ Вавилооной хаан Навуходоносор Иудын орон нютагта дайгаар добтолжо, Ёякиимые өөрынгөө мэдэл доро абаба. Ёякиим тэрээндэ гурбан жэлдэ алба хээд, эсэргүүсэн бодобо. 2 Тиихэдэнь Эзэн тэрэниие үгы хэхын тула вавилоонойхидой, араамшуудай, моһаабуудай болон аммоонуудай үй түмэн сэрэгүүдые иудынхидтэ эльгээбэ. Тиигэжэ Өөрынь барлаг болохо лүндэншэдээр айладаһан Эзэнэй үгэ бэелүүлэгдэбэ. 3 Мэнашшээгэй хэһэн бүхы нүгэлтэ үйлэ хэрэгүүдэй түлөө Эзэн иудынхидые Өөрһөө холо болгохо гэжэ шиидээ. 4 Ушар юуб гэхэдэ, Мэнашшээ ямаршье гэм зэмэгүй хүнүүдые алажа, тэдэнэй шуһаар Иерусалимые дүүргэһэн байгаа. Эзэн тэрэниие хүлисөөгүй.

5 Ёякиимэй бусад хэрэг ябуулганууд тухай «Иудын хаашуулай түүхын ном» соо бэшээтэй юм. 6 Ёякиим наһа баража, үбгэ эсэгэнэртээ ошобо. Тэрэнэй һүүлдэ Ехонияа хүбүүниинь орондонь хаан шэрээ эзэлбэ.

7 Египедэй хаан өөрынгөө орон нютагһаа бэшэ гарабагүй. Вавилооной хаан Египедэй хаанай мэдэлдэ урдань байһан Египедэй һудалһаа Евфрат хүрэтэрхи бүхы газарнуудыень булимтаран абаба.

Иудын хаан Ехонияа баряанда абтана

8 Ехонияа арбан найма наһатайдаа хаан боложо, гурбан һара ба арбан үдэр хааншалаа. Тэрэнэй эхэ Иерусалимын Элнатаанай басаган Нэхуштаа гэжэ нэрэтэй байгаа. 9 Тэрэ эсэгэдээл адли Эзэнэй урда жэгшүүритэй муухай хэрэгүүдые үйлэдэдэг байгаа.

10 Тэрэ сагта Вавилооной хаан Навуходоносорой сэрэгүүдэйнь дарганар Иерусалим тээшэ дабшажа, тэрэ хотые сэрэгүүдээрээ тойрон хүреэлбэ. 11 Вавилооной хаан Навуходоносорой ерэхэдэ, тэрэ хото сэрэгүүдээр тойруулан хүреэлүүлэнхэй байба. 12 Иудын хаан Ехонияа Вавилооной хаанда өөрыгөө эхэтэеэ, түшэмэлнүүдтэеэ, сэрэгүүдэйнгээ дарганартай, дүтынгөө хүнүүдтэй хамта бэеэ тушааба. Энэ ушар Вавилооной хаанай наймадахи жэлээ хан түрэеэ засаглажа байхада болобо.

Навуходоносор Иерусалим абаба

13 Навуходоносор Эзэнэй һүмын һангай дараанда байһан бүхы баялигуудые, мүн хаанай ордоной дарасада байһан бүхы баялигуудые, Эзэнэй һүмэдэ Соломооной бүтээлгэһэн алтан хэрэгсэлнүүдые орон нютагаа абаашажа, бултыень хайлуулба. Эзэнэй айладаһан үгэ бэелүүлэгдэбэ. 14 Навуходосонор тэрэнэй бүхы түшэмэлнүүдые, бүхы баяшуулые, бүхы хүнүүдые – хамтадаа арбан мянган хүнүүдые, мүн түмэршэ ба гар үзүүрэй дархашуулые Иерусалимһаа сүлэн ябуулба. Тиихэдэнь гансал үгытэйшүүл тэндэ үлэбэ.

15 Тэрэ Ехонияае Вавилоон абаашаба. Тэрээнтэй хамта хан эхые, хаанай хатадые, дүтынь хүнүүдые, орон нютагтаа нэрэтэй солотой болоһон ноёд һайдые туужа абаашаба. 16 Тэрэ зургаа мянган ноёд һайдые, мянган түмэршэ ба гар үзүүрэй дархашуулые, бүхы тэшэмэлнүүдые, бүхы сэрэгшэдые Иерусалимһаа Вавилоон туужа абаашаба. 17 Вавилооной хаан Ёякиимэй орондо Маттаанияа абгыень хаан болгожо, тэрээндэ Цэдэкиия гэжэ шэнэ нэрэ үгэбэ.

Иудын хаан – Цэдэкиия

18 Хорин нэгэ наһатайдаа Цэдэкиия хаан боложо, арбан нэгэн жэлэй туршада тэрэ Иерусалимда хааншалаа. Тэрэнэй эхэ Либнаа хотын Ерэмияагай басаган Хамутаал гэжэ нэрэтэй байгаа. 19 Ёякиим хаандал адли Цэдэкиия хаан Эзэнэй урда жэгшүүритэй муухай хэрэгүүдые үйлэдэдэг байгаа. 20 Иерусалимай болон Иудын зоной Эзэнэй уур сухалые аргагүй ехээр хүдэлгэхэдэ, Тэрэ тэдэниие буруушаажа, тэдэнһээ буруу хараба.

Цэдэкиия Вавилооной хаанай урдаһаа эсэргүүсэн бодобо.