‏ 2 Kings 3

Израилиин хаан – Ёраам

1Иудын хаан Ёшапаадай арбан наймадахи жэлээ хан түрэеэ засаглажа байхада, Ахаабай хүбүүн Ёраам Самарида Израилиин хаан боложо, арбан хоёр жэлдэ хан шэрээдэ һууба. 2Тэрэ эхэ эсэгэ хоёр шэнги хэтэрхы ехээр бэшэшье һаа, Эзэнэй урда баһал бага зэргээр муу үйлэ хэрэгүүдые үйлэдэдэг байба. Тэрэ эсэгынгээ бүтээлгэһэн Баалай нангин шулууе үгы хэбэ. 3Ахаабай хүбүүн Ёраам бүхы Израильда нүгэл хэһэн Набаадай хүбүүн Еробоһаамай үйлэдэһэн хэрэг үргэлжэлүүлбэ.

Ёраам ба Ёшапаат Моһаабай хаантай дайлалдана

4Моһаабай хаан Мэшаа хони малаар баян байһан тула Израилиин хаанда саг соогоо зуун мянган хони, зуун мянган эрэ хониной нооһо түлэдэг байба. 5Ахаабай наһа барахада, Моһаабай хаан Израилиин хаанда эсэргүүсэн бодобо. 6Ёраам хаан Самариһаа гаража, Израилиин сэрэгүүдые суглуулаад:

7– Моһаабай хаан минии урдаһаа эсэргүүсэн бодобо. Ши намтай хамта моһаабуудтай тулалдахаяа ошохо гүш? – гэжэ хэлэхэ захяатайгаар элшэдээ Иудын хаанда эльгээбэ.

– Би шамтай ошолдохоб. Ши, шинии сэрэг, шинии морид хайшаа зориноб, би, минии сэрэг, минии морид тиишээ зорихо, – гэжэ Ёшапаат харюусаба.

8Ёшапаат Ёраамһаа иигэжэ һураба:

– Бидэ ямар харгыгаар ошохобибди?

– Бидэ Эдоомой сүл губиие гаталха ёһотойбди, – гэжэ Ёраам харюусаба.

9Израилиин хаан Иудын болон Эдоомой хаашуултай хамта гараба. Тэдэнэр долоон үдэр тойруу замаар ябабад. Сэрэгшэдтэнь ба тэдэнэй хойноһоо туужа ябаһан үхэр малдань хүрэхэ уһан багадаба.

10Израилиин хаан иигэжэ хэлэбэ:

– Ай халаг! Моһаабуудай гарта бидэниие үгэхэ гэжэ Эзэн бидэ гурбан хаашуулые энэ сүл губида асарба.

11Ёшапаат түшэмэлнүүдтээ хандажа:

– Эзэнэй лүндэншэ эндэ үгы гээшэ гү? Яаха хээхэ тухай тэрээгээр Эзэнһээ асууха байгаабди, – гэжэ хэлэбэ.

– Шапаадай хүбүүн Элишаа эндэ байна. Элишаа Элияагай туһалагша байгаа юм, – гэжэ Израилиин хаанай түшэмэлнүүдэй нэгэн хэлэбэ.

12Ёшапаат иигэжэ хэлэбэ:

– Тэрэ жэнхэни лүндэншэ мүн. Эзэн тэрэнээр дамжуулан үгэеэ айладхаха.

Израилиин хаан Ёшапаат болон Эдоомой хаантай Элишаада ерэбэ.

13Элишаа Израилиин хаанда хандажа:

– Шамда намһаа юун хэрэгтэйб? Өөрынгөө эхэ эсэгын лүндэншэдтэ ошо! – гэжэ хэлэбэ.

– Тиигэжэ бү хэлыш даа. Моһаабуудай гарта үгэхэ гэжэ Эзэн бидэниие, гурбан хаашуулые эндэ асараа, – гэжэ Израилиин хаан Элишаада хэлэбэ.

14Элишаа тэрээндэ иигэжэ хэлэбэ:

– Би шүтэн мүргэжэ алба хэдэг, Түмэн Сэрэгтэ Эзэнэй зүгһөө тангаригланаб. Хэрбэеэ би Иудын хаан Ёшапаадые хүндэлөөгүй һаа, би шамайе харахашьегүй байгааб. 15Мүнөө таанад намда хүгжэмшэниие дуудагты.

Хүгжэмшын хүгжэм наадахада, Элишаа Эзэнэй һүлдэ хүсэнһөө онгоо оруулжа эхилбэ.

16Элишаа тэдэнэртэ хандажа:

– Эзэн иигэжэ хэлэнэ: «Бүхы хүнды уһаар дүүрэхэ, уһаар дүүрэхэ!» Эзэн иигэжэ хэлэнэ: 17«Таанад аадар бороогой орохые харахагүйт, һалхинай үлеэхые үзэхэгүйт, тиигэбэшье хүнды уһаар дүүрэхэ! Таанад, таанадай сэрэгшэд болон үхэр мал тэрэ уһанһаа ууха!» 18Теэд Эзэндэ энэ бага даа! Тэрэ моһаабуудые таанадай гарта үгэхэ! 19Таанад тэдэнэй бүхы бэхижүүлгэнүүдые, бүхы хотонуудые һандаргахат, бүхы жэмэстэ модонуудыень таһар сабшахат, тарилгын бүхы газарыень үрэжэлгүй болгожо, дээрэнь шулуунуудые хаяхат! – гэжэ хэлэбэ.

20Үглөөгүүр үргэл үргэдэг саг ерэбэ. Эдоомһоо урдаһан уһан оршон тойрониие бүрхөөбэ. 21Моһаабууд тэдэ хаашуулай дайгаар добтолхоёо байһые мэдээд, зэр зэбсэг барижа шадаха бүхы эрэшүүлээ суглуулаад, сэрэгүүдээ хилэ дээрэ табиба. 22Эртэ үглөөгүүр наранай туяагай урдаһан тэрэ уһан дээрэ толорходо, моһаабууд тэрэниие холоһоо харахадаа, улаан шуһан гэжэ харабад. 23«Энэ шуһан! – гэжэ тэдэнэр һанаад, хаашуул өөһэд хоорондоо тэмсэжэ, бэе бэеэ алабад. – Моһаабууд олзодоо хиидэн добтологты!»

24Тиигээд тэдэнэр израильшуудай тогтон байрлаһан хүреэн тээшэ харайлдаба. Израильшууд эсэргүүсэн тэмсэжэ, тэдэнэй добтолгые болюулба. Моһаабууд тэдээнһээ тэрьедэжэ эхилбэд. Израильшууд тэдэниие хюдан, хойноһоонь намнажа, 25тэдэнэй хотонуудые газар дээрэһээ үгы хээд, сэрэгшэ бүхэн таряаланайнь бүхы һайн газарнууд дээгүүр шулуунуудые хаяба, булагуудайнь эхинүүдые шулуугаар бүтүүлбэ, бүхы жэмэстэ модонуудыень таһар сабшажа унагааба. Тиихэдэнь гансал Киир-Харээсэдтэ шулуунууд байһан газартаа үлэбэд, һэнжүүрээр шулуу шэдэгшэд хотые хүреэлжэ, шулуунуудаар харбан шэдэбэ.

26Моһаабай хаан диилдэжэ байһанаа хараад, элдэтэй долоон зуун сэрэгшэдээ абажа, сүмэ сохин гарахаяа Эдоомой хаан тээшэ дабшаба. Теэд тэдэнэр тэрьедэхэ харгы өөһэдтөө гаргажа шадабагүй. 27Тэрэ хаан хан шэрээень эзэлхэ өөрынгөө хүбүүе хэрэмэй дээрэхи үргэлэй шэрээ дээрэ түгэс шатаалта үргэл болгон үргэбэ. Израильшууд тэдэнэй Хэмоош бурхандаа үхибүүгээ үргэлгэндэ дураа гутажа, добтолгоёо болюулжа, өөһэдынгөө нютаг руу бусабад.