‏ 2 Kings 7

1Элишаа арад зондо хандажа:

– Эзэнэй үгэ шагнагты! Эзэн иигэжэ хэлэнэ: Үглөөдэр Самариин хаалта үүдэнэй дэргэдэ нэгэ сатаа шэниисын гурил нэгэ шээкэлээр, хоёр сатаа ешмээнэй гурил нэгэ шээкэлээр худалдагдахань, – гэжэ соносхобо.

2Бэеынь хамгаалагшадай дарга хааниие гарһаань дүнгөөд, үдэшэжэ ябахадаа:

– Тэнгэриин хаабариие Эзэнэй нээгээшье хада, шинии айладхал бэелүүлэгдэхэгүй! – гэжэ Бурханай хүндэ хэлэбэ.

– Ши хоёр нюдөөрөө харахаш, зүгөөр ши тэрээнһээ ама хүрэхэгүйш! – гэжэ Элишаа тэрээндэ хэлэбэ.

Бүһэлэлтын эсэс

3Эгээл энэ сагта элдин үбшэнтэй дүрбэн хүн хотын хаалта үүдэнэй дэргэдэ һуубад. Тэдэнэр бэе бэедээ:

– Бидэнэр үхэлөө хүлеэжэ, юундэ эндэ һуунабибди? 4Хэрбэеэ бидэ шиидхэбэри абажа хото ошоо һаа, тэндэхи үлэн хооһон байдалһаа үхэхэбди. Эндэ үлөөшье һаа, үхэхэ байнабди. Араамшуудта хулжажа ошоёбди. Тэдэнэй бидэниие хайрлаа һаа, амиды үлэхэбди, хайрлаагүй һаань, алуулхабди.

5Харанхы болохолоор, тэдэнэр араамшуудай сэрэгэй хүреэндэ ошобо. Тэдэнэй тэрэ хүреэндэ дүтэлхэдэ, тэндэ хэншье үгы байба.

6Эзэн араамшуудай сэрэгэй тогтоһон хүреэндэ дайшалхы тэргэнүүдэй түерэлдөө, моридой туруунуудай түбэрэлдөө болон сэрэгүүдэй шаг шууяа асаржа зэдэлүүлһэн байба. «Израилиин хаан бидэндэ добтолхын тула хээдүүдэй ба египедүүдэй хаашуулые бэе тээшээ татаба», – гэжэ тэдэнэр хэлсээд, 7һүниин харанхые һамбаашалжа, ами бэеэ аршалан абарха гэжэ, өөһэдынгөө майхануудые, моридые, элжэгэнүүдые болон ашаанай тэргэнүүдые орхёод, тэрьедэн зугадаһан байба.

8Элдин үбшэнтэй тэдэ дүрбэн араамшуудай сэрэгэй тогтон байрлаһан хүреэнэй захадахи майханда орожо эдеэлбэд, уубад. Тиигээд тэдэнэр алта, мүнгэ, хубсаһа абажа, тэдэнээ холошог абаашажа нюугаад, ондоо майханда орожо, мүн лэ тиимэ юумэнүүдые абажа, тэдэнээ холошог абаашажа нюубад.

9Тэдэнэр бэе бэедээ:

– Бидэ буруушаг юумэ хэнэ бэшэ гүбди? Энэ үдэр бидэнэй баярлалгын үдэр. Хэрбэеэ бидэнэр эндэ үүр сайтар удаашарбал, гэм зэмэтэд болохобди. Бидэнэр эндэһээ түргэхэн арилаябди, хаанай ордондо ошожо, энээн тухай дуулгаябди, – гэлсэбэд.

10Тэдэнэр бусажа, хотын хаалта үүдэндэ ошоод, харуулшадые дуудажа ерүүлээд:

– Бидэ Араамай сэрэгэй тогтон байрлаһан хүреэндэ ошообди. Хэншье тэндэ үгы, гансал хон-жэн байна. Харин гансал морид ба элжэгэнүүд уяатай, майханууд байһан шэгтээ байнад, – гэжэ хэлэбэд.

11Харуулшад хашхаралдан, хүнүүдые дуудажа ерүүлээд, энэ һонин хаанай ордондо дуулгахые захирбад.

12Хаан һүни бодоод, өөрынгөө түшэмэлнүүдые дуудажа ерүүлээд:

– Араамшууд бидэндэ ямар нэгэ занга бэлдэбэ гэжэ таанадта дуулганаб. Тэдэнэр бидэнэй үлэн хооһон байһые мэдэнэд. Тэдэнэр хээрэ талада бэеэ нюужа хоргодохын тула сэрэгүүдэйнгээ хүреэн орхёо. «Израильшуудай хотоһоо гарахада, бидэниие амидыгаар баряад, хото руумнай ороёбди» гэжэ тэдэнэр һанаа, – гэжэ хэлэбэ.

13Хаанай түшэмэлнүүдэй нэгэн иигэжэ хэлэбэ:

– Амиды үлэһэн табан моридоо эмээллэебди. Хото соо үлэн хооһон байһан тэдэ морид бүхы израильшууд мэтэ үхэхэ… Тэндэ юун болооб гэжэ мэдэхын тула хэн нэгые эльгээебди.

14Хаан дайшалхы хоёр тэргэдэ моридые хүллүүлээд, хүнүүдые Араамай сэрэгүүдэй хүреэндэ эльгээхэдээ:

– Ябагты, юун болооб гэжэ харагты, – гэжэ хэлэбэ.

15Тэдэнэр Иордан ошохо замдаа яаралтайгаар тэрьедэһэн Араамай сэрэгшэдэй хаяһан хубсаһан болон зэр зэбсэгүүдэй газарта хэбтэхые харабад. Тэдэнэр Самаридаа бусажа, бүхы хараһан юумэнүүдээ хаандаа хөөрэбэд.

16Арад зон хотоһоо гаража, Араамай сэрэгэй хүреэниие тонохоёо ошобо. Нэгэ сатаа шиниисын гурил нэгэ шээкэлээр, хоёр сатаа ешмээнэй гурил нэгэ шээкэлээр худалдабад. Эзэнэй хэлэһэн үгэ бэелүүлэгдэбэ.

17Хаан бэе хамгаалуулагшадай үнөөхи даргые хотын хаалта үүдые харууһалхыень томилбо. Арад зон хотын хаалта үүдэндэ тэрэниие түлхи дайража унагаагаад, дээгүүрнь гэшхэжэ гараба. Тиихэдэнь тэрэ дарга наһа бараба. Эдэ бүхы аюулнууд Элишаагай гэртэ хаанай ерэхэдэ, Бурханай хүнэй уридшалан хэлэгшээр үнгэрбэ.

18Бурханай хүнэй хаанда уридшалан хэлэһэн үгэнүүд булта бэелүүлэгдэбэ. Элишаа хаанда тиихэдэ иигэжэ хэлээ һэн:

– Үглөөдэр энэл сагта Самариин хаалта үүдэнэй дэргэдэ хоёр сатаа ешмээнэй гурил нэгэ шээкэлээр, нэгэ сатаа шиниисын гурил нэгэ шээкэлээр худалдагдаха. 19Тиихэдэнь хаанай бэе хамгаалагшадай дарга Бурханай хүндэ иигэжэ хэлээ бэлэй: «Тэнгэриин хаабариие Эзэнэй нээгээшье һаа, шинии айладаһан үгэ бэелүүлэгдэхэгүй». «Ши хоёр нюдөөрөө харахаш, зүгөөр ши тэрээнһээ ама хүрэхэгүйш» гэжэ тиихэдэ Элишаа тэрээндэ хэлээ һэн. 20Тиигээд лэ Элишаагай хэлэһэн айладхал хүсэлдэжэ, олон зон хотын хаалта үүдэнэй дэргэдэ тэрэниие дайража унагаагаад, үхэтэрынь гэшхээ юм.