‏ 2 Kings 9

(2 Уг 22:1-6)

Израилиин хан шэрээдэ Еһүүе тоһолон ёһололго

1Мэдээсэгшэ Элишаа лүндэншэдэй зүблэлэй зарим гэшүүдые дуудажа ерүүлээд:

– Бэһэеэ бэһэлэ, энэ шэлтэй оливын тоһо аба, тиигээд Рамоот-Галаад яба. 2Ши тэндэ ерэхэдээ, Нимшиигэй аша, Ёшапаадай хүбүүн Еһүүе бэдэржэ олоод, эгээ холын таһалгадань дахуулжа абаашаад, 3шэл соо хэһэн оливын тоһо тэрэнэй толгойдо адхамсаараа:

– Эзэн иигэжэ хэлэнэ: «Би шамайе Израилиин хаан болгожо, тоһо түрхибэб», – гэжэ хэлээд, үүдэ нээжэ, гэдэргээшье харангүйгөөр, тэндэһээ зугада. Бү хүлеэ, – гэжэ хэлэбэ.

4Лүндэншэ залуу хүбүүн Рамоот-Галаад ошобо. 5Тэрэнэй тэндэ ерэхэдэ, сэрэгэй дарганар һуубад.

– Сэрэгэй жанжан, намһаа танда хэлэхэ үгэ байна, – гэжэ залуу хүбүүн хэлэбэ.

– Бидэнэй хэндэб? – гэжэ Еһүү һураба.

– Сэрэгэй жанжан танда, – гэжэ тэрэ хүбүүн харюусаба.

6Еһүү бодоод, тэрээнтэй хамта гэртэ оробо. Тэрэ хүбүүн шэл соохи оливын тоһо Еһүүгэй толгойдо адхаад:

– Израилиин Бурхан, Эзэн иигэжэ айладана: Би шамайе Эзэнэй арад зон болохо Израилиин хаан болгожо, толгойдош тоһо түрхибэб. 7Ши өөрынгөө эзэн Ахаабай угые үгы хэхэ ёһотойш. Тиигүүлжэ Би Изээбэлдэ алуулһан Эзэнэй барлаг болохо бүхы лүндэншэдэй шуһанай түлөө үһөөгөө абахаб. 8Ахаабай бүхы уг хосорог! Би Израильдахи Ахаабай угай бүхы бага ба ехэ эрэшүүлые бултыень үгы хэхэб. 9Ахаабай угые үгы хэгшэдэл, Набаадай хүбүүн Еробоһаамай, Ахияагай хүбүүн Баһашаагай угуудые баһал үгы хэхэб. 10Нохойнууд Езрээл шадархи газарта Изээбэлые эдихэ. Хэншье тэрэ эхэнэрые хүдөөлүүлхэгүй, – гэжэ хэлээд, үүдэ нээжэ, тэндэһээ зугадаба.

11Еһүүгэй гэрһээ гарахада, эзэнэй дүтын хүнүүд тэрээндэ дүтэлбэд.

– Бүхы юумэн бараг гү? Тэрэ галзуу танда юундэ ерээб? – гэжэ тэдэнэр һураба.

– Таанад тэрэ хүниие ямар хүн байһыень мэдэнэт. Тэрэ намда юу хэлэхэб даа, – гэжэ Еһүү харюусаба.

12Тэдэнэр бэе бэеэ эбдүүсэжэ:

– Ши юуб даа нюунаш! Үнэн сэхыень бидэндэ хэлэ, – гэжэ баалабад.

– Тэрэ намда, – гэжэ Еһүү залуу хүбүүнэй хэлэһые дабтажа эхилбэ. – Эзэн иигэжэ хэлэбэ: Би шамайе Израилиин хаан болгожо, толгойдош тоһо түрхюулбэб.

13Тэдэнэр бушуу түргөөр өөр өөрынгөө хубсаһа тайлажа, Еһүүгай ябаха хэрэлсын тэбсэгүүд дээрэ дэбдижэ, эбэр бүреэнүүдые үлеэжэ:

– Еһүү хаан болобо! – гэжэ хашхаралдаба.

Израилиин хаан Ёраамые Еһүү алана

14Тиигээд лэ Нимшиигэй аша, Ёшапаадай хүбүүн Еһүү Ёраамай урдаһаа эсэргүүсэн бодобо.

Тэрэ сагта Ёраамай ударидалга доро байһан Израилиин бүхы сэрэгүүд Араамай хаан Хазаһээлэй добтолгодо харюу үгэхэ гэжэ Рамоот-Галаад шадар хүлеэбэ.

15Ёраам хаан Араамай хаан Хазаһээлтэй тулалдажа шархатахадаа, тэрэнээ эмшэлүүлхэеэ Езрээл бусаба.

– Хэрбэеэ таанад минии түлөө һаатнай, таанадай хэншье хотоһоо бү гараг, Езрээлдэ ошожо, юунэй боложо байһые бү дуулгаг, – гэжэ Еһүү хэлээд, 16дайшалхы тэргэдээ һуумсаараа, Езрээл тээшэ ошобо. Шархатаһан Ёраам тэндэ хэбтээ юм. Иудын хаан Ахазияа тэрэниие эрьехэеэ тэндэ ерэбэ.

17Езрээлэй хэрэмэй аранга дээрэ харуулда зогсоһон сэрэгшэ дүтэлэн ерэжэ ябаһан Еһүүгэй үй түмэн сэрэгүүдые хараад:

– Сэрэгүүд ерэжэ ябана! – гэжэ мэдээсэбэ.

– Эмээл моритые урдаһаань эльгээ. Тэрэ тэдэниие угтажа ошоод «Амар амгалан гү?» гэжэ һураг, – гэжэ Ёраам захирба.

18Эмээл морито угтажа, Еһүүдэ ошоод:

– «Амар амгалан гү?» гэжэ Ёраам хаан һурана, – гэжэ хэлэбэ.

– Амар амгалан тухай юу мэдэхэбши даа. Бидэнэй хойноһоо даха, – гэжэ Еһүү хэлэбэ.

– Манай элшэн тэдээндэ ошоһон аад, бусабагүй, – гэжэ хэрэмэй дээрэхи арангын харуулшан хэлэбэ.

19Ондоо эмээл моритые эльгээбэ. Тэрэ тэдэнэй сэрэгүүдтэ ошоод:

– «Амар амгалан гү?» гэжэ Ёраам хаан һурана, – гэжэ хэлэбэ.

– Амар амгалан тухай юу мэдэхэбши даа. Бидэнэй хойноһоо даха, – гэжэ Еһүү хэлэбэ.

20Хэрэм дээрэхи арангын харуулшан Ёраамда иигэжэ мэдээсэнэ:

– Хоёрдохи элшэн тэдээндэ ошоһон аад, бусабагүй! Нимшиигэй хүбүүн Еһүүгэй сэрэгүүд тогтонгүй, бидэн тээшэ галзуу юумэдэл ерэжэ ябана!

21Ёраам иигэжэ захирба:

– Минии дайшалхы тэргэдэ моридые хүллэгты!

Тэрэнэй дайшалхы тэргэдэ моридые хүллэбэд. Израилиин хаан Ёраам Иудын хаан Ахазияа хоёр өөр өөрынгөө дайшалхы тэргэнүүдтэ һуугаад, Езрээлэй Набоодой талада Еһүүтэй уулзабад.

22Ёраам Еһүүтэй золгон уулзаад:

– Еһүү, амар амгаланаар ерэбэ гүш? – гэжэ һураба.

– Шинии эхэ Изээбэлэй забхайрал, тэрэнэй эди шэдинүүд бидэндэ ямар амар амгалан байлгахаб? – гэжэ Еһүү харюусаба.

23Ёраам дайшалхы тэргээрээ байра дээрээ эрьелдээд, тэндэһээ зугадан тэрьедэхэдээ:

– Ахазияа, урбалта! – гэжэ Ахазияада хашхарба.

24Еһүү һурша номоо татажа харбахадаа, Ёраамай хоёр далын хоорондо тудаба. Тэрэнэй харбаһан годлиин үзүүр Ёраамай зүрхэндэ шаагдаба. Тэрэ өөрынгөө дайшалхы тэргэ дээрэ унаба.

25Еһүү өөрынгөө бэе хамгаалагшадай дарга Бидкаарда хандажа:

– Ёраамай үхэһэн бэе абаад, Езрээлэй Набоодой газарта хая! Һанана гүш – ши бидэ хоёрой зэргэлээд, Ахаабай эсэгые үдэшэжэ ябахада, тэрээн тухай муу зүн Эзэнэй иигэжэ айладаһые: 26«Би үсэгэлдэр Набоодой ба тэрэнэй хүбүүдэй шуһа харааб! Би шамда үһөө нэхэбэриин түлбэри түлэхэб!» Эзэнэй хэлэһэн айладхал бэелүүлжэ, тэрэнэй үхэһэн бэе абаад, эндэ хая, – гэжэ захирба.

Иудын хаан Ахазияагай үхэл

27Иудын хаан Ахазияа эдэ бүгэдые хараад, Бэт-Хаггаанай харгыгаар зугадаба.

– Тэрэниие алагты! – гэжэ Еһүү хашхаран, тэрэнэй хойноһоонь намнаба.

Бидкаар Ахазияае Иблэһаамай хажуудахи Гуурай үгсүүр өөдэ гаража ябахадань хүсөөд, тэрэнэй хойноһоонь харбажа, дайшалхы тэргэ дээрэнь тэрэниие шархатуулба. Тэрэ Мэгиддоо хүрөөд, тэндэ наһа бараба. 28Тэрэнэй зарасанууд тэрэнэй үхэһэн бэеые Иерусалим абаашажа, Давидай хотодо үбгэ эсэгэнэртэйнь зэргэлүүлэн, булаша бунхандань хүдөөлүүлбэ. 29Ахаабай хүбүүн Ёраамай Израильда арбан нэгэн жэлдэ хааншалжа байхада, Ахазияа Иудын хаан болобо.

Еһүү Изээбэлые алана

30Еһүү Езрээл ерэбэ.

Изээбэл энэ ушар тухай мэдээсэл абажа, нюдөө шэрдээд, үһэеэ һамнажа гоёод, сонхынгоо саана зогсобо. 31Энэ үе сагта Еһүү хотын хаалта үүдээр оробо.

– Өөрынгөө эзэниие алаһан Зимриигэй хэрэг һайн гү? – гэжэ Изээбэл тэрээндэ хашхарба ▼

▼ Хара 3 Хаан 16:10.

.

32Еһүү толгойгоо үргэжэ, сонхо тээшэ хараад:

– Хэн эндэ минии тала тээшэб? Хэн нэгэн бии гү? – гэжэ һураба.

Заһаагаа абхуулһан хоёр-гурбан харуулшад сонхоор харабад.

33Еһүү тэдээндэ хандажа:

– Изээбэлые доошонь хаягты! – гэжэ захирба.

Заһаагаа абхуулһан харуулшад Изээбэлые сонхоор доошонь хаябад. Тэрэнэй шуһан гэрэй ханада ба моридто сэсэрбэ. Еһүү тэрэнэй үхэһэн бэе дээгүүр дайшалхы тэргэ морёороо гараад, 34ордон соо орожо, найрлахаяа һуумсаараа:

– Үйлөө харламаар энэ эхэнэртэ һаналаа табигты. Яаба хээбэшье хаанай басаган байһан тэрэниие хүдөөлүүлэгты, – гэжэ захирба.

35Хүнүүд тэрэниие хүдөөлүүлхэеэ ошобо. Теэд тэдэнэр тэрэ эхэнэрэй толгойн, гар болон хүлэйнь яһануудһаа бэшэ юумэ олобогүй. 36Тэдэнэр бусаад, энээн тухай Еһүүдэ хэлэбэд. Тэрэ иигэжэ хэлэбэ:

– Тэрэнэй барлаг, Тишбиигэй Элияагай уридшалан, Эзэнэй иигэжэ хэлэһэн үгые соносхоһон мэдээсэл бэелүүлэгдэбэ: «Езрээл шадархи тала дээрэ Изээбэлэй бэеые нохойнууд эдихэ! 37Таряалан үтэгжүүлэгшэ мэтээр, тэрэнэй үлэгдэлнүүд Езрээл шадар тараан хаягдаха! Изээбэл эндэ байна гэжэ толгойдоо хэншье оруулхагүй!»