2Pe 1 | BxrBBL2024 | STEP | Манай Бурхан ба Абарагша болохо Иисүүс Христоосой үршөөһэн үнэн сэдьхэлэй ашаар маанадтал адли һүзэгтэй болоһон хүнүүд, таанадта Иисүүс Христоосой зараса болон элшэн Симон Пётр бэшэнэ.

‏ 2 Peter 1

Амаршалга

1 Манай Бурхан ба Абарагша болохо Иисүүс Христоосой үршөөһэн үнэн сэдьхэлэй ашаар маанадтал адли һүзэгтэй болоһон хүнүүд, таанадта Иисүүс Христоосой зараса болон элшэн Симон Пётр бэшэнэ.

2 Манай Бурхан ба Эзэн Иисүүсые мэдэһэнэйтнай ашаар Бурханай үршөөл хайра, амгалан тайбан та бүхэнтэй элбэг дэлбэг байхань болтогой!

Бурханай хүнүүдые дуудалга, шэлэн абалга

3 Бурханай эрхэ мэдэлээр ажамидаржа байхымнай тула Тэрэниие мэдэһэнэймнай ашаар Иисүүсһээ эхитэй Бурханай хүсэн бүхы хэрэгтэй юумые маанадта үгөө. Бурхан алдараараа болон буян хэшэгээрээ хубаалсахын тула бидэниие дуудаа, 4 тэдэнэйнгээ ашаар бидэндэ ехэ үнэтэй, агууехэ найдуулга үгөө. Энэ дэлхэйн хүсэлэнгүүдтэй холбоотой үхэлые дабажа, Бурханай ажамидаралаар ажаһуухынтнай тула энэ найдуулга үгтөө.

5 – 6 – 7 Тиимэһээл таанад дэмбэрэлтэ хэрэгүүдээрээ һүзэгөө бэхижүүлхые бүхы хүсэ шадалаараа оролдогты, дэмбэрэлтэ хэрэгүүдһээ гадна эрдэм ухаантай байхые, эрдэм ухаантай байхаһаа гадна бэеэ бариха аргатай, бэеэ барихаһаа гадна тэсэбэритэй байхые, тэсэбэритэй байхаһаа гадна Бурханда өөрыгөө зорюулан ажамидархые, Бурханда өөрыгөө зорюулан ажамидархаһаа гадна аха дүүнэрэй найрамдалтай, аха дүүнэрэй найрамдалһаа гадна хайра дуратай байхые бүхы хүсэ шадалаараа оролдожо байгты. 8 Иимэ аша үлзытэй шанарнуудаа бэхижүүлжэ байбалтнай, манай Эзэн Иисүүс Христоосые мэдэрхэдэ тэдэтнай таанадые үрэ дүнгүй, аша туһагүй байлгахагүйл. 9 Харин иимэ шанаргүй хүнүүд холо харадаггүй һохорнууд юм: урданайгаа нүгэлнүүдһээ аршалагдаһанаа мартажархидаг. 10 Тиимэһээл, аха дүүнэр, Бурханда дуудуулһанаа, шэлэгдэжэ абтаһанаа баталхые һайса оролдогты. Тиигэбэл таанад зүб замһаа хадуурхагүйт. 11 Манай Эзэн, Абарагша Иисүүс Христоосой мүнхын хаан орондо орохо бүрин эрхэ таанадта үгтэхэл.

12 Эдэ бүгэдые мэдээд, үгтэһэн үнэн зүбые хатуу баримталжа байбалтнайшье, би эдые таанадта дахин дахин һануулжа байхаб. 13 Амиды ябаха хаһадаа үргэлжэ һануулжа байхань зүб гэжэ бодоноб. 14 Ушарынь юуб гэбэл, энэ һүмэеэ орхихо сагни ойртоо гэжэ мэдэнэб, манай Эзэн Иисүүс Христоосшье тиигэжэ намда хэлээ. 15 Үхэһэншье хойномни алишье сагта эдэ бүгэдые һанажа байхынтнай тула би бүхы хүсэ шадалаа үгэхэб.

16 Манай Эзэн Иисүүс Христоосой ерэхэ тухай хэлэхэдээ, бидэ хэн нэгэнэй зохёоһон үльгэрнүүдые дабтаагүйбди. Бидэ өөһэдөө Тэрэнэй һүр жабхалангые үзэһэн гэршэнэр гээшэбди. 17 «Энэ Минии инаг хайрата Хүбүүмни, сэдьхэлэймни урма охин» гэжэ Бурханай Агууехэ Алдарай дуугай һонортонь хүрэхэтэйнь зэргэ Бурхан Эсэгэһээ нэрэ түрэдэ, алдар солодо хүртэхэдэнь, бидэ байлсаа һэмди. 18 Тэрээнтэй хамта нангин хада дээрэ байхадаа, тэнгэриһээ бууһан энэ Бурханай дууе бидэ өөһэдөө дуулаа һэмди. 19 Тиимэһээ таанад лүндэншэдэй айладхаһан юумэнүүдтэ бүришье ехээр этигэжэ байгты. Үдэр мандаад, үглөөнэй толон зүрхэ сэдьхэлдэтнай бадарха үе саг болотор харанхы газарта аһажа байһан зуладал адли лүндэншэдэй үгэнүүдтэ анхаралаа хандуулбал, таанад зүб юумэ хэхэт. 20 Нангин Бэшэг соо хэлэгдэһэн лүндэншэдэй үгэнүүдые хүн өөрөө тайлбарилжа шадахагүй гэжэ таанад нэн түрүүн һанажа байгты. 21 Юундэб гэхэдэ, нэгэшье лүндэншэ өөрынгөө дура хүсэлөөр уридшалан хэлээгүй, харин Арюун Һүлдөөр хүтэлүүлэгдэн, Бурханай үгэ айладхадаг байгаа.