‏ 2 Samuel 15

Тэжээһэн буруун тэргэ эбдэхэ

1Тэрэнэй удаа Абшалоом өөртөө моридтой дайшалхы тэргэ, табин хүнһөө бүридэһэн харуултай болобо. 2Тэрэ эртэ үглөөгүүр бодожо, хотын хаалгануудай хажуудахи харгы дээрэ зогсодог байба. Зарга хэрэгтэй хэн нэгэнэй хаанда мүргэн шүүбэрилүүлхэеэ ерэжэ ябабал, Абшалоом тэрэниие дуудажа, иигэжэ асуудаг һэн:

– Ши хаанаһаабши?

– Израилиин тэрэ обогһооб, – гэжэ тэрэ хүнэй харюусахадань, 3Абшалоом тэрээндэ иигэжэ хэлэдэг байгаа:

– Харыш даа, шинии хэрэг һайн, зүб байна. Харин хаанай зүгһөө шамайе шагнаха хүн байхагүй.

4Үшөө нэмэн тэрэ иигэдэг һэн: – Оо, намайе энэ уласай зарга шүүгшээр томилоо гээшэ һаань, зарга хэрэгтэй хүн бүхэн намда ерэжэ, би тэдэние зүбөөр шүүбэрилдэг байха һэм!

5Хэн нэгэнэй тэрээндэ дүтэлжэ, һүгэдэн мүргэхэ гэбэл, тэрэ тэбэрин тааладаг һэн. 6Үнэн зүбые бэдэрэн хаанда ерэһэн хүн бүхэндэ Абшалоом иимээр хандадаг байгаа. Иигэжэ тэрэ Израилиин зоной зүрхэ сэдьхэлые татадаг болобо.

7Дүрбэн ▼

▼ Дүрбэн – еврей хэлэн дээрэ «дүшэн».

жэлэй үнгэрһэнэй удаа Абшалоом хаанда иигэжэ хэлэбэ:

– Эзэндэ үргэһэн тангаригаа минии бэелүүлхын тула намайе Хэброон руу табиит. 8Танай богоол болохо би Араамай Гэшүүртэ байхадаа, «хэрбээ Эзэнэй намайе үнэхөөр Иерусалим руу бусаагаа һаань, би Эзэндэ үргэл хэхэб» гэжэ тангариглаа һэм.

9Хаан тэрээндэ харюусаба:

– Амар амгалан ябаарай даа.

Иигэжэ тэрэ Хэброон руу ошобо. 10Абшалоом Израилиин бүхы обог аймагуудаар тагнуулшадые эльгээжэ, иигэжэ захиба:

– Эбэр бүреэгэй абяа дуулахадаа, таанар «Абшалоом Хэброоной хаан болоо!» гэжэ хашхаралдаарайгты.

11Абшалоомтой хамта хоёр зуун хүн Иерусалимһаа гаран ошоо һэн. Тэдэ юушье боложо байһыень мэдээгүй, уригдаад лэ ошоһон зон бэлэй. 12Абшалоом үргэл хэхэдээ хүниие ябуулжа, Давидай зүбшэгшэ Ахитоопэлые Гилоо хотоһоонь дуудажа асаруулба. Иигэжэ шанга нюуса хэлсээн байгуулагдажа, Абшалоомтой нэгэдэн ниилэхэ зоной тоо олон боложол байгаа бэлэй.

Давид Иерусалимһаа тэрьедэбэ

13Тиихэдэ Давидта мэдээ асарагша нэгэн ерэжэ, иигэжэ дуулгаба:

– Израильшууд Абшалоомой тала баряад байна.

14Тиихэдэнь Давид Иерусалимда өөртэйнь хамта байһан бүхы түшэмэлнүүдтээ иигэжэ хэлэбэ:

– Тэрьедэхэ ёһотойбди. Үгы һаа, Абшалоомдо бултадаа алуулхабди. Түргэлэе! Тэрэнэй маанадые баряадүй, гай ушаруулан, зониие һэлмээр сабшан усадхаадүйдэнь гаран ошоё.

15Тэдэнь хаанда харюусаба:

– Үндэр түрэлтэ хаан! Танай хэлэһээр лэ бүхы юумэ хэхэбди.

16Хаан гаража, тэрэнэй хойноһоо гэр бүлэнь, бүхы түшэмэлнүүдынь дахан ошобо. Харин гэрээ һахюулан, хаан арбан бага һамгадаа үлөөбэ.

17Хаан болон тэрэнэй бүхы зон хотоһоо гаран ябажа, Бэт-Мэрхаада тогтобо. 18Хамаг түшэмэлнүүд хажуудань зогсобо. Бэеыень аршалаашад бултадаа, хэрээдүүд ба пэлидүүд бултадаа, мүн хаантай хамта Гаатһаа ерэһэн зургаан зуун хүн бүгэдэ хаанай урдуур жагсаалаар ябан үнгэрбэ. 19Хаан гаадуудай удамаршан Иттайда иигэжэ хэлэбэ:

– Ши юундэ бидэнтэй хамта ябанабши? Хари хүн ха юмши, өөрынгөө газарһаа үлдүүлэнхэйш. Бусажа, нүгөөдэ хаантай хамта үлэ. 20Ши һаял бидэндэ ерээш. Тиигээд хаагууршье ябахаяа мэдэхэгүй аад, би шамайе мүнөө намтай яба гэжэ баадхаха аалби? Ши өөрынгөө нютаг зониие абаад буса. Үршөөл хайратай, сэхэ сэбэр ябахатнай болтогой!

21Иттай хаанда харюусаба:

– Үндэр түрэлтэ хаан! Эзэнэй нэрээр тангаригланаб: танай амидышье, нүгшөөдшье, хаанашье байгаа хадатнай би тэндэл байхаб!

22Тиимэһээ Давид Иттайда хэлэбэ:

– Тиигээ һаа, ошоё.

Иигээд гаадай Иттай, тэрэнэй бүхы зониинь үхи хүүгэдтэеэ хамта ошобо. 23Нютагаа орхин ошожо ябахадаа бүхы зон шангаар бархиралдан ябаа. Хаан Кидроон горхо гаталха гарасын хажууда байгаа. Бүхы арад зон сүл губи тээшэ замаар шэглэн ябаа.

24Цадоок болон тэрээнтэй байһан бүхы левидүүд Бурханай хэлсээнэй ханзые абажа ябаа. Тэдэ тус ханзые буулган табиба ▼

▼ Еврей хэлэн дээрэ «адхаба».

. Бүхы зоной Иерусалимһаа гаратар Абиатаар үргэл хэжэ байгаа ▼

▼ Еврей хэлэн дээрэ «дээшээ үгсэн гараа».

. 25Хаан Цадоогто хэлэбэ:

– Бурханай ханзые хото руу бусаан абааша. Эзэнэй үршөөл хайрада хүртөө гээшэ һаам, Тэрэ намайе дахин бусаажа, Өөрыгөө болон оршодог газараа үзүүлхэ. 26Харин Тэрэнэй намайе үршөөгөөгүй гээшэ һаань, яахаб, Тэрэ намда һанаһаараа юумэ хүүжэн. 27Хаан үшөө тэрээндэ иигэжэ хэлэбэ:

– Хара даа, өөрынгөө хүбүүн Ахимаац болон Абиатаарай хүбүүн Ёнатааниие аба. Хоюулаа хүбүүдтэеэ хамта амгалан тайбан хото руу бусагты. 28Таанадһаа мэдээнэй ерэтэр би сүл губида, Иордан голой гарасын дэргэдэ хүлеэн тогтохоб.

29Цадоок болон Абиатаар Бурханай ханзые Иерусалим руу бусаажа, тэндээ үлэбэ.

30Давид Элеон хада өөдэ үгсэхэдөө, толгойгоо бүглэн, уйлан, хүл нюсэгэн ябаба. Мүн тэрээнтэй хамта байһан бүхы зон толгойгоо бүглэн, уйлан ябаа һэн. 31Хэн нэгэнэй Давидта:

– Абшалоомтой нюуса хэлсээ хэгшэдэй дунда Ахитоопэл байна, – гэжэ хэлэхэдэнь, Давид:

– Эзэн, Ахитоопэлэй зүблөөе ухаа удхагүй болгожо үгыт гэжэ би зальбарнаб, – гэбэ. 32Бурханда мүргэдэг газар болоһон хадын оройдо Давидай гараха үедэ хубсаһаа уринхай, толгой дээрээ шорой адхаһан архэй хүн Хушай урдаһаань ерэжэ ябаба. 33Давид тэрээндэ иигэжэ хэлэбэ:

– Хэрбээ ши намтай ябабал, намда дарамта болохош. 34Харин хото руу бусабал, Абшалоомдо «Хаан, би танай зарасаб. Урдань эсэгынтнай зараса байгааб, мүнөө танай зарасаб» гэжэ хэлээрэй, Ахитоопэлэй зүблөөе туһагүй болгожо шадахаш. 35Тэндэ санаартад Цадоок болон Абиатаар шамтай хамта байха. Хаанай ордон соо дуулаһан лэ юумэеэ тэдээндэ хөөрөөрэй. 36Цадоогой хүбүүн Ахимаац болон Абиатаарай хүбүүн Ёнатаан тэдэнтэй хамта байха. Дуулаһан юумыетнай тэдэ намда дамжуулха.

37Тиигээд Давидай нүхэр Хушай хото руу ошобо. Тэрэ үедэ Абшалоомшье Иерусалим руу ерэжэ байгаа бэлэй.