2Sa 2 | BxrBBL2024 | STEP | Тэрэнэй удаа Давид Эзэнһээ асууба: – Яахамниб? Иудын ямар нэгэн хото руу ябахам гү? – Яба, – гэжэ Эзэн тэрээндэ захирба. – Хайшаа ошохобиб? – гэжэ Давидай асуухада, – Хэброон руу,

‏ 2 Samuel 2

Давид Иудын хаан болобо

1 Тэрэнэй удаа Давид Эзэнһээ асууба:

– Яахамниб? Иудын ямар нэгэн хото руу ябахам гү?

– Яба, – гэжэ Эзэн тэрээндэ захирба.

– Хайшаа ошохобиб? – гэжэ Давидай асуухада,

– Хэброон руу, – гэжэ Эзэн айладхаба. 2 Тиигээд Давид өөрынгөө хоёр һамгадтай – Езрээл хотын Ахинооһам ба Набаалай һамган байһан, Кармээл хотын Абигааһилтай хамта тиишээ ябаба ха. 3 Тэрэ өөрын зониие гэр бүлэтэйнь дахуулан асаржа, Хэброондо ба тойроод байһан тосхонуудтань байрлаба. 4 Иудын обогой зон ерэжэ, тэндэ Давидые Иудын хаан болгон, тоһо түрхин ёһолол хэбэ.

Ябээш-Галаадай зон Саулые хүдөөлүүлээ гэжэ дуулахадаа, 5 Давид тиишээ элшэнэрые эльгээжэ, ажаһуугшадта иигэжэ хэлэхыень захяа гэхэ:

– Таанар өөһэдынгөө эзэн Саулда үнэн сэхэ байһанаа элирхэйлжэ, тэрэниие хүдөөлүүлһэндөө Эзэнэй урда буян хэшэгтэйт! 6 Одоо мүнөө Эзэн таанарта үршөөл хайраяа, үнэн шударгаяа үзүүлхэнь болтогой! Иимэ үйлэ хэһэнэйтнай тула бишье таанарта һайн һайханиие үйлэдэхэб. 7 Хүсэ шадалтай, эрэлхэг зоригтой байгты! Танай эзэн хаан Саул наһа бараа. Иудын обогой зон намайе өөрынгөө хаан болгон, тоһо түрхин ёһолоо.

Иш-Боошэт Израилиин хаан болобо

8 Харин Саулай сэрэгэй жанжин, Нээрэй хүбүүн Абнээр Саулай хүбүүн Иш-Боошэдые абаад, Маханааим руу асарба. 9 Тэрэ Галаад, Ашуур, Езрээл, Эпрааим, Бэньямиинэй, юрэдөө, хамаг Израилиин хаанаар тэрэниие табиба. 10 Саулай хүбүүн Иш-Боошэт Израилиин хаан болоходоо дүшэ наһатай байгаа. Тэрэ хоёр жэл соо хаанта засаг баряа бэлэй. Тиихэдэ Иудын обогой зон Давидые дахан, тэрээндээ үнэн сэхэ байгаа. 11 Давид долоон жэл, зургаан һарын туршада Хэброонһоо Иудые зонхилһон байна.

Израиль болон Иудын хоорондохи дайн

12 Нээрэй хүбүүн Абнээр Саулай хүбүүн Иш-Боошэдой сэрэг ударидан, Маханааимһаа гаража, Гибэһоон руу шэглэбэ. 13 Цэруяа гэдэг эхэтэй Ёһааб Давидай сэрэг ударидан, мүн лэ гаража, тэдэ Гибэһооной сөөрэмэй хажууда уулзаба. Тэдэнэй нэгэнь сөөрэмэй наада талада, нүгөөдэнь саада таладань байгаа. 14 Абнээр Ёһаабта дурадхаба:

– Эрхим сэрэгшэдые гарган, өөһэдынгөө урда тэмсэлдүүлэе.

– Гаргаял, – гэжэ Ёһааб зүбшөөбэ. 15 Тиигээд Саулай хүбүүн Иш-Боошэдой сэрэгһээ арбан хоёр Бэньямиин угай зон, Давидай албатанһаа арбан хоёр хүн гараба. 16 Тэдэнэр бэе бэеынгээ толгойһоо аһалдажа, бэе бэеынгээ хабиргай руу һэлмэ хадхажа, алдалан хамта унаа бэлэй. Тиимэһээ Гибэһоондо байдаг тэрэ газар «Һэлмэнүүдэй талмай» гэжэ нэрлэгдээ һэн. 17 Тэрэ үдэр угаа хүндэ тулалдаан боложо, Абнээр болон израильшууд Давидай сэрэгтэ диилдээ бэлэй.

18 Тэндэ Цэруяагай гурбан хүбүүд Ёһааб, Абишай, Асаһээл гэгшэд байлсаа. Асаһээл хадаа талын зээрэн мэтэ хурдан хүлтэй байгаа. 19 Тэрэ Абнээрые сэхэ намнажа, хажуу тээшээ халташье годирхогүй байба. 20 Абнээр эрьежэ:

– Асаһээл, ши мүн гүш? – гэхэдэнь, тэрэ:

– Тиимэ, биб, – гэжэ харюусаба ха. 21 Абнээр:

– Намайе намнахаа боли! Баруун гү, али зүүн тээшээ эрьежэ, залуу нэгые барижа, тэрэнэй зэр зэбсэгые өөртөө аба, – гээ бэлэй. Теэд Асаһээл тэрээнһээ һалаха һандахагүй байба. 22 Абнээр дахин Асаһээлдэ:

– Намһаа һала! Үгы һааш, шамайе алаха ёһотой болохоб. Тиигэбэл, би яажа шинии аха Ёһаабай урдаһаа харахабиб? – гэбэ. 23 Теэд тэрэ болибогүй. Тиихэдэнь Абнээр жадын нүгөө үзүүрээр тэрэниие гэдэһэ руунь хадхаба, жада нюргаарнь нэбтэ гарашаба. Асаһээл унажа, тэрэл газартаа гээгдэшоо һэн. Тэрэнэй бэе газар дээрэ хэбтэнхэй, тэндэ ерэһэн зон бултадаа хажуудань тогтодог байба.

24 Харин Ёһааб болон Абишай Абнээрэй хойноһоо намнаба. Гибэһооной элһэн сүл губи руу ошоһон харгы дээрэ байдаг, Гииһаагай наана оршодог Аммаагай дабаанда наранай орожо байхада тэдэ хүрэжэ ерэбэ. 25 Бэньямииншууд Абнээрэй хажууда сугларжа, нэгэ бүлэг болоод, дабаанай оройдо зогсобо. 26 Абнээр Ёһаабые дуудаба:

– Бидэ бэе бэеэ хэтэ мүнхэдөө алажа байха гүбди? Хойшолонгуудынь угаа гашуун байха гэжэ мэдэнэгүй гүш? Аха дүүнэрээ намнахаяа болихо тухай ши зондоо хэлэхэгүй юм гүш? 27 Ёһааб:

– Бурхан үзэг, хэрбээ шинии эдэ үгэнүүдые урид хэлээ һааш, үшөө үглөө байхада сэрэгшэд аха дүүнэрэйнгээ хойноһоо намнахаяа болихо байгаал, – гэбэ. 28 Иигээд Ёһааб эбэр бүреэгээр үлеэжэ, бүхы сэрэг тогтожо, израильшуудай хойноһоо мүрдэхэеэ, бэшэ тулалдахаяа болибо. 29 Абнээр болон тэрэнэй зон тэрэ һүниндөө нюруу газараар үнгэржэ, Иорданиие гаталан, үдэ хүрэтэр алхалһаар Маханааимда ерэбэ.

30 Ёһааб Абнээрэй хойноһоо ябахаяа болижо бусахадаа, бүхы сэрэгээ суглуулба. Асаһээлһээ гадна Давидай арбан юһэн албатан алга байгаа. 31 Харин тэдэ өөһэдөө Абнээрэй сэрэгһээ гурбан зуун жаран бэньямииншуудые алаһан байба. 32 Тэдэ Асаһээлые абажа, Бэтлэһээмдэ оршодог эсэгынь булашада хүдөөлүүлбэ. Тиигээд Ёһааб өөрын сэрэгтэй хамта бүхэли һүниндөө ябан, үүр сайха үедэ Хэброондо хүрэбэ.