2Sa 20 | BxrBBL2024 | STEP | Бэньямиин хүн Бихрии гэгшын бирагүй, үймөө үүдхэдэг абари зантай Шэбаа хүбүүн тэндэ байлсаа. Тэрэ зониие суглуулхаяа эбэр бүреэгээр үлеэжэ, иигэжэ хэлэжэ байба: – Давидтай хамта бү байя! Тэрээнэй хойноһоо бү ябая! Израилиин улад зон, гэр гэртээ тарая!

‏ 2 Samuel 20

Шэбаа – буһалгаа үүсхэгшэ

1 Бэньямиин хүн Бихрии гэгшын бирагүй, үймөө үүдхэдэг абари зантай Шэбаа хүбүүн тэндэ байлсаа. Тэрэ зониие суглуулхаяа эбэр бүреэгээр үлеэжэ, иигэжэ хэлэжэ байба:

– Давидтай хамта бү байя! Тэрээнэй хойноһоо бү ябая! Израилиин улад зон, гэр гэртээ тарая!

2 Иигэжэ Израилиин бүхы зон Давидые орхижо, Бихриин хүбүүн Шэбаае дахаба. Гэбэшье Иордан голһоо эхилээд, Иерусалим хүрэтэр Иудын зон хаантаяа хамта байгаа.

3 Давид Иерусалим руу ордондоо ерэхэдээ, ордон һахюулжа үлөөһэн арбан бага һамгадаа тусхай гэртэ байрлуулжа, хинагшадые табиба, хэрэгтэй бүхы юумээрнь тэдхэн байба. Теэд хаан тэдэнтэй бэшэ унтаагүй, тэдэ бэлбэһэн эхэнэр мэтэ амидаржа, үхэн үхэтэрөө иигээд лэ байгаа һэн.

4 Хаан Амасаада иигэжэ хэлэбэ:

– Иудын зониие гурбан үдэрэй туршада эндэ бултыень суглуула. Мүн өөрөөшье тэдэнтэй хамта байлсаарай.

5 Тиигээд Амасаа Иудын зониие дуудахаяа ябабашье, хаанай хэлэһэн сагта һөөргөө ерэбэгүй, удаашарба. 6 Давид Абишайда хэлээ һэн:

– Мүнөө бидэндэ Бихриин хүбүүн Шэбаа Абшалоомһоо үлүү гай тодхор татахань. Ши минии сэрэг дахуулжа, тэрэниие мүрдэн мүшхэн ошо. Тэрэ бүхэлэгдэһэн хотодо орожо, маанадһаа хорожо магад.

7 Тиигээд Ёһаабай зон, хаанай бэе аршалагшад, хэрээдүүд ба пэлидүүд, бусадшье сэрэгшэд Бихриин хүбүүн Шэбаае мүрдэн ошохоёо Иерусалимһаа гараба. 8 Тэдэнэй Гибэһоондохи томо шулуунай хажууда байхадань, Амасаа тэдэнтэй уулзашаба. Ёһааб сэрэгэй хубсаһаа үмдэнхэй, хуйтай һэлмэеэ ташаадаа зүүнхэй ябаа. Тиигээд тэрэнэй урагшаа алхахада, һэлмэнь һугарба. 9 Ёһааб Амасаада:

– Ахай, та һайн гүт? – гэжэ хэлээд, Амасаае таалахаяа баруун гараараа һахалыень бариба. 10 Харин Амасаа Ёһаабай гарта байһан һэлмэһээ болгоомжолбогүй. Ёһаабай Амасаае хэбэл руунь хадхахада, гэдэһэниинь газарта гоожобо. Тэрэ амяа табижа, Ёһаабай дахин тэрэниие хадхахань хэрэггүй болоод байгаа.

Удаань Ёһааб болон тэрэнэй дүү Абишай Бихриин хүбүүн Шэбаагай хойноһоо мүрдэн ошобо. 11 Ёһаабай залуу сэрэгшэдэй нэгэн Амасаагай үхэһэн бэеын хажууда зогсон, иигэжэ үгүүлээ һэн:

– Ёһаабай болон Давидай түлөө байһан зон Ёһаабай хойноһоо ябагты!

12 Шуһандаа зууралдаһан Амасаагай бэе харгы хүндэлэн хэбтэжэ байгаа. Үхэһэн бэеын хажууда зоной тогтохые тэрэ залуу сэрэгшэ хараад, харгыһаа тала газар руу тэрэниие шэрэн абаашажа, дэгэлээр хушаба. 13 Амасаагай бэеые харгыһаа холодууламсаар, сэрэг зон бултадаа Ёһаабай хойноһоо дахан, Бихриин хүбүүн Шэбаае мүрдэхэеэ ошобо ха.

14 Шэбаа Израилиин бүхы обогуудай газараар гаража, Абээл-Бэт-Маһахаа хото руу ерэбэ. Бихриин түрэлэй зон ^{▼▼ Бихриин түрэлэй зон – еврей хэлэн дээрэ эдэ үгэнүүд үгы, гансал «бүхы Бэриим» гээд бэшээтэй.} тэрэнэй хойноһоо хото руу ошоо бэлэй. 15 Ёһааб зонтоёо хамта ерэжэ, Абээл-Бэт-Маһахаа хотые бүһэлбэ, хотын ханануудай урда далан бодхоожо, хана һандаргаахаяа һэдэбэ. 16 Тэрэ үедэ хотоһоо нэгэ ухаансар эхэнэр иигэжэ хашхарба:

– Шагныт! Шагныт! Ёһаабта наашаа ерэхыень хэлыт!

17 Ёһаабай тэрээн руу дүтэлхэдэ, тэрэ эхэнэр асууба:

– Та Ёһааб гүт?

– Тиимэ, биб, – гэжэ тэрэнэй хэлэхэдэ, тэрэ эхэнэр хандаба:

– Шэбэгшэтнай болохо минии үгэ дуулыт.

– Би шамайе анхаралтай шагнажа байнаб, – гэбэ Ёһааб.

18 – Урдань зон «Абээл руу ошобол, асуудалнуудтатнай харюу байха» гэжэ хэлсэдэг бэлэй. Тиигээд хэрэг шиидхэгдэдэг һэн. 19 Абээл хадаа Израилиин хуушанай, амгалан тайбан, найдамтай һайн хотонуудай нэгэн болоно. Ямар ушарһаа та тэрэниие һандаргаахаяа һананабта? Эзэнэй угай зөөриие урижа һалгаахатнайл, – гэбэ тэрэ эхэнэр.

20 Ёһааб харюусаба:

– Огто тиимэ бэшэл. Би танай хото һандаргаахаяа, үгы хэхэеэ һанана бэшэб. 21 Ушар тиимэ бэшэ. Эпрааимай уулархаг нютагһаа Бихриин хүбүүн Шэбаа танай хото соо байна. Тэрэ Давид хаанай урдаһаа эсэргүүсээ. Тэрэниие тушаан үгөө һаатнай, бидэ энэ хотоһоо холодохобди.

– Зай, тиибэл, тэрэнэй толгойе хотын хэрэм ханаһаа тан руу шэдэн унагаахабди, – гэжэ тэрэ эхэнэр хэлэбэ. 22 Тиигээд тэрэ эхэнэр хотын зон руу ошожо, сэсэн үгэ хүүрээрээ тэдэниие үгэдөө оруулба. Тэдэ Бихриин хүбүүн Шэбаагай толгой отолжо, Ёһааб руу шэдэбэ. Тиигээд Ёһаабай эбэр бүреэгээр үлеэхэдэ, сэрэг хотоһоо таран ябажа, өөр өөрынгөө гэр руу бусаба. Ёһаабшье мүн лэ Иерусалим руу хаанда бусаа һэн.

Давидай түшэмэлнүүд

23 Ёһааб Израилиин бүхы сэрэгэй ударидагша бэлэй. Ёядаагай хүбүүн Бэнайяа хаанай бэе хамгаалагшадай, хэрээдүүдэй ба пэлидүүдэй ударидагша һэн. 24 Адораам хадаа хара хүндэ ажал хэдэг зоной хинагша, Ахилүүдэй хүбүүн Ёшапаат түүхэшэн, 25 Шэваа бэшээшэ, Цадоок болон Абиатаар санаартад, 26 мүн Яһиир хотын Ираа Давидай санаартан байгаа.