‏ 2 Samuel 22

(Псал 17:1-51)

1Давидые Саулһаа болон бүхы дайсадһаань Эзэнэй абархада, тэрэ энэ дууе Эзэндэ зорюулан дуулаба: 2– Тэрэ иигэжэ хэлээ:
Эзэн хадаа минии хабсагай,
3минии хорохо газар, абарагша Бурхамни,
хамгаалагша хадамни, минии бамбай,
абаралай ууламни, бүхэлэлтэмни.
Тэрэ минии Абарагша,
балмад шэрүүнһээ намайе хамгаалаа.
4Магтаал хүндэтэй Эзэниие дуудахадаа,
дайсадһаа абарагданаб.
5Үхэлэй аргамжанууд намайе хүлибэ,
хосоролтын урасхалнууд намайе айлгаба.
6Үхэлэй ороной утаһад намайе тойруулан бообо,
үхэлтэ урьханууд урдамни байна.
7Зоболондоо би Эзэниие дууданаб,
Өөрын Бурханда хандан хашхарнаб,
Тэрэ Өөрын һүмэһөө хоолойем дуулаба,
хашхараамни һонортонь хүрэбэ.
8Тэрэнэй уур сухалһаа
газар доһолон шэшэрбэ,
огторгойн һууринууд хүдэлбэ.
9Хамарһаань утаан гаража,
аманһаань гал дүрэлзэжэ,
аһажа байгаа нүүрһэн хажуугаарнь сэсэрэн байгаа бэлэй.
10Тэрэ огторгойе хэлтылгээд доошоо бууба,
хүл доронь – шэб харанхы.
11Херүүбые хүлэглөөд ниидэбэ,
һалхинай жэгүүр дээрэ элин халиба.
12Харанхые Тэрэ Өөрын нэмэргэ болгобо,
огторгойн хара үүлые, уһанай харанхые
Өөрыгөө тойруулан хүшэгэ болгобо.
13Тэрэнэй урда тээхи гэгээн һаруулһаа
хара үүлэн, мүндэр болон галта нүүрһэн нүүжэ байгаа.
14Эзэн огторгойдо хүнхинэжэ,
Дээдэ Бурхан дуугаа үгэбэ.
15Годлинуудые харбажа, дайсадые сасан бутаргааба,
сахилгаа сахилуулжа, бута сохибо.
16Эзэнэй дуу хоолойһоо,
уур сухалта амисхаалһаа
уһанай эхин үзэгдэбэ,
газарай һууринууд эли гараба.
17Тэрэ дээрэһээ гараа һунгажа, намайе абаба,
гүн уһанһаа намайе татажа гаргаба.
18Намайе хүсэтэ дайсанһаамни,
намһаа хүсэтэй, намайе үзэн ядагша дайсадһаа абараа.
19Гай тодхорто үдэртэмни тэдэ нам руу добтолоо,
теэд Эзэн минии түшэг тулга байгаал!
20Тэрэ намайе уужам газарта абаашаа,
намда эльгэтэй ушарһаа намайе абараа.
21Зүб шударга байһанайм түлөө,
муу юумэ хээгүй байһандам
Эзэн намайе урмашуулаа.
22Юуб гэбэл, Эзэнэй замһаа хадуураагүй,
өөрын Бурханһаа буруу харан, мууе хээгүйм түлөө.
23Тэрэнэй бүхы тогтоолнууд урдамни,
хуулинуудһаань, юрэдөө, буруу хараагүйб.
24Урдань би гэмгүй арюун байгааб,
гэм зэмэһээ бэеэ холо абан ябааб.
25Зүб шударга байһанайм түлөө,
урдань муу юумэ хээгүй байһандам
Эзэн намайе урмашуулаа.

26Үнэн сэхэ зондоо Та үнэн сэхэт,
түгэлдэр түгэс зондо Та түгэлдэрта.
27Сэхэ сэбэр зондоо Та сэхэ сэбэрээр ханданат,
мэхэтэй хүниие мэхынь хэмээр мэхэлнэт.
28Дарлалтада байгаашадые абарнат,
бардам зониие харасаараа мүхөөнэт!
29Эзэн, Та болбол минии гэрэл;
Эзэн минии харанхые гэрэлтүүлнэ.
30Тантай хамта дайсадые хюданаб,
Бурхантаяа хамта хана дабанаб.
31Бурханай замынь залан арюун,
үгэнүүдынь арюун сэбэр.
Өөртэнь этигэдэг бүхы зондо Тэрэ бамбай болодог.
32Эзэнһээ бэшэ Бурхан байхагүй.
Манай Бурханһаа ондоо
Аршалалта байхагүй.
33Бурхан намда хүсэ нэмээнэ,
зүб харгыда гаргана.
34Хүлыем бугын хүлдэл адли болгоо,
үндэр газарта зогсохо шанар үршөөгөө.
35Гарнуудым дайнда дадхаана,
гуулин һурша ном хамаагүй татахаб!
36Та намда абаралай бамбай үгөөт,
энэрэлтнай намайе дээшэнь үргэнэ.
37Алхамыем үргэдхөөт,
хүлнүүдни буруу гэшхэхэгүй!
38Дайсадаа намнан хүсэхэб,
усадхатараа бусахагүйб.
39Тэрэниие бута сохихоб, бэшэ бодохогүй,
хүл доромни гэшхэгдэхэ.
40Дайшалхы хүсэ намда үршөөгөөт,
урдаһаам тулагшадые ула дором унагаагаат.
41Намһаа тэрьедүүлэн, дайсадыем гүйлгөөт,
үзэн ядагшадаа усадхааб.
42Тэдэнэй туһа эрин хараашалхада, хэншье абараагүй,
Эзэниие дуудахадань, Тэрэ дуулаагүй.
43Газарай шорой тооһон мэтээр тэдэниие һагшааб,
гудамжын шорой мэтээр бажуугааб, дэбһээб.
44Арад түмэнэймни буһалгаанһаа намайе абараат,
бусад арадуудые ударидахаар намайе үлөөгөөт.
Урид минии мэдээгүй яһатан намда алба хэнэ.
45Хариин зон урдаһаам билдагуушална.
Дууламсаараал тэдэ захиралтым дүүргэнэ,
46Хариин улад зон зүрхөө алдажа,
хороһон газарһаа шэшэрэлдэн гарана.
47Эзэн амиды! Хабсагаймни магтагдаха болтогой!
Абаралайм Бурхан дээгүүр үргэгдэг лэ!
48Минии түлөө үһөөгөө абадаг,
арадуудые намда даруулдаг Бурхан,
49Та намайе дайсадһаам абараат,
намда эсэргүүсэгшэдһээ дээгүүр намайе табяат,
хэрзэгы зонһоо холодуулаат.
50Энээнэйтнай түлөө үндэһэтэдэй хоорондо
Таниие магтан дуулан байхаб,
Танай нэрэ алдарта магтаалнуудые дуулахаб, Эзэн!
51Өөрынгөө хаанда агууехэ илалта туйлуулнат,
шэлэгшэ хүн Давидтаа болон үри һадаһадтань
хэтэ мүнхэдөө хайра үршөөлөө үзүүлнэт!