‏ 2 Samuel 23

Давидай һүүлшын үгэнүүд

1Бурханай агууехэ болгоһон, Яковай Бурханай хаан болгон тоһолһон, Израильда ирагуу дуунуудые зохёогшо, Ишайн хүбүүн Давидай һүүлшын үгэнүүд энэ гэхэ: 2– Эзэнэй Һүлдэ намаар дамжуулан айладхана,
Тэрэнэй үгэ минии хэлэн дээрэ байна.
3Израилиин Бурхан айладхаһан юм,
Израилиин аршалагша намда үгүүлһэн юм:
«Бурханһаа айхые мэдэжэ,
үнэн зүбөөр зониие зонхилдог хаан
4наранай мандаха үглөөнэй гэрэл,
үүлэгүй сэлмэг үглөө,
бороогой удаа ногоо толотуулдаг наран мэтэ».
5Бүгэдые эмхидхэһэн, найдамтай,
хэтэ мүнхын хэлсээ Тэрэнэй намтай баталаа хадань,
минии гэр бүлэ Бурханай урда мүн тиимэ бэшэ аал?
Тэрэ минии уг удамые юрөөхэ.
Энэ хадаа минии хүсэһэн зүйл,
Бурхан тэрэниие заабол дүүргэхэ.
6Харин нүгэлтэй зон
улаан гараар барижа болохогүй
хадхууртай үбһэн мэтэ,
тиимэһээ хаягдана.
7Тэдэндэ хүрэхэ гэбэл,
түмэр жадаар гү, али ондоо түмэр зэбсэгээр хүрэхэ хэрэгтэй.
Тиигээд тэдэ тэндээл шатаагдаха ёһотой.

Давидай алдар суута сэрэгшэд

8Давидай алдар суута сэрэгшэдэй нэрэнүүд гэбэл, иимэ: гурбан мэдээжэ эрэшүүл сооһоо эгээл суутайнь Тахэмоон нютагай Ёшээб-Башшээбэт. Тэрэ найман зуун хүн тээшэ жадаа үргэжэ, нэгэ удаа бултыень һалгаагаа.

9Тэрэнэй удаа Ахоохой аша, Додоогой хүбүүн Эльазаар. Нэгэтэ тэрэ Давидтай хамта байхадаа үшөө хоёр сэрэгшэтэй хамтаран, тулалдахаяа сугларһан пилиштүүдые доромжолон, хабаа туршалсахаяа дуудаһан юм. Израильшууд тиихэдэ сухаряа бэлэй. 10Израильшууд тиихэдэ сухарижа байгаа, харин тэрэ зэһэжэ гараад, пилиштүүдые хюдахадаа, гарайнгаа хүдэлхөө болитор хюдаа. Эзэн тэрэ үдэр Израильда агууехэ илалта үршөөгөө һэн. Эльазаарай диилэһэнэй удаа израильшуудай ерэһэнэй ушар гэхэдэ, алагдаһан зоной зөөри гансал суглуулхын түлөө бэлэй.

11Тэрэнэй удаа Һараар нютагай Агээгэй хүбүүн Шаммаа. Улаан зарма тариһан Лээхии гэжэ нэгэ газарта пилиштүүд тулалдахаяа сугларһан байгаа. Сэрэг пилиштүүдһээ зугадаба. 12Тиихэдэнь Шаммаа тэрэ таряалангай дунда зогсон хамгаалжа, пилиштүүдые алаа. Иигэжэ Эзэн агууехэ илалта үршөөгөө бэлэй.

13Пилиштүүдэй бүлэг сэрэгэй Рэпаиимэй хүндыдэ байха үедэ, ургаса хуряаха сагай эхиндэ гушан удамаршын гурбаниинь Адуллаамай агы руу Давидта ерээ һэн. 14Давид тиихэдэ хэрэм соо, харин пилиштүүдэй бүлэг Бэтлэһээмдэ байгаа. 15Давид ундаа ехээр хүрөөд хэлэбэ:

– Бэтлэһээмэй гол үүдэнэй дэргэдэхи худагһаа хэн уһа асаржа уулгахаб?

16Тэдэ гурбан сэрэгшэ пилиштүүдэй хотон хүреэ нэбтэ гаража, Бэтлэһээмэй хаалгын дэргэдэхи худагһаа уһа удхажа, Давидта асараа бэлэй. Гэбэшье Давид уунгүй, Эзэндэ адхажа үргэбэ. 17Тиигээд тэрэ иигэжэ хэлээ:

– Эзэн, намайе хамгаалыт, би энээниие уужа шадахагүйб. Ами наһандаа аюултайгаар ябажа ерэһэн зоной шуһые ууха гэһэнтэй жэшээтэй бэшэ гү?

Эдэ гурбан алдар суутай сэрэгшэд энэ мэтын хэрэгүүдые хэдэг бэлэй.

18Цэруяагай хүбүүн, Ёһаабай дүү Абишай тэдэ гурбанай толгойлогшо байгаа. Тэрэ жадаар гурбан зуун хүниие алажа, тэдэ гурбантай хамта сууда гараһан гээшэ. 19Тэрэ гушанһаа эгээл алдартайнь байгаа, тиигээд тэдэнэй ноён болоо. Гэбэшье сэрэгэй гурбан жанжинай тоодо ороогүй.

20Кабцээлэй хүн, Ёядаагай хүбүүн Бэнайяа эрэлхэг зоригтой хүн бэлэй. Тэрэ олон баатарлиг үйлэ хэрэгүүдые хээ, Моһаабай арсалан мэтэ хүсэтэй хоёр сэрэгшые алаа. Мүн саһатай нэгэ үдэр уһа суглуулдаг нүхэн руу орожо, тэндэ арсалангые алаһан юм. 21Тэрэ баһа Египедэй нэгэ абарга эрые хюдаа бэлэй. Тэрэ египет хүн гартаа жадатай байгаа. Харин Бэнайяа һаба модотой ерэжэ, египет хүнэй гарһаа жадыень буляан абаад, тэрэ жадаарнь өөрыень алаа һэн. 22Ёядаагай хүбүүн Бэнайяа гэгшэ иимэрхүү баатаршалгануудые хэдэг бэлэй. Тэдэ гурбантай хамта тэрэ ехэ сууда гараа. 23Гушан зоной дунда тэрэ суурхабашье, тэдэ гурбан жанжинай тоодо ороогүй. Давид тэрэниие өөрын бэе хамгаалагшадай толгойлогшо болгоо һэн.

24Тэдэ гушан баатарнуудай дунда хэд байгааб гэбэл:

Ёһаабай дүү Асаһээл,

Бэтлэһээмһээ Додоогой хүбүүн Элханаан,

25Хароодһоо Шаммаа,

Хароодһоо Эликаа,

26Пэлээтһээ Хээлэц,

Тэкооһаһаа Иккээшэй хүбүүн Ираа,

27Анатоодһоо Абиээзэр,

Хушааһаа Мэбуннай,

28Ахоохһоо Цалмоон,

Нэтопааһаа Маһарай,

29Нэтопааһаа Баһанаагай хүбүүн Хээлэб,

Бэньямиинэй Гибаагай Рибай гэгшын хүбүүн Иттай,

30Пиратоонһоо Бэнайяа,

Нахалээ-Гааһашһаа Һиддай,

31Арабааһаа Абиалбоон,

Бархумһаа Азмаавэт,

32Шаһалбоонһоо Эльахбаа,

Яшээнэй хүбүүд, Ёнатаан,

33Һараарһаа Шаммаагай,

Арарһаа Шараарай хүбүүн Ахиһаам,

34Маһахааһаа Ахасбай гэгшын хүбүүн Элипээлэт,

Гилооһоо Ахитоопэлэй хүбүүн Элиаам,

35Кармээлһээ Хэцроо,

Араабһаа Паһарай,

36Цобааһаа Натаанай хүбүүн Игаал,

Гаадһаа Бании,

37Аммоонһоо Цээлэг,

Бээроот нютагай, Цэруяагай хүбүүн Ёһаабай дайнай зэбсэг үргэгшэ Нахрай,

38Итраа нютагай Ираа ба Гарээб,

39Урияа гэдэг хээт хүн.

Эдэ хадаа бултадаа гушан долоон эрэшүүл болоно.