2Sa 3 | BxrBBL2024 | STEP | Саулай гэр бүлын тала баригшадай, мүн Давидай тала баригшадай хоорондо удаан сагта хёморолдоон үргэлжэлбэ. Давид улам хүсэтэй боложо, харин Саулай гэр бүлын тала баригшад улам доройтожол байба.

‏ 2 Samuel 3

1 Саулай гэр бүлын тала баригшадай, мүн Давидай тала баригшадай хоорондо удаан сагта хёморолдоон үргэлжэлбэ. Давид улам хүсэтэй боложо, харин Саулай гэр бүлын тала баригшад улам доройтожол байба.

Хэброондо түрэһэн Давидай хүбүүд

2 Хэброондо Давид хүбүүдтэй болоо һэн. Ууган хүбүүниинь езрээлэй эхэнэр Ахинооһамһаа гараһан Амноон юм. 3 Удаадахи хүбүүниинь кармээл эхэнэрһээ, Набаалай һамган байһан Абигааһилһаа гараһан Хилааб. Гурбадахи хүбүүниинь Гэшүүрэй хаан Талмайн басаган Маһахаагай гаргаһан Абшалоом юм. 4 Дүрбэдэхи хүбүүниинь Хаггиит гэгшэһээ гараһан Адонияа, табадахи хүбүүниинь Абитаалһаа гараһан Шэпаатияа. 5 Зургаадахи хүбүүниинь Эглааһаа гараһан Итрэһаам болоно. Давидай эдэ зургаан хүбүүд Хэброондо түрэһэн намтартай.

Абнээр Давидтай хамтарба

6 Саулай гэр бүлые, мүн Давидай гэр бүлые дэмжэгшэдэй хоорондо хёморолдооной боложо байгаа зуура Абнээр Саулай гэр бүлэдэ бүри батажан, хүсэтэй боложол байба. 7 Саулда Рицпаа гэдэг бага һамган байһан байгаа. Тэрэ хадаа Айяа гэгшын үхин һэн. Иш-Боошэт Абнээрые зэмэлбэ:

– Юундэ ши минии эсэгын бага һамгантай унтаабши?

8 Абнээр Иш-Боошэдой хэлэһэн үгэдэ ехэ уурлажа, иигэжэ хэлэбэ:

– Намайе Иудын нохой гэжэ һанаа гүт? Би Саулай гэр бүлэдэ, тэрэнэй аха дүү болон нүхэдтэнь үнэн сэхэ байгааб, таниие Давидһаа абарааб. Харин та мүнөө тэрэ эмэһээ боложо, намайе зэмэлжэ байнат! 9 – 10 Хаан түрые Саулай гэр бүлэһөө шэлжүүлэн абаад, Давидые орон түрын нэгэ захаһаа нүгөө заха болотор, Даанһаа Бэһээр-Шээбэ хүрэтэр Израилиин болон Иудын хаан болгон табихаб гэжэ Эзэн Давидта тангариглаа бэлэй. Иигэжэ зэмэлжэ байгаа хадатнай, би энээниие бэелүүлхэб! Үгы һаам, Бурхан намайе шиидхүүжэн!

11 Тиихэдэнь Иш-Боошэт Абнээртэ нэгэшье үгэ хэлэхэеэ айгаа һэн.

12 Абнээр өөрынгөө зүгһөө элшэнэрые Давидта эльгээжэ:

– Хэн энэ газар орониие зонхилхоб? Намтай хэлсээ баталагты, тиихэдэтнай тан тээшэ бүхы Израилиие татажа, танда туһалхаб, – гэжэ хэлүүлбэ.

13 – Зай, һайн гээшэ. Би шамтай хэлсээ баталхаб, гансал нэгэ иимэ гуйлтатайб: намтай уулзахаяа ерэхэдээ Саулай басаган Михаалые абаад ерэ, – гэбэ Давид. 14 Тиигээд Давид Саулай хүбүүн Иш-Боошэдто элшэнэрые эльгээн:

– Михаал һамгыемни намда бусаагты. Би пилиштүүдэй зуун бэлгын арһаар тэрэниие абаа һэм, – гэжэ хэлүүлбэ. 15 Иш-Боошэт хүниие эльгээжэ, Михаалые үбгэнһөөнь, Лааһишай хүбүүн Палтиһээлһээ бусаан абаба. 16 Харин үбгэниинь һамгаяа уйлан дахажа, Бахуриим хүрэтэр ябаба. Абнээрэй тэрээндэ:

– Һөөргөө буса, – гэхэдэнь, тэрэ гэртээ бусаа бэлэй. 17 Абнээр Израилиин удамаршадта хандаба:

– Таанар Давидые өөһэдынгөө хаан болгохые үнинэй хүсэжэ байгаа бэлэйт. 18 Мүнөө энээнээ бэелүүлэгты. Юуб гэбэл, Эзэн Давид тушаа айладахадаа, «Өөрынгөө зараса Давидаар Би Өөрын арад түмэн Израилиие пилиштүүдэй ба хамаг дайсадайнь һабарһаа абаруулхаб» гэжэ айладхаа бэлэйл.

19 Абнээр мүн лэ бэньямииншуудта энээн тушаа хэлэбэ. Израилиин болон Бэньямиинэй обогой бүхы зоной хүсэһэн юумэ Давидта дуулгахаяа тэрэ Хэброон руу ошоо һэн.

20 Абнээр хорин хүниие дахуулан, Хэброондо байһан Давид руу ерэбэ. Абнээрэй ба тэрээнтэй хамта байһан зоной хүндэдэ Давид найр наада дэлгэбэ. 21 Абнээр Давидта хэлэбэ:

– Минии бодоод гаража, хамаг Израилиие, эзэн хаан, тандаа суглуулхыемни зүбшөөгыт. Тэдэ тантай хэлсээ баталжа, та һанаһаараа бүгэдые зонхилон, хаан түрэеэ ударидахат.

Давид Абнээрые табижа, тэрэ амгалан мэндэ гаража ошобо.

Абнээрэй үхэл тухай

22 Тииһээр Ёһааб түрүүтэй Давидай зон дээрмэдэлгэ добтолоонһоо ехэ олзотой бусан ерэбэ. Абнээр Давидтай хамта Хэброондо байгаагүй һааб даа, юуб гэбэл, Давидай тэрэниие табихадань, тэрэ амгалан гаража ошоһон байна ха юм. 23 Ёһаабай сэрэгтэеэ хамта бусажа ерэхэдэнь, зон тэрээндэ дуулгаба:

– Нээрэй хүбүүн Абнээрэй хаанда ерэхэдэ, хаан тэрэниие амиды мэндэ табяа.

24 Тиихэдэнь Ёһааб хааниие бараалхан:

– Та яанабта?! Абнээрэй танда ерэхэдэ юундэ табяабта?! 25 Нээрэй хүбүүн Абнээрые та мэдэнэ ха юмта. Тэрэ таниие мэхэлжэ, орохо гараха нүхэ һүбыетнай мэдэхэеэ, хэжэ байгаа бүхы юумыетнай ойлгохоёо ерэһэн байна ха юм, – гэбэ.

26 Ёһааб Давидай үргөөһөө гараад, Абнээрэй хойноһоо өөрын зониие эльгээжэ, тэдэнь тэрэниие Сираагай худагһаа бусаан асарба. Гэбэшье Давид энээн тушаа мэдээгүй. 27 Иигээд Абнээрэй Хэброондо асарагдахада, Ёһааб тэрээнтэй хүнгүйгөөр хөөрэлдэхэеэ бартаанууд тээшэ абаашаад, гэдэһэ руунь хадхажа алаба. Ёһаабай дүү Асаһээлые алаһанайнгаа түлөө иигэжэ Абнээр наһа бараа бэлэй.

Абнээр тушаа Давидай гашуудаһан тухай

28 Давид энээн тушаа һүүлдэнь дуулаад хэлэбэ:

– Нээрэй хүбүүн Абнээрэй гээгдэһэндэ би болон минии хаан түрэ Эзэнэй урда оройдоошье гэм зэмэгүйл. 29 Тэрэнэй шуһан Ёһаабай болон түрэл гаралайнь толгой дээрэ буухань болтогой! Венерическэ, һэлхэ үбшэнтэн, таяг тулаашад, һэлмээр сабшуулагшад, үлэн хооһон зон Ёһаабай уг удамһаа бү һалаг!

30 Асаһээл дүүень Гибэһоондохи тулалдаанда Абнээрэй алаһандань Ёһааб ба тэрэнэй дүү Абишай гэгшэ иигэжэ Абнээрые алаа бшуу.

31 Тиигээд Давид Ёһаабта, мүн бүхы сэрэгтэ хэлэбэ:

– Хубсаһаа урижа, гашуудалай хубсаһа үмдөөд, Абнээр тушаа гашуудан уйлагты.

Давид хаан өөрөө хуурсагай араһаа алхалаа. 32 Иигээд тэдэ Абнээрые Хэброондо хүдөөлүүлбэ. Хаан Абнээрэй хүүр дээрэ шангаар уйлажа, бүхы арад зоншье уйлалдаба. 33 Давид Абнээртэ зорюулан, гашуудалай иимэ дуу дуулаба: Мунхаг үхэлөөр Абнээр үхэхэ ёһогүйл байгаал даа.
34 Шинии гар хүлигдөөгүй,
шинии хүлшье тушагдаагүй бэлэйл.
Дээрмэшэдэй гарһаал ши унааш!

Бүхы зон тэрээн тушаа бүри ехээр бархиралдаба. 35 Удаань Давидые эдеэ хоол барихыень аргадахаяа зон үшөө үдэр байхада ерэбэ. Теэд Давид тангариглажа хэлэбэ:

– Хэрбээ наранай шэнгэтэр минии хилээмэ, үгышье һаа, ямар нэгэн хоол эдибэлни, Бурхан намайе хэһээхын ехээр хэһээг лэ!

36 Бүхы зон энээн тушаа мэдэжэ, хаанай хэһэн бүхы үйлэ хэрэгүүдэй тэдээндэ һайшаагдадагтал, энэнь мүн лэ тэдээндэ һайшаагдаба. 37 Иигэжэ Нээрэй хүбүүн Абнээрэй гээгдэһэндэ хаанай ямаршье хамаагүй байһые бүхы Иуда болон бүхы Израиль тэрэ үдэр ойлгоо һэн. 38 Удаань хаан зондоо соносхобо:

– Мүнөөдэр Израильда агууехэ сэрэгэй ноён болон удамаршын нүгшэһые таанад ойлгоно гүт? 39 Би хаан түрэдэ тоһоор түрхюулэн ёһолуулһаншье һаа, мүнөөдөө үшөөл хүсэгүйб, харин Цэруяагай хүбүүд угаа хэрзэгы хатуу. Эзэн мууе үйлэдэгшэдэ хэһэн хэмээрнь тэрэнииень амасуулхань болтогой!