2Sa 4 | BxrBBL2024 | STEP | Абнээрэй Хэброондо наһа бараһан тухай Саулай хүбүүн Иш-Боошэт дуулажа, зоригынь мохобо, бүхы Израильшье һүрдэбэ.

‏ 2 Samuel 4

Иш-Боошэдой үхэл

1 Абнээрэй Хэброондо наһа бараһан тухай Саулай хүбүүн Иш-Боошэт дуулажа, зоригынь мохобо, бүхы Израильшье һүрдэбэ. 2 Саулай хүбүүн Иш-Боошэдто сэрэгэй бүлэгүүдэй хоёр ударидагша бии һэн. Нэгэнэйнь нэрэ Баһанаа, нүгөөдэнэйнь нэрэ Рэхааб бэлэй. Тэдэ хоюулаа Бэньямиинэй обогһоо уг гарбалтай, Бээроодой хүн Риммооной хүбүүд һэн. (Бээроот хадаа Бэньямиинэй нэгэ хото гээд тоологдодог бэлэй. 3 Теэд Бээроодой зон Гиттааһим руу тэрьедэжэ, мүнөө болотор тэндэ ерүүл зон гэлсүүлэн ажаһуудаг.)

4 Саулай хүбүүн Ёнатаан Мэпибоошэт гэжэ нэрэтэй хүбүүтэй һэн. Тэрэ хүл муутай бэлэй. Таба наһатай байхадань, Саулай болон Ёнатаанай гээгдэһэн тухай мэдээсэл Езрээлһээ ерэжэ, тэрэниие харууһалагша эхэнэр тэбэрин тэрьедэхэдээ, яаража, үхибүү унагаажа, тэрэ дохолон болошоо һэн.

5 Бээроот хотын Риммооной хүбүүд Рэхааб ба Баһанаагай үдын халуунаар Иш-Боошэдой гэртэ ерэхэдэнь, тэрэ үдын халуунһаа амаржа байба. 6 Гэрэй үүдэнэй хажууда орооһо илгажа байгша эхэнэр дууража унташаһан байгаа, тиимэһээ Рэхааб ба Баһанаае харабагүй. 7 Гэртэ тэдэнэй ороходонь, Иш-Боошэт нойрсодог таһалгадаа орон дээрээ хэбтэжэ байгаа ха. Тэрэниие тэдэ алажа, толгойень отолон абаад, нюруу газараар бүхэли һүниндөө ябан ошобо. 8 Тиигээд тэдэ Иш-Боошэдой толгойе Хэброондо байһан Давидта асараад, хаанда хэлэбэ:

– Харагты, энэ хадаа танай ами наһанда харша байһан дайсан Саулай хүбүүн Иш-Боошэдой толгой. Эзэн хаамнай, Эзэн мүнөөдэр Саулай болон тэрэнэй уг удамһаа танай түлөө үһөөгөө абхуулаа.

9 Бээроот хотын Риммооной хүбүүд Рэхааб ба Баһанаада Давид харюусаба:

– Намайе элдэб тодхорһоо абаржа байһан Эзэнэй урда тангаригланаб. 10 Нэгэ хүн намда «Харыта, Саул гээгдээ» гэжэ мэдээсээд, өөрыгөө һайн мэдээ асарааб гэжэ бодожо байхадань, би шагнал үгэхын орондо тэрэниие баряад, Циклаагта усадхаа һэм. 11 Харин мүнөө харатай муу зоной гэмгүй хүниие гэртэнь, өөрынь орон дээрэ алаад байхада, би тэрээнэйнь түлөө тэдэниие харюусалгада татахаб! Таанадые газарай хүрьһэнһөө аршажа хаяхаб!

12 Давид захиржа, сэрэгшэдынь тэдэниие алажа, гар, хүлыень сабшаад, Хэброондо, сөөрэмэй хажууда үлгэбэ. Иш-Боошэдой толгойе тэдэ абажа, Хэброондо, Абнээрэй агы нүхэн хуурсаг соо хүдөөлүүлбэ.