‏ 2 Samuel 10

(1 Уг 19:1-19)

1Нэгэ хэды сагай үнгэрһэнэй удаа аммоонуудай хаан наһа бараба. Тэрэнэй орондо Хануун хүбүүниинь хаан шэрээдэ һууба ха. 2Тиихэдэнь Давид:

– Эсэгынь намда үршөөл хайра үзүүлһэндэл би Наһаашай хүбүүн Хануунда тиимэ хайра үзүүлхэ юм байна, – гэжэ хэлээд, эсэгэ тухайнь шаналһанаа элирхэйлхэеэ өөрынгөө зарасанарые тэрээндэ эльгээбэ. Давидай зарасанарай аммоонуудай газар руу ерэхэдэнь, 3аммоонуудай ноёд өөрынгөө хаан Хануунда иигэжэ хэлэбэ:

– Давид танда шаналалаа мэдүүлхэеэ зониие эльгээхэдээ эсэгытнай хүндэлһэндөө эльгээгээ гэжэ һанаа гүт? Үгы даа, энэ хотые тагнан хаража һандаргаахаяа Давид тан руу зоноо эльгээгээ.

4Тиихэдэнь Хануун Давидай зониие барижа, хүн бүхэнэйнь һахалай хахадые хюһаад, хубсаһыень ташаа хүрэтэрынь шуулажа таһалаад, һөөргэнь табиба ха. 5Энээн тушаа Давид дуулажа, тэдэ зонойнгоо урдаһаа хүнүүдые эльгээн, һахалайнгаа ургатар Ерихоондо байхыень, тиигээд һүүлдэнь бусахыень захиба. Ушар юуб гэхэдэ, тэдэ зон угаа доромжологдоод байгаа шуу.

6Аммоонууд Давидай дайсад болоһоноо ойлгожо, Бэт-Рэһообой болон Цобаагай араамшуудта хандан, хорин мянган ябаган сэрэг, Тообһоо арбан хоёр мянган эрэшүүлые, Маһахаагай хааниие нэгэ мянган хүнтэйнь хүлһэлэн абаба. 7Давид энээниие дуулаад, Ёһаабые эгээл эрэлхэг сэрэгтэйнь хамта урдаһаань эльгээбэ ха. 8Аммоонууд гаража ерээд, өөрынгөө гол хото Раббаагай бартаануудай дэргэдэ байлдаанай жагсаалаар зогсобо. Цобаа болон Рэһообой араамшууд, мүн Тооб болон Маһахаагай зон амяараа талада тогтобо.

9Хоёр газарта тулалдаха хэрэгтэйе Ёһааб хараад, Израилиин бүхы шэлдэг эрэшүүлые шэлэн, араамшуудай урдаһаа табиба. 10Харин үлэһэн зоноо аммоонуудай урда жагсаахые тэрэ өөрын дүү Абишай гэгшэдэ даалгаба. 11Ёһааб иигэжэ хэлэбэ:

– Хэрбээ араамшуудай намһаа үлүү хүсэтэй байгаа һаань, ши намда туһалхаш. Харин аммоонуудай шамһаа хүсэтэй байгаа хадань, би шамда туһалхаяа ерэхэб. 12Зоригтой бай! Арад түмэнэйнгөө түлөө, Бурханайнгаа хотонуудай түлөө эрэлхэг шангаар зогсоё. Эзэн хэхэ юумэеэ үйлэдэхэнь болтогой!

13Иигэжэ Ёһаабай болон тэрээнтэй хамта байһан сэрэг араамшуудтай тулалдаба, араамшууд зугадаба. 14Аммоонууд араамшуудай зугадахые хараад, өөһэдөө Абишайһаа зугадажа, хото руугаа оробо ха. Тиигээд Ёһааб аммоонуудта дайсахаяа болижо, Иерусалим руу ерэбэ.

15Араамшууд Израильда диилдэһэнээ хараад, өөһэдынгөө бусад зониие суглуулба. 16Һадаад-Ээзэр хүнүүдые эльгээн, Евфрат мүрэнэй саада эрьедэ байһан араамшуудые асаруулба ха. Тэдэнь Хэлаамда ерэбэ. Һадаад-Ээзэрэй сэрэгэй жанжин Шобаах тэдэниие ударидан ябаа. 17Энээн тушаа Давидта мэдээжэ боложо, тэрэ бүхы Израилиие суглуулан, Иорданиие гаталжа, Хэлаам руу ерэбэ. Араамшууд Давидай урдаһаа тулалдахаяа жагсаа. Байлдаан боложо, 18араамшууд израильшуудһаа тэрьедэбэ. Давид тэдэнэй долоон зуун дайшалхы тэргэтэ сэрэг, дүшэн мянган морито сэрэг хюдажа, сэрэгэй жанжин Шобаахые шархатуулхадань, тэрэ тэндээ хосорбо. 19Һадаад-Ээзэрэй мэдэлдэ байгаа бүхы хаашуул Израильда илагдаһанаа ойлгожо, Израилиин эрхэдэ орожо, энхэ тайбан ажаһууха тухай хэлсээ баталба. Араамшууд энээнһээ хойшо аммоонуудта туһалхаяа айдаг болоо һэн.
Copyright information for BxrBBL2024