‏ 2 Samuel 13

(1 Уг 20:1-3)

Амноон ба Тамаар

1Удаань иимэ юумэн болобо. Давидай хүбүүн Абшалоом Тамаар нэрэтэй, сэбэр һайхан дүү басагантай байгаа. Давидай нүгөөдэ һамганайнь хүбүүн Амноон тэрээндэ дурлаба ха. 2Амноон үбшэлтэрөө Тамаар тухай һанаан үнөөн болодог болобо. Тамаар басаган үшөө байгаа, тиимэһээ тэрээндэ яажа дүтэлхэеэ тэрэ бэрхэшээжэ байба. 3Тэрэ нэгэ нүхэртэй һэн. Тэрэнь Давидай аха Шимаагай хүбүүн Ёнадааб бэлэй. Ёнадааб ехэ мэхэтэй байгаа. 4Тэрэ Амноондо хэлэбэ:

– Хаанай хүбүүн байгаад, юундэ ши үдэрһөө үдэртэ туранхай боложол байнабши? Намда хэлэхэгүй юм гүш?

Амноон тэрээндэ харюусаба:

– Абшалоом ахынгаа дүү басаган Тамаарта дурлашооб.

5Тиихэдэнь Ёнадааб тэрээндэ иимэ юумэ дурадхаба:

– Орондоо хэбтэжэ, үбшэлһэн мэтэ хэбэр үзүүлэ. Эсэгынгээ шамайе эрьехэеэ ерэхэдэнь, тэрээндэ «Дүү басаган Тамаарые ерүүлжэ, минии хараһаар байтар эдеэ хоол намда бэлдүүлыт. Тамаарай гарһаа эдеэ барихаб» гэжэ хэлэ.

6Иигэжэ Амноон хэбтэжэ, үбшэлһэн мэтэ хэбэр үзүүлбэ.

Хаан тэрэниие эрьехэеэ ерэбэ. Амноон эсэгэдээ хэлэбэ:

– Дүү басаган Тамаарые ерүүлжэ, минии хараһаар байтар намда хэдэн бообо хүүлыт, намда тэрэнэй гарһаа эдихыем зүбшөөгыт.

7Тиихэдэнь хаан Тамаарай гэр руу хүниие ябуулжа:

– Амноон ахынгаа гэртэ ошожо, тэрээндэ эдеэ хоол хэжэ үгэ, – гэжэ хэлэхыень захяа һэн. 8Иигэжэ Тамаар Амноон ахынгаа гэртэ ерэбэ. Тэрэ хэбтэжэ байгаа. Тамаар талха абажа зуураад, хараһаар байтарнь бообо хэжэ, шанаба. 9Тэрэ тогоогоо абажа, эдеэ урдань табиба. Теэд Амноон эдихэеэ арсаба. Амноон иигэжэ хэлэбэ:

– Бултадаа эндэһээ гараг.

Бүхы зон тэндэһээ гараба. 10Тиихэдэнь Амноон Тамаарта хэлэбэ ха:

– Эдеэе унталгын таһалга руу абааша, би шинии гарһаа эдихэб.

Тамаар хэһэн бообонуудаа Амноон ахынгаа унталгын таһалга руу абаашаба. 11Урдань табихадань, Амноон тэрэниие саб тэбэреэд:

– Намтай хэбтэ, – гээ бэлэй. 12Теэд Тамаар тэрээндэ хэлэбэ:

– Үгы, ахай, тиигэжэ болохогүй. Намайе бү доромжологты. Израильда иимэ юумэ хэдэггүй бшуу. Иимэ муухай юумэ бү хэгты. 13Бишье иигэжэ бузарлагдаад хайшаа ошохобиб? Ташье Израильда ухаагүй зоной нэгэн мэтэ тоологдодог болохот. Хаантай хөөрэлдыт даа. Тэрэ намайе танда үгэхэеэ арсахагүй байха.

14Теэд Амноон тэрэнэй үгые дуулабагүй. Үлүү хүсэтэй байһан тула тэрэниие хүсөөр эдлэбэ.

15Удаань Амноон тэрэниие угаа ехээр үзэн ядажа эхилбэ. Тэрэ үээн ядалгань тэрээндэ дуратайһаа булюу ехэ байгаа бэлэй. Амноон тэрээндэ хандаба:

– Бодоод, тонило!

16Харин Тамаарай тэрээндэ:

– Үгы. Намайе үлдэхэ гээшэ танай намда хэһэн муу хэрэгһээ бүри муу юумэн, – гэжэ хэлэбэшье, тэрэ үгыень дуулабагүй. 17Тиигээд Амноон залуу зарасаяа дуудан, иигэжэ захирба:

– Энээниие намһаа үлдэжэ гаргаад, үүдээ шэбхэдэ.

Амнооной зараса захиралтыень дүүргээ һэн. 18Тамаар үнгэтэ ута хубсаһа үмдэнхэй бэлэй. Хаанай хадамда гараадүй басагад иимэ хубсаһа үмдэдэг байгаа. 19Тамаар толгой дээрээ үнэһэ адхан, үнгэтэ хубсаһаяа урижа, нюураа гараараа бүглэн, шангаар уйлан ябаба. 20Тэрэнэй аха Абшалоом:

– Амноон ахашни шамтай хамта байгаа гү? Дүүхэймни, мүнөө дуугүй байгыш даа. Тэрэ шинии аха бшуу даа. Энээниие зүрхэ сэдьхэлдээ хадагалжа бү бай, – гэбэ. Иигэжэ Тамаар Абшалоом ахынгаа гэртэ һүр һүлдэгүй, гансаардан ажаһуугаа бэлэй.

21Давид хаан эдэ бүхы хэрэг тушаа дуулаад, ехэ уурлаба. 22Харин Абшалоом Амноондо һайн, муушье юумэ хэлээгүй. Дүү басаган Тамаарые хүсөөр эдлэһэндэнь тэрэ Амнооные үзэн ядадаг болоо һэн.

Абшалоом үһөөгөө абана

23Тэрээнһээ хойшо хоёр жэл үнгэрөө. Абшалоом Эпрааим хотын хажуудахи Бааһал-Хацоорто хонидой нооһо хайшалалгын баяр хэжэ, хаанай бүхы хүбүүдые уриба. 24Абшалоом хааниие бараалхан, иигэжэ уриба:

– Танай богоол болохо би хонидой нооһо хиргаха баяр хэжэ байнаб. Та түшэмэлнүүдтэйгээ хамта ерэжэ, баяр ёһололдо хабаадыт.

25Теэд хаан Абшалоомдо харюусаба:

– Үгы даа, хүбүүмни, маанадай булта ябаһанай хэрэггүй. Шамда дарамта болохобди.

Хэдышье Абшалоомой гуйгаа хадань, хаан ошобогүй, харин тэрэниие юрөөбэ. 26Тиихэдэнь Абшалоом иигэжэ хэлэбэ:

– Тиигэбэл, минии аха Амноон бидэнтэй хамта ошог лэ.

– Юундэ тэрэ шамтай ошохо юм? – гэжэ хаан асууба. 27Гэбэшье Абшалоомой гуйхадань, Амнооные болон өөрынгөө бүхы хүбүүдые тэрээнтэй хамта тэрэ ябуулба.

28Абшалоом зарасанартаа захирба:

– Анхарагты! Амнооной үзэмэй дараһан архи уужа, хүхижэ эхилхэдэнь, би таанарта «Амнооные хюдагты» гэхэб. Тиихэдэм тэрэниие алагты. Бү айгты. Би өөрөө таанарта захиржа байна ха юмбиб. Бү айгты, зоригтой байгты!

29Абшалоомой зарасанар захирһанайнь ёһоор Амнооные алаба. Тиихэдэнь хаанай бүхы хүбүүд өөр өөрынгөө луус унаад, тэрьедэбэ.

30Тэдэнэй үшөө аян замдаа ябажа байха үедэ Давидта иимэ мэдээн дуулдаба:

– Абшалоом хаанай бүхы хүбүүдые алаа, хэнииньшье амиды үлөөгүй.

31Тиихэдэнь хаан бодожо, хубсаһаа урин, газарта унаа бэлэй. Тэрэнэй хажууда байһан бүхы зарасанарынь мүн лэ хубсаһаяа уриба. 32Теэд Давидай аха Шимаагай хүбүүн Ёнадааб иигэжэ хэлэбэ:

– Хаанай хүбүүд бултадаа алуулба гэжэ та бү һанагты. Амноон лэ алуулаа. Ушар юуб гэхэдэ, дүү басаган Тамаарыень Амнооной доромжолһон үдэрһөө хойшо Абшалоом иимэ һанаатай байгаа. 33Тиимэһээ одоо «Хаанай бүхы хүбүүд алуулба» гэжэ һанаата боложо бү байгты, эзэн хаамни. Гансал Амноон гээгдээ.

34Абшалоом тиигэһээр байтар тэрьедээ бэлэй.

Тэрэ үедэ харуулшан хүбүүнэй обёорходо, хадын ташалангаар олон зон буужа ябаба. Тэрэ хаанда энээн тушаа дуулгаба. 35Ёнадааб хаанда иигэжэ хэлэбэ:

– Харагты, эдэ танай хүбүүд ерэжэ ябана. Минии хэлэһэнэй ёһоор лэ болобо.

36Тэрэнэй дуугарамсаарнь лэ хаанай хүбүүд ерэжэ, шанга гэгшээр уйлалдаба. Хаан болон тэрэнэй бүхы түшэмэлнүүдшье мүн лэ шангаар бархиралдаа бэлэй.

37– 38Абшалоом тэрьедэн, Гэшүүрэй хаан, Аммиһүүдэй хүбүүн Талмай руу ошоо һэн. Тэрэ тэндэ гурбан жэлэй туршада байгаа. Давид Амноон хүбүүнэйнгөө хойноһоо үни удаан сагта гашуудабашье, 39гашуудахаяа болижо, уур сухалынь бууража, Абшалоомой хойноһоо мүрдэн гарабагүй.