‏ 2 Samuel 24

(1 Уг 21:1-7)

1Эзэн дахин Израильда уурлан хилэнтэжэ, Давидые арад зоной урдаһаа идхан баадхаба:

– Ябаад, Израилиин болон Иудын улад зоной тоо бүридхэгты.

2Иигэжэ хаан сэрэгэйнгээ жанжин Ёһаабта захирба:

– Даанһаа Бэһээр-Шээбэ хүрэтэр Израилиин бүхы обогуудаар ябажа, зоной тоо бүридхэгты. Би тэдэнэй хэды байһые мэдэхэеэ һананаб.

3– Танай Эзэн Бурхан Израилиин арад зониие зуу дахин олошоруулхань болтогой! Үндэр түрэлтэ хаан энээниие өөрынгөө нюдөөр үзэхэнь болтогой! Гэбэшье та юундэ энээниие хэхэеэ һананабта? – гэжэ Ёһааб асууба ха. 4Яаба-хээбэшье, Ёһааб ба сэрэгэй ударидагшад хаанай захиралта дүүргэхэ баатай болоо һэн. Тэдэ хаанһаа гаража, Израилиин арад түмэниие тоолохоёо ошоо бэлэй.

5Тиигээд тэдэ Иордан голые гаталан, Ароһээрэй урда таладань тогтобо. Тэрэ хото голой хүндын дунда, Гаадай газар дээрэ оршодог бэлэй. Тэндэһээ тэдэ хойшолон, Язээр тээшэ, 6мүн Галаад ба Тахтим-Ходши нютагуудаар ябаба. Удаань тэдэ Даан-Яһаан руу ерэбэ, Сидоониие тойробо. 7Тиигээд тэдэ урда зүг руу, Тиирэй бүхэлэгдэһэн хотонуудта хүрэбэ, хиивүүдэй болон ханаһаануудай бүхы хотонуудаар ябаба. Тэндэһээ Иудын урда зүгтэ байдаг Бэһээр-Шээбэдэ ерэжэ, тоо бүридхэлые дүүргэбэ. 8Иигэжэ тэдэ бүхы нютагуудаар ябажа, юһэн һара, хорин хоногой удаа Иерусалимда бусажа ерээ һэн. 9Тиигээд Ёһааб уласай хүн зониие тоолон бүридхэһэн данса хаанда үгэбэ. Дайн дажарта ябажа шадаха найман зуун мянган эрэшүүл Израильда, табан зуун мянган хүн Иудада байба.

Эзэнэй хэһээлтэ

10Арад түмэниие тоолоһоной удаа Давид шаналжа, Эзэндэ иигэжэ зальбарба:

– Би энэ юумэ хэжэ, ехэ нүгэл үйлэдэбэб. Эзэн, Өөрынгөө зарасын нүгэлые хүлисыт гэжэ мүнөө гуйнаб. Би ухаагүй юумэ хээб.

11Үглөө үглөөгүүр, Давидай бодоод байхада, Эзэн лүндэншэ, Давидай мэдэлшэн Гаадта иигэжэ дуулга гэбэ:

12– Давидта ошоод иигэжэ хэлэ: «Би шамда гурбан хэһээлтэ дурадханам; ши тэдэнэй нэгыень шэлэхэш, тиигээд тэрэниие шамда эльгээхэб», – гэжэ Эзэн дамжуулна.

13Гаад Давид руу ошожо, асууба:

– Юу шэлэхэбта? Орон нютагтатнай гурбан жэл үлэсхэлэн хооһон байдал тохёолдог гү? Үгы һаа, дайсадтнай таниие мүрдэн мүшхэжэ, та тэдээнһээ гурбан һарын туршада тэрьедэн байха гүт? Үгышье һаа, орон нютагтатнай гурбан үдэрэй туршада тахал үбшэн дэлгэрхэнь гү? Энээн тушаа бодоод, намайе эльгээһэн Бурханда минии ямар харюу бусаахые хэлээрэйгты.

14Давид Гаадта харюусаба:

– Ехэ гай тодхорто би орооб. Би зонһоо хэһээлтэ амасахаяа һананагүйб. Эзэнэй үршөөл хайра агууехэ, тиимэһээ Тэрэ Өөрөө маанадта хэһээлтэ шэлэг лэ даа.

15Тиигэжэ Эзэн тэрэ үглөөнһөө эхилэн, тогтооһон саг болзор хүрэтэр Израильда тахал үбшэн тараажа, Даанһаа Бэһээр-Шээбэ хүрэтэр, орон нютагай нэгэ захаһаа нүгөө заха хүрэтэр далан мянган зон наһа бараба. 16Бурханай Эльгээмэлэй Иерусалимые усадхахаяа һанахадань, Эзэн гай гасалан тушаа шаналан, зониие һалгаажа байһан Эльгээмэлдэ:

– Хүрөө! Боли! – гэжэ захирба. Эзэнэй Эльгээмэл тэрэ үедэ евүүс хүн Арунаагай гүмнөө дээрэ байгаа.

Давид Арунаагай гүмнөө худалдажа абаба

17Арад зониие усадхажа байһан Эльгээмэлые хараад, Давид Эзэндэ зальбарба:

– Нүгэл үйлэдэн, буруу зүйл хэһэн хүн бил гээшэб. Харин эдэ зон хонид мэтэ, ямар муу юумэ хээ юм? Та намайе болон минии гэр бүлые хэһээгыт.

18Тэрэ үдэр Гаад Давидта ерэжэ, иигэжэ хэлэбэ:

– Ябажа, евүүс хүн Арунаагай гүмнөө дээрэ Эзэндэ зорюулжа, үргэлэй шэрээ бодхоогты.

19Давид Эзэнэй захиралта дүүргэжэ, Гаадай хэлэһээр тиишээ ошобо. 20Арунаа доошоо харахадаа, хаанай түшэмэлнүүдтэеэ хамта тэрээн тээшэ үгсэн ерэжэ ябахые обёорбо. Тэрэ гаража ерээд, газар хүрэтэр хаанда мүргэбэ. 21Тиигээд Арунаагай:

– Үндэр түрэлтэ хаан, та ямар ушар болоод, намда ерэбэт? – гэжэ асуухадань, Давид:

– Зонһоо гай гасалан һалгаахын тула шинии гүмнөө худалдажа абаад, Эзэндэ үргэлэй шэрээ бодхоохо һанаатайб, – гэжэ хэлэбэ. 22Арунаа Давидта:

– Үндэр түрэлтэ хаан! Хэрэгтэй юумэеэ бултыень абажа үргэгты. Харагты, эндэ түгэс шатаалта үргэлдэ хэрэгтэй эбэртэ бодо мал байна. Түлеэндэ гэжэ үхэрэй хөөмэгшэнүүд, таряа үйрүүлдэг хабтанууд бии. 23Эдэ бүгэдые би, Арунаа, танда баринаб, – гэжэ хэлээд, нэмэн:

– Эзэн Бурхантнай танай үргэлые тогтоохонь болтогой! – гэбэ. 24Харин хаан Арунаада иигэжэ хэлэбэ:

– Үгы, би заабол үнэ сэнгээрнь шамһаа худалдажа абахаб. Юуб гэхэдэ, би үныень түлөөгүй зүйлөөр Эзэн Бурхандаа түгэс шатаалта үргэл үргэхэгүйб.

Тиигээд Давид гүмнөө болон эбэртэ бодо мал табин шээкэл мүнгөөр худалдан абаба. 25Иигээд Давид тэндэ Эзэндэ үргэлэй шэрээ барижа, түгэс шатаалта болон амгалан байдалай түлөө үргэлнүүдые үргэбэ. Иигэжэ Эзэн энэ уласай зальбархые соносон, тахал үбшэн Израильһаа татагдан һалаа һэн.