2Sa 8 | BxrBBL2024 | STEP | Тэрэнэй удаа Давид пилиштүүдые илажа, номгоруулба. Тэрэ Мэтээг-Һаһаммаа хотые тэдээнһээ буляан абаба.

‏ 2 Samuel 8

(1 Уг 18:1-17; 2 Хаан 20:23-26)

1 Тэрэнэй удаа Давид пилиштүүдые илажа, номгоруулба. Тэрэ Мэтээг-Һаһаммаа хотые тэдээнһээ буляан абаба.

2 Давид моһаабуудые бута сохибо. Тэрэ тэдэниие газар дээрэ хэбтүүлээд, аргамжаар хэмжэбэ. Гурбанайнь хоёр хубиие алаба, нэгэ хубииень амиды үлөөбэ. Моһаабшууд Давидай засаг мэдэржэ, ясаг түлэдэг болобо.

3 Цобаагай хаан, Һадаад-Ээзэрэй хүбүүн Рэһооб Евфрат мүрэнэй нюруугаар өөрынгөө засаг түрые батадхаяа ошожо ябаа. Давид тэрэниие бута сохибо. 4 Давид нэгэ мянга долоон зуун морин сэрэг, хорин мянган ябаган сэрэг олзолон абаба. Тэргын моридойнь шүрбэһые тэрэ отолбо, харин зуун тэргэдэ хүрэхөөр моридые мэндэ үлөөгөө һэн.

5 Цобаагай хаан Һадаад-Ээзэртэ туһалхаяа Дамааскын араамшуудай ерэхэдэнь, Давид хорин хоёр мянгыень алаба. 6 Тиигээд Дамааскын араамшуудые зонхилхо өөрын сэрэг ноёдые дээрэнь табиба, араамшууд богоолынь боложо, ясаг түлэдэг болоо һэн. Давидай ябаһан газар бүхэндэнь Эзэн туһалжа байгаа. 7 Һадаад-Ээзэрэй зоной алтан номо һаадагуудые Давид буляан абажа, Иерусалим руу асарба. 8 Һадаад-Ээзэрэй хотонууд болохо Бээтах болон Бэротайһаа Давид хаан угаа ехэ гуулин түмэр мүн лэ дээрмэдэн абаа һэн.

9 Һадаад-Ээзэрэй хамаг сэрэгые Давидай бута сохиһон тухай Хамаадай хаан Той гэгшэ дуулаад, 10 тэрэниие мэндэшэлхын, һайе хүргэхын тула Ёраам хүбүүгээ эльгээбэ. Ушарынь хадаа Һадаад-Ээзэр Тойтой ходо дайлалдажа байгаа бшуу. Ёраам ерэхэдээ, алтан, мүнгэн, гуулин эд зүйлнүүдые асарба. 11 Давид хаан диилэгшэ бүхы уласуудһаа абаһан алта, мүнгэнтэй хамта тэрээнииеньшье Эзэндэ зорюулба. 12 Тэдэ ямар уласуудһааб бэ гэхэдэ, эдоом, моһааб, аммоон, пилишт, амалээг, мүн Цобаагай хаан Рэһообой Һадаад-Ээзэр хүбүүнһээ олзолон абаһан зөөри болоно.

13 Давид Дабһата хүндыдэ арбан найман мянган эдоомшуудые хюдажа, тэрэ байлдаанһаа бусахадаа, угаа ехэ нэрэтэй түрэтэй болобо. 14 Тэрэ Эдоомдо өөрын сэрэг ноёдые һуурижуулба. Бүхы Эдоомоор тэдэ байрлажа, эдоомшууд бултадаа Давидай богоолнууд болобо. Давидай ябаһан газар бүхэндэнь Эзэн туһалан байгаа.

Давидые хүрээлэгшэд

15 Иигэжэ Давид бүхы Израилиин хаан түрэ барижа, арад түмэнөө зүб шударгыгаар зонхилжо байгаа. 16 Цэруяа эхэтэй Ёһааб сэрэгэй дарга, Ахилүүдэй хүбүүн Ёшапаат түүхэ бэшээшэ, 17 Ахитуубай хүбүүн Цадоок болон Абиатаарай хүбүүн Ахимээлэх санаартад, Сэраяа бэшээшэ, 18 Ёядаагай хүбүүн Бэнайяа Давидай бэе аршалагшадай ноён һэн, тэрэ хэрээдүүдые ба пэлидүүдые захирдаг һэн. Давидай хүбүүд санаартан байгаа.