‏ 2 Thessalonians 3

Бидэнэй түлөө зальбаржа байгты

1Аха дүүнэрни, түгэсхэлдэнь иимэ юумэн хэлэхэ байнаб: Эзэнэй һургаал таанадай дунда яажа таража байнаб, тон тиигэжэл саашадаа таража, алдаршажа байхын тула таанад бидэнэй түлөө зальбаржа байгты. 2Бидэниие нүгэлтэ, хуурмаг хүнүүдһээ зайсуулжа байхыень баһа Бурханда зальбаржа байгты. Хүн бүхэн Бурханай Үгэдэ үнэн сэхэ байдаггүй.

3Гэхэдэ Эзэн найдабаритай. Тиимэһээ Тэрэ таанадые зоригжуулжа, шолмосһоо аршалжа байха. 4Таанад бидэнэй захирһан юумые хэхэт, саашадаашье хэжэ байхат гэһэн хатуу этигэл Эзэн бидэндэ үгэнэ.

5Бурханай хайра дурые мэдэрүүлжэ, Христоосой ерэхые хүлеэхэ тэсэбэри Эзэн таанадта үршөөг лэ.

Ажаллаха уялга

6Аха дүүнэрни, бидэнэй үгэһэн захяа заабариие сахидаггүй, журам замбараагүй һүзэглэгшэдһөө зайсажа байгты гэжэ Эзэн Иисүүс Христоосой нэрэ алдараар таанадтаа захирнабди. 7Бидэнэйл хэһэн юумые һажаажа хэхэ ёһотойгоо таанад өөһэдөөшье һайн ойлгонот. Таанадтай хамта байхадаа, бидэ журам сахидаг һэмди. 8Бидэ хэнээшье туһаламжые түлөөһэгүй абадаггүйбди. Таанадай хэндэшье ашаан болохогүй гэжэ бидэ үдэр һүнигүй ажалладаг һэмди. 9Туһаламжа эрихэ эрхэгүй байһандаа бидэ тиигээ бэшэбди, харин таанадта һажаажа байха жэшээ харуулхын тула тиигэжэ ажаллажа байгаабди. 10Бидэ таанадаар суг байхадаа, «Ажаллаха дурагүй хүн эдихэ ёһогүй» гэжэ хэлэдэг һэмди.

11Таанадай дунда журам сахидаггүй, юушье хэдэггүй, гансал ондоо хүнүүдэй хэрэгтэ оролсожо байдаг хүнүүд бии гэжэ дуулаһан ушарһаа эдэ бүхэниие хэлэнэбди. 12Тэдэ зониие дарууханаар амидаржа, өөһэдөө ажаллажа, өөһэдыгөө тэжээжэ байхыень Эзэн Иисүүс Христоосой нэрэ алдараар бидэ уряалжа, идхажа байнабди.

13Аха дүүнэрни, таанад ходол үлзытэй юумэ бүтээжэ ябагты. 14Энэ бэшэг соогоо захиһан үгэнүүдыемнай дуулаха дурагүй хүнүүд байжа магадгүй. Тиигэбэл таанад тэдэ хүнүүдэй эшэжэ улайхын тула тэдэниие ажаглажа байгаад, тэдэнээр харилсангүй байгаарайт. 15Тиихэдээ тэдэндэ дайсадта адли бү хандаарайт, харин аха дүүнэрээ һургажа байһандал ухаан заажа байгаарайт.

Һүүлшын Үгэнүүд

16Амгалан тайбанай эхин болохо Эзэн Өөрөө таанадта хододоо бүхы юумэндэ амгалан тайбаниие үршөөжэ байг лэ. Эзэн та бүхэнтэй оршожо байг лэ.

17Өөрын гараар би энээниие бэшэнэб: Павел таанадые амаршална. Иимэ арга бүхы хандалгануудаймни бэлгэ тэмдэг болодог. Иигэжэл би бэшэдэг хүм.

Эзэн Иисүүс Христоосой үршөөл хайра та бүхэнтэй оршожо байг лэ.18