2Th 2 | BxrBBL2024 | STEP | Эзэн Иисүүс Христоосой ерэхэ болон бидэнэй Тэрээнтэй хамта байха суглаан тухай хэлэбэл, аха дүүнэрни,

‏ 2 Thessalonians 2

Бурханай дайсан

1 Эзэн Иисүүс Христоосой ерэхэ болон бидэнэй Тэрээнтэй хамта байха суглаан тухай хэлэбэл, аха дүүнэрни, 2 Эзэнэй үдэр ерээ гэхэдэ, таанад бэлээр ухаан бодолоороо мэгдэжэ, һанаагаа бү зобооройт гэжэ гуйнаб. Тэрэ үдэр ерээ гэжэ бидэниие уридшалан хэлээ, али номноо, али үгы һаа, бэшэг соогоо бэшээ гэжэ таанад бодожо магадгүйт. 3 Таанадые хэншье, ямаршье аргаар бү мэхэлэг. Бурханда эсэргүүсэһэн һүүлшын үймөөнэй болотор, һүйдхэл асардаг харата хүнэй элиртэр тэрэ Үдэр ерэхэгүй. 4 Бурханда, нангин гэжэ нэрлэгдэдэг бүхы юумэндэ тэрэ хүн эсэргүүсэхэ, тэдэ бүхэнэй дээгүүр өөрыгөө табиха. Тиихэдээ тэрэ бүри Һүмэдэ һуугаад, өөрыгөө Бурханби гэжэ баталан хэлэхэ.

5 Таанадтай хамта байхадаа, би эдэ бүхэн тухай хөөрэжэ байгаа һэм, һанана гүт? 6 Харата хүнэй ерэхэдэнь ямар юумэн һаалта болоноб гэжэ таанад өөһэдөө мэдэнэт. Тэрэ томилогдоһон сагтаал ерэхэ. 7 Бурханай дайсан нюусаар ажаллана, гэхэдээ тэрэниие халхалжа байһан хүсэн түрүүн буураха ёһотой. 8 Тиигээд Бурханай дайсан элирхэ, харин Эзэн Иисүүс ерэхэдээ, тэрэниие аманайнгаа амисхалаар алаха, Өөрынгөө һаргама ялагар байдалаар тэрэниие һүнөөхэ. 9 Бурханай дайсан шолмосой хүсэ барижа ерэхэ, тиигээд элдэб янзын хуурмаг гайхамшагта үзэгдэлнүүдые, дүлгэ тэмдэгүүдые үзүүлжэ, 10 үхэлдэ хүртэхэ хүнүүдтэ элдэб янзын мэхэ гохо хэрэглэхэ. Өөһэдыгөө абаран, үнэн зүб юумэндэ этигээгүй, дурлаагүй зон үхэхэ. 11 Тэрэнэйнь түлөө Бурхан тэдэ зониие эндүүрүүлхэ аргатай хүсэ эльгээхэ, тиигээд тэдэ зон хуурмаг юумэндэ этигэжэ байха. 12 Һүүлдэнь үнэн зүб юумэндэ этигээгүй, харин нүгэлтэ юумэ үйлэдэхэ дуратай байһан хүн бүхэн буруушаагдаха.

Таанад абарагдахаар шэлэгдэһэн байгаат

13 Эзэндэ инаг хайрата байһан аха дүүнэрни, бидэ таанадай түлөө үргэлжэ Бурханда баясхалан хүргэжэ байха ёһотойбди. Таанадай Арюун Һүлдын хүсөөр Бурханай хүнүүд боложо, үнэн зүб юумэндэ этигэһэн һүзэгөөрөө абарагдахынтнай тула Бурхан таанадые эхинһээ нааша шэлэжэ абаа. 14 Бидэнэй таанадта номноһон Һайн Мэдээсэлэй ашаар абарагдахынтнай тула Бурхан таанадые дуудаа. Эзэн Иисүүс Христоосой алдарые хубаалсахаар Тэрэ таанадые дуудаа. 15 Тиимэһээ, аха дүүнэрни, бидэнэй номноһон ба бэшэһэн һургаалнуудые баримталжа, бата бэхи байгты.

16 Маанадта дуратай, хайра үршөөлөөрөө маанадые хэтын хэтэдэ урмашуулдаг, бата найдабари үршөөдэг Эсэгэ Бурхамнай болон манай Эзэн Иисүүс Христоос Өөрөө 17 һанааетнай заһажа, үлзытэй үйлэ ходо бүтээжэ, хэлэжэ байхыетнай таанадые зоригжуулаг лэ.