2Ti 1 | BxrBBL2024 | STEP

‏ 2 Timothy 1

1 – 2 Инаг хайрата Тимофей хүбүүмни, шамда би Павел бэшэнэб. Би Бурханай эрхэ мэдэлээр элшэнгээр һунгагдаад, маанадта Иисүүс Христоостой нэгэдэхэдэмнай найдуулагдаһан амидарал тухай номнохоёо эльгээгдэһэн байгааб. Эсэгэ Бурхан болон манай Эзэн Иисүүс Христоос шамда һайн һайханиие, үршөөл хайра ба амгалан тайбаниие үршөөг лэ.

Павел баяр хүргэнэ, урмашуулна

3 Үбгэ эсэгэнэрэйнгээ мүргэдэг Бурханда би үнэн зүрхэнһөө алба хэжэ, үдэр һүнигүй Тэрээндээ зальбархадаа, үргэлжэ шамайе дурдан, баяр хүргэжэ байдагби. 4 Дуһааһан нулимсануудыешни һанаад, шамтай уулзаха гэжэ ехээр лэ хүсэнэб. Тиигэбэл, би баяраар дүүрэхэ һэнби. 5 Үнэн зүрхэнһөө Бурханда һүзэглэдэг байһыешни би һананаб. Лоида хүгшэн эжышни, Эвниикэ эхэшни үнэн зүрхэнһөө һүзэглэдэг бэлэй. Шишье баһал тиимэ һүзэгтэйш гэжэ би этигэнэб. 6 Тиимэһээ гараа дээрэшни табихадамни, шамда Бурханһаа үгтэһэн абьяас бэлиг зосоошни бадаржал байг лэ. 7 Бурханай үршөөһэн Арюун Һүлдэ бидэниие аймхай болгодог бэшэ, харин хүсэ шадалаар, хайра дураар дүүргэдэг, бэеэ барижа ябаха шадал үгэдэг.

8 Тиимэһээ манай Эзэн Иисүүс Христоос тухай гэршэлхэеэ бү айгаарай, Христоосой түлөө түрмэдэ һуужа байһан намһаа бү эшэжэ, улайжа байгаарай. Харин Бурханай үгэһэн хүсэ шадалаар Һайн Мэдээсэлэй түлөө зоболонгуудые дабажа гараарай. 9 Бурхан хэһэн хэрэгүүдэймнай түлөө бидэниие абараа бэшэ, харин Өөрынгөө һайн хүсэлөөр ба үршөөл хайраар бидэниие абаржа, нангин арад болгохоёо дуудаа. Бурхан сагай урадхалай эхи абахаһаа урда бидэндэ Иисүүс Христоосой ашаар Өөрынгөө үршөөлые хайрлаа. 10 Харин мүнөө манай Абарагша Иисүүс Христоосой ерэхэдэнь, тэрэ үршөөлынь эли болоо. Христоос Иисүүс үхэлые туйлажа, Һайн Мэдээсэлэй ашаар бүхы хүнүүдтэ мүнхын амидарал үршөөгөө.

11 Һайн Мэдээсэл номнохымни тула Бурхан намайе элшэн ба һургагша болгон табяа. 12 Тиимэһээ би иигэжэ тулижа зобожо байнаб, зүгөөр би эшэжэ улайнагүйб. Ушарынь юуб гэхэдэ, хэндэ һүзэглэжэ байһанаа би мэдэнэб, намда даалгаһан юумэеэ ^{▼▼ Үгы һаа «Минии Иисүүс Христоосто даалгаһан юумые» гэжэ уншажа болоно.} тэрэ Үдэр болотор Иисүүс Христоос хадагалжа шадаха гэһэн этигэлтэйб. 13 Минии шамда хөөрэһэн үнэн зүб һургаалые хатуугаар баримталжа ябаарай. Тэрэ һургаал шамда жэшээ боложо байг. Иисүүс Христоостой нэгэдэхэдээ олоһон һүзэг, хайра дураяа бадараажа ябаарай. 14 Шамда даалгагдаһан үлзытэй һайхан зүйлнүүдые сэдьхэлдэмнай оршоһон Арюун Һүлдын хүсэ шадалаар хадагалжа байгаарай.

15 Аси можын бүхы зон, тэдэнэй тоодо Фигелл ба Һэрмогээн хоёр намайе орхижо ошоо гэжэ ши мэдэнэш. 16 Гэхэтэй сасуу оло дахин һанааемни заһажа байһанайнь түлөө Эзэн Онисифорой гэр бүлэдэ үршөөл хайраа харуулһай даа. Түрмэдэ һуужа байна гээд тэрэ намһаа эшэжэ зобожо байгаагүй, 17 харин Рим ерээд, намайе ехэл удаан бэдэржэ олоо. 18 Эзэн ерэхэ Үдэртөө тэрээндэ үршөөл хайраа хайрлаһай даа! Эфестэшье байхадаа, тэрэнэй намда ехэл туһа хүргэжэ байһыень ши һайнаар мэдэнэш.