‏

Хоёрдохи хандалгадал адли, Иоанн гурбадахи хандалга соогоо өөрыгөө «ахалагша» гээд нэрлэнэ. Тэрэ энэ хандалгые нэгэ христиан бүлэгэй гэшүүн Гай гэгшэдэ зорюулаа. Иоанн тэрэниие хайра дура элирүүлһэнэйнь түлөө магтана, манай мэдэхэгүй Диотрээп гэжэ нэгэ хүнэй хангалтагүй ябадал тушаа дуулган һэргылнэ.

‏ 3 John

1Һүзэглэгшэ бүлгэмэй ахалагшаһаа – инаг дуратай Гайда! Би шамда үнэн сэдьхэлһээ дуратайб. 2Минии инаг хайрата дүү, шинии сэдьхэл һанаанай сэбэр һайхан байдагтал адляар, шинии ажабайдал баһал һайн байһай. Шинии бэе хододоо элүүр мэндэ байһай. Эдэ бүгэдын түлөө Бурханда мүргэнэб. 3Бодото зүб хэрэгтэ ши үнэн сэхэ зандаа байнаш гэжэ дуулахадаа, би ехэ баярлааб. Энэ һониниие намда ерэһэн аха дүүнэр дуулгаа. 4Минии үхибүүд бодото зүб хэрэгтэ үнэн сэхэ зандаа гэжэ дуулахадаа, энээнһээ бүри ехэ баяр баясхалан намда байдаггүй.

Гай гэгшые магталга

5Инаг хайрата дүүмни, аха дүүнэрэйнгээ түлөө, харгы замда ябагшадай түлөө шинии бүтээдэг али бүхы ажал хэрэгшни шинии үнэн сэхэ байдагые батална. 6Шинии дуратай байһые аха дүүнэршни һүзэглэгшэдэй бүлгэмэй урда гэршэлээ. Бурханай зохидшоомо харгы замаа тэдэ аяншадайнгаа үргэлжэлүүлхэдэ туһалыш даа. 7Тэдэ хүнүүд Христоосой алдар нэрын лэ түлөө харгы замда ябаа, бусад арадуудһаа тэдэ туһаламжа абангүй гараа. 8Үнэн бодото ябадалай түлөө хамта ажаллахынь тула тиимэ хүнүүдые һайшаан дэмжэхэ ёһотойбди.

Иоанн Диотрээпые буруушаана, Дэмээтрые һайшаана

9Һүзэглэгшэдэй бүлгэмдэ тобшо тэды бэшэг бэшээб, теэд ноёрхохо дуратай Диотрээп маниие тооногүй. 10Хэрбэеэ ерэхэ аргатай болоо һаа, тэрэнэй хэдэг бузар муухай үйлэ хэрэгые, бидэн тухай тэрэнэй тараадаг шал худал хардалгануудые би тэрээндэ һануулхаб. Тиин Диотрээп энээгээр һанаагаа ханаагүй: аха дүүнэрыемнай өөрөө тэрэ угтажа абанагүй, бусадайшье угтажа абаха гэхэдэнь, һаалта хэнэ. Хэтэрхэдээ, аха дүүнэрыемнай һүзэгтэнэй бүлгэмһөө үлдэжэ гаргана.

11Инаг хайрата дүүмни, муу юумэ хэгшэдые бү дахаарай, һайн юумэ хэгшэдые һажаажа ябаарай. Һайн юумэ хэгшэд Бурханай хүнүүд гээшэ. Харин муу юумэ хэгшэд Бурханиие хараа үзөөгүй юм. 12Дэмээтрэ тухай бултадаа имагтал һайн юумэ хэлэнэ. Үнэн зүб ушар энээниие мүн лэ гэршэлнэ. Бидэшье баһа тиигэжэл хэлэнэбди, бидэнэй хэлэһэн гэршэ үгэнүүд үнэн зүб байдаг гэжэ ши мэдэнэш.

Түгэсхэл

13Шамда бэшэхэ гэһэн юумэн намда олон бии, теэд бэхэ, гуурһа хэрэглэжэ бэшэхые хүсэнэгүйб. 14Һаядаа шамтай нюур нюураараа уулзахабди гэжэ найданаб, тиихэдээ хөөрэлдэхэбди. Энхэ амгалан байгаарай. Нүхэдшни шамда амар мэндые хүргэнэ. Шишье хажуудахи нүхэдөө нэрэ нэрээрнь дурдажа, маанадһаа мэндые хүргөөрэй.15