‏ Acts 22

1– Аха дүүнэр, эсэгэнэр! Минии үмэглэлгын үгэ мүнөө шагнажа хайрлыт!

2Павелай еврей хэлэн дээрэ хэлэжэ байхые дуулахадаа, тэдэ зон бүри намдаба.

3– Би Килики ороной Тарс хотодо түрэһэн еврей хүнби. Тэрэ хотодо Гамалиһээлэй хүтэлбэри доро үбгэ эсэгэнэрэй Хуули ехэ нягтаар сахижа хүмүүжүүлэгдэһэн хүнби. Би таанадтал адли Бурханай урда бүхы үүргэнүүдээ оролдосотойгоор дүүргэдэг һэнби. 4Эзэнэй Замаар ябаһан зониие үхэтэрнь хашан мүрдэжэ, эрэшүүл, эхэнэрнүүдые барижа, түрмэдэ хаадаг байгааб. 5Минии хэлэһые ахамад санаарташье, Зүблэлэй гэшүүдшье баталха. Тэдэнһээ би бэшэг абаад, Христоосто һүзэглэдэг тэндэхи зониие барижа хүлеэд, Иерусалим хэһээхыень абажа ерэхээр аха дүүнэртээ Дамааск ошохо гэжэ гараа һэм.

Павел Христоосто һүзэглэһэн тухайгаа хөөрэнэ

6– Гэбэшье үдын багта, Дамааскһаа холо бэшэ ябахадамни, ялагар туяа тэнгэриһээ сасаран, намайе гэрэлтүүлээ. 7Би газарта унажа: «Саул, Саул, юундэ ши Намайе хашан мүрдэнэбши?» – гэһэн абяа дуулааб. 8«Эзэмни, үгы Та хэн гээшэбта?» – гэжэ би һурабаб. «Шамда хашуулан мүрдүүлэгшэ Назаредэй Иисүүс гээшэлби даа», – гэжэ Тэрэ харюусаба. 9Замаймни нүхэд гэрэл туяа харабашье, намда хандаһан абяа дуулаагүй. 10«Эзэн, тиихэдээ би яаха болонобиб?» – гэжэ һурабаб. «Мүнөө дээрээ ши бодоод, Дамааск ошо. Юу хэхэ тухайшни тэндэ шамда хэлэгдэхэ», – гэжэ Эзэн намда харюусаа. 11Тэрэ гэрэл туяагай толондо юумэ харахаяа болёод байхадамни, намтай ябаһан хүнүүд гарһаамни хүтэлжэ, Дамааск хүргэжэ асараа.

12Тэндэ Хуули хэшээлтэйгээр сахидаг Анания гэжэ хүн намда ерээ. Тэрэ хүниие Дамааскын бүхы еврейнүүд ехэ хүндэлдэг юм. 13Тэрэ намда ерэжэ, хажуудамни зогсоод: «Саул, нүхэрни, нюдэншни харадаг болог лэ!» – гэжэ хэлээ һэн. Тэрэ дороо би хараатай боложо, тэрэниие харааб. 14«Манай үбгэ эсэгэнэрэй Бурхан эрхэ хүсэлөө шамда мэдүүлхын тула Үнэн сэдьхэлтэниие шамда харуулхын тула, Тэрэнэй абяа дуулахыншни тула шамайе шэлэжэ абаа, – гэжэ Анания үргэлжэлүүлбэ. – 15Юундэб гэхэдэ, ши хараһан дуулаһан бүхэнөө бүхы зондо дуулган, Эзэн тухай гэршэлхэ ёһотойш. 16Тиихэдээ юундэ удааржа байнабши? Бодоод, Эзэнэй нэрэ алдарые дуудан, уһаар арюудхуулаад, нүгэл шэбэлээ арилга».

17Иерусалим бусажа ерээд, һүмэ соо зальбаржа байхадаа, би үзэгдэлдөө 18Эзэниие харааб. «Энэ дороо түргэхэн Иерусалимые орхижо ошо, юундэб гэхэдэ, энэ хотодо Нам тухай гэршэлхэдэшни этигэхэгүй», – гэжэ Тэрэ хэлээ. 19«Эзэн аа! – гэжэ би үгэлбэб, – мүргэлэй гэрнүүдээр ябажа, Танда һүзэглэдэг зониие барижа, түрмэдэ хаажа, сохижо байһан тухаймни тэдэ мэдэнэ ха юм. 20Мүн Танай гэршэ Стефанай шуһа адхархада би хажуудань байгааб, тэрэнэй алууршадай тала барин, хубсаһануудыень харууһалжа байгааб». 21Тиихэдэ Тэрэ намда: «Яба, Би шамайе эндэһээ холо бусад арадуудта эльгээхэмни», – гэжэ хэлэбэ.

Павел түмэнэй дарга хоёр

22Эдэ үгэнүүдээ хэлэтэрынь хүнүүд тэрэниие шагнажа байһанаа, мүнөө шаг шууяа табижа:

– Иимэ хүн газар дээрэ ябаха ёһогүй. Энэ хүн амиды ябаха ёһогүй! – гэжэ хашхаралдаба.

23Тэдэнэй иигэжэ хашхаралдажа, хубсаһаяа шуура татажа, шорой сасажа байхада, 24түмэнэй дарга Павелые хэрэмдэ туужа абаашаад, яахадаа зон иигэжэ хашхаралдааб гэжэ мэдэхын тула «тэрэниие ташуурдагты» гэһэн захиралта үгэбэ. 25Павелые баханада уяжа хүлихэдэнь, хажуудань байһан зуунай даргада хандан:

– Таанар римэй эрхэтэниие зарга шүүбэригүйгөөр ташуурдаха эрхэтэй гүт? – гэжэ Павел асууба.

26Энээниие дуулахадаа, зуунай дарга түмэнэй даргада ошожо:

– Үгы, та юу хэхэеэ байнабта? Энэ хүнтнай римэй эрхэтэн байнал, – гэбэ.

27Тиихэдэнь түмэнэй дарга Павелда ойртожо:

– Хэлыш даа, ши үнэхөөрөө римэй эрхэтэн гүш? – гэжэ һураба.

– Тиимэ, – гэжэ Павел харюусаба.

28– Би ехэ мүнгэ түлэжэ римэй эрхэтэн болоо һэнби, – гэжэ түмэнэй дарга хэлэбэ.

– Харин би түрэхэһөө римэй эрхэтэнби, – гэбэ Павел.

29Павелые ташуурдаха ёһотой байһан сэрэгшэд түргэхэн холо болобо. Харин түмэнэй дарга римэй эрхэтэниие гэнжээр хүлибэб гэжэ мэдэхэдээ, ехээр айн һүрдэбэ.

Павел Зүблэлэй гэшүүдэй урда

30Хойто үдэрынь Павелые юунэй түлөө еврейнүүд зэмэлнэб гэжэ тодорхойлхо һанаатай түмэнэй дарга тэрэнэй гэнжыень тайлажа, түрүү санаартадай болон Зүблэлэй гэшүүдэй суглархые захиржа, Павелые тэдэнэй урда байлгаба.