‏ Colossians 4

1Эзэд, өөһэдынгөө барлагуудта үнэн сэхээр хандагты. Таанад өөһэдөө тэнгэридэ Эзэнтэй байһанаа мэдэнэт.

Һүүлшын заабари

2Үргэлжэ Бурханда баяр хүргэн зальбарагты, зальбархадаа, һэргэлэн байгты. 3Христоос тухай нюусые тайлбарилхадамнай, Бурханай үгые дэлгэрүүлхэдэмнай, Бурханай бидэндэ һайн боломжо үгэжэ байхынь тулада, таанад бидэнэйшье түлөө баһа зальбаржа байгты. Христоос тухай номноһонойнгоо түлөө би мүнөө түрмэдэ һуунаб. 4Тэрэ нюусые номноходоо, шадаха зэргээрээ ойлгосотойгоор хэлэжэ байхымни тула зальбаржа байгты.

5Сагаа гээнгүй, һүзэглэдэггүй зондо туһа хүргэжэ байгаарайт, тэдэндэ ехэл ухаамсараар хандаарайт. 6Хэлэхэдээ, таанад зохисохо болон һонирхохо юумэ ходо хэлэжэ байха, тиин хүн бүхэндэ яажа зүб харюу үгэхые мэдэжэ байха ёһотойт.

Һүүлшын амаршалга

7Бидэнээр хамта Эзэндэ алба хэдэг үнэн сэхэ, инаг хайрата манай дүү Тихик нам тухай таанадта дуулгаха. 8Бидэнэй яажа ажамидаржа байһан тухай таанад дуулаад, урмашахынтнай тула би тэрэниие таанадта ябуулаа һэм. 9Тихиктэй хамта таанадай нэгэн болоһон, манай найдалтай болон инаг хайрата дүү Онисим ябалсаа. Тэдэнэр эндэ боложо байһан бүхы юумые таанадта хөөрэжэ үгэхэ.

10Намтай хамта түрмэдэ һууһан Аристарх, Барнаабай аша хүбүүн Марк таанадта мэндые хүргэнэ. Маркын таанадта ошоболнь, тэрэниие угтажа абаха захиралта таанадта үгтэһэн байна. 11Иуст гэжэ нэрлэгдэдэг Иисүүс таанадта баһа мэндые хүргэнэ. Эдэ гурбан Бурханай эрхэ засагай мандахын тула намтай хамта хүдэлжэ байһан еврей һүзэглэгшэд юм, тиин тэдэ намда ехэл аша туһатай байгаа. 12Иисүүс Христоосой зараса, таанадай үшөө нэгэн болохо Эпапраас таанадта баһа амар мэндые хүргэнэ. Тэрэ таанадай эрхим түгэс боложо, Бурханай эрхэ хүсэлые бүрин мэдэжэ байхын тула таанадай түлөө үргэлжэ Бурханда зальбардаг юм. 13Таанадай болон Лаодики, Һээраапол хотодо байһан хүнүүдэй түлөө тэрэнэй ехэл эршэтэйгээр ажаллажа байдагыень би өөрөө баталжа шадахаб. 14Манай эрхим хүндэтэ Лука эмшэ ба Дэмаас хоёр таанадта мэндые хүргэнэ.

15Лаодики хотын һүзэглэгшэдтэ, Ниимпада, тэрэнэй гэртэ суглардаг һүзэглэгшэдэй бүлгэмдэ бидэнһээ мэндые дамжуулаарайт. 16Таанад энэ хандалгые уншаад, һүүлдэнь Лаодикиин һүзэглэгшэдэй бүлгэмдэ баһа уншуулаарайт. Тиихэтэй сасуу Лаодикиин һүзэглэгшэдтэ минии эльгээһэн хандалгые таанад уншаарайт. 17«Эзэнэй даалгаһан ажалые бүтээгээрэй», – гэжэ Архипда хэлээрэйт.

18Павел таанадые амаршална гэжэ би өөрын гараар бэшэнэб. Гэнжэнүүдээр хүлеэтэй байһан тухаймни һанажа байгаарайгты.

Бурханай үршөөл хайра та бүхэнтэй оршожо байхань болтогой.
Copyright information for BxrBBL2024