Deu 1 | BxrBBL2024 | STEP | Иордан голой саада тээ, элһэн сүл губида, Арабаада, Суупай хажууда, Параан, Тоопэл, Лаваан, Хацэроот, Диизаһаб хотонуудай хоорондо байхадаа, Моисейн бүхы Израилиин улад зондо хэлэһэн үгэнүүд иимэ.

‏ Deuteronomy 1

Моисей Израилиин арад зондо хандана

1 Иордан голой саада тээ, элһэн сүл губида, Арабаада, Суупай хажууда, Параан, Тоопэл, Лаваан, Хацэроот, Диизаһаб хотонуудай хоорондо байхадаа, Моисейн бүхы Израилиин улад зондо хэлэһэн үгэнүүд иимэ. 2 Хорээб хадаһаа эхилжэ, Эдоомой ^{▼▼ Энэ газар үшөө Сэһиир (эхэ еврей хэлэн дээрээ «үһэтэй зэрлиг» гэһэн удхатай) гээд нэрлэгдэдэг.} хадалиг газар нютагаар үнгэрэн, Кадээш-Барнээ хүрэтэр ябахада, арбан нэгэн үдэрэй туршада ябамаар юм. 3 Израилиин арад зоной Египедһээ гаража, энэ газарта хүрэһөөрнь дүшэн жэл үнгэрөө. Дүшэдэхи жэлэй арбан нэгэдэхи һарын түрүүшын үдэр ^{▼▼ Египедһээ гараһан сагһаа хойшо тоологдоно.} Моисей Израилиин зондо дуулгахыень Эзэнэй өөртэнь захираашые бултыень дамжуулһан гэхэ. 4 Хэшбоон хотые зонхилдог, эмоор обог аймагай Сиһоон хааниие, мүн Аштароот ба Эдрей хотонуудые зонхилдог, Башаанай Оог хааниие диилэһэнэй удаа, 5 Иорданай саана, Моһаабай газар дайдада Моисей Һургаал тайлбарилжа эхилээ һэн. Тэрэ иигэжэ хэлээ:

6 – Хорээб хада дээрэ байхадамнай, Эзэн Бурхамнай бидэндэ иигэжэ айладхаа бэлэй: «Энэ хада дээрэ байхатнай хүрөө! 7 Эрьежэ, аян замда гаража, эмоор обог зоной уулархаг нютаг руу ошогты, мүн оршон тойронхи хүршэнүүдтэнь – Арабаа руу, хада уулархаг нютагууд руу, тала руу, Нээгэб руу, далайн эрье руу, ханаһаануудай нютаг болон Ливаан руу, агууехэ Евфрат мүрэн хүрэтэр зоригты. 8 Харагты, энэ газар дайдые Би таанадта үгэнэб! Үбгэ эсэгэнэртэтнай – Абраһаамда, Исаагта, Яковта мүн үри хүүгэдтэнь үгэхэб гэжэ Минии, Эзэнэй, тангариглан найдуулһан газар руу ошожо, эзэмдэгты».

Шүүбэрилэгшэдые томилбо

9 Моисей зондо иигэжэ хэлээ:

– Гансаараа таанадай толгойлогшо байжа шадахагүйб гэжэ Синай хада дээрэ байхадаа хэлээ һэм. 10 Эзэн Бурхантнай та бүгэдые үнэржүүлээ, иигэжэ мүнөө болоходо таанад огторгойн одо мүшэд мэтэ угаа олон болонхойт. 11 Эзэн, үбгэ эсэгэнэрэйтнай Бурхан, мүнөө байһандатнай орходоо үшөө хэдэн мянга дахин олон болгохонь. Найдуулһанайнгаа ёһоор таанадые Тэрэнэй үреэхэнь болтогой! 12 Харин би гансаараа танай хүшэр хүндэ хэрэгүүдые яажа даажа, хоорондохи арсалдаа хэрэлдээетнай яагаад гансаараа шиидхэжэ ябаха гээшэбиб? 13 Обог бүхэнһөө ухаатай сэсэн, юумэ үзэһэн хараһан, дүй дүршэлтэй нэгэ хэды зониие өөһэдөө шэлэгты, тиихэдэтнай тэдэниие танай толгойлогшод болгон томилхоб.

14 «Энэ зүб», – гэжэ харюусан, таанад намайе дэмжээ һэнта. 15 Иигэжэ би таанадай шэлэһэн, обогуудайтнай ухаатай сэсэн, дүй дүршэлтэй эрэшүүлые абажа, таанадай толгойлогшод болгон табяаб. Тэдэниие мянганай, зуунай, табинай, арбанай толгойдо табяаб, ахамадууд болгон, обог изагуураартнай табяа бэлэйб.

16 Тэдээндэ тэрэ үедэ иигэжэ захираа һэм: «Зоной зарга хэрэгүүдые анхаралтайгаар шагнажа, үнэн зүбөөр бүтээгты: нэгэ яһанайшье зоной хоорондохи хэрэгые, мүн ерүүл хүнтэй арсалдааешье. 17 Нюур илгаруулжа бү байгты, шадалтай, шадалгүйшье зониие адли анхаран шагнагты. Хэнһээшье бү айгты, юуб гэхэдэ, шүүбэрилхэ гээшэ Бурханай хэрэг. Өөһэдөө шиидхэжэ шадахагүй хэсүү хэрэгээ намда даалгагты, би тэрэниие шиидхэхэб». 18 Иигэжэ юу хэхыетнай таанадта би тэрэ үедэ бултыень захиран ойлгуулаа бэлэйб.

Моисей тагнуулшадые эльгээнэ

19 Эзэн Бурханайнгаа захирһанай ёһоор, Хорээб хадаһаа буужа, энэ үргэн, аймшагтай элһэн сүл губи бултыень гаталан гараабди, энээниие та бүгэдэ өөһэдөө хараа гээшэ аабзат даа. Иигэжэ эмоор обог зоной уулархаг нютаг руу зорижо, Кадээш-Барнээ гэгшэдэ хүрөөбди. 20 – 21 Би таанадта иигэжэ хэлээ һэм: «Эзэн Бурханайнгаа, элинсэг хулинсагаймнай Бурханай, бидэндэ үгэжэ байһан эмоор обог зоной уулархаг нютаг руу мүнөө ерээд байнат. Харагты, тэрэ урдатнай байна. Ошогты, Тэрэнэй таанадта найдуулһанай ёһоор эзэмдэгты, бү айгты, бү һүрдэгты».

22 Теэд таанад бултадаа намда дүтэлжэ, иигэжэ хэлээ бэлэйт: «Бидэнэй ябаха харгы зам тухай, ошохо хото һууринууд тухай мэдээд ерэхыень нэгэ хэды зониие уридшалан эльгээе, тэдэнэр тэрэ орон нютаг шэнжэлээд ерэхэ». 23 Энэ үгэ хүүртнай намда һайшаагдажа, обог бүхэнһөө нэгэ хүниие, дүн хамта арбан хоёр хүниие, таанадай дундаһаа шэлэбэб. 24 Тэдэнэр ошожо, уулархаг нютагаар саашалжа, Эшхоолой хүндыдэ ошон шэнжэлээд, 25 тэрэ нютагай жэмэс бидэндэ асаржа, һураг суу дуулган иигэжэ хэлэбэ: «Бидэндэ Эзэн Бурханаймнай бэлэглэжэ байһан дайда угаа үрэжэлтэй һайхан газар байна даа».

26 Теэд таанад тиишээ ошохо дурагүй, Эзэн Бурханайнгаа урдаһаа һөөргэдөө бэлэйт. 27 Өөр өөрын майхангууд соо һуужа, таанад иигэжэ гэмэрэлдэжэ байгаат: «Маанадые Эзэн үзэн ядадаг ушарһаа эмоор обог зоноор бидэниие усадхахын тула Египедэй газар дайдаһаа гаргаа. 28 Юундэ тиишээ ошохобибди? Бидэ айнабди. Тэндэхи зон маанадта орходоо томо, үндэршье, хотонуудынь мантан, огторгой тулама хэрэм ханануудтай гэжэ тагнуулаар ошоһон зомнай дуулгаа һэн. Тэндэ айхабтар томо бэетэй Анаагай үри һадаһадые тэдэ хараал!» 29 Би таанадта иигэжэ хэлээ һэм: «Тэдэнһээ бү сошогты, бү айгты. 30 Эзэн Бурхантнай таанадые хүтэлэн урдатнай ябана. Египедтэ байхада хараһаар байтарнай манда туһалһандал адляар, Тэрэ манай түлөө тэмсэхэ. 31 Түрэһэн хүбүүгээ гар дээрээ үргөөд ябаһан хүндэл адли Эзэн Бурхантнай элһэн сүл губидашье таанадые үргөөд ябана гэжэ ажаглаа бэлэйт. Бүхы аян замдатнай, энэ газар хүрэтэртнай Тэрэ таанадые абажа ябаа бшуу». 32 – 33 Таанадай урда Тэрэ ябажа, бууса табиха газарыетнай бэдэрээ. Харгыетнай гэрэлтүүлжэ, һүниндөө гал дүлэн соо, үдэртөө үүлэн соо урдатнай ябажа байһан Эзэн Бурхандаа таанад минии хэлэһэнэйшье удаа этигээгүй байнат.

Һөөргэдэһэнэй түлөө хэһээлтэ

34 Эзэн үгэнүүдыетнай шагнажа, ехэ сухалдажа, иигэжэ тангариглаһан байна: 35 «Үбгэ эсэгэнэртэтнай үгэхэб гэжэ Минии тангариглаһан һайн газарые таанадай, энэ муу үеынхидэй, хэншье үзэхэгүй, 36 гансал Епуннээ гэгшын хүбүүн Халээб тэрэниие үзэхэ. Намда үнэн сэхэ зандаа үлэһэнэйнь түлөө тэрээндэ болон үри хүүгэдтэнь Би шэнжэлһэн газар дайдыень бэлэглэхэб». 37 Таанадай түлөө намдашье Эзэн уурлажа, иигэжэ айладхаа: «Ши, Моисей, мүн лэ тиишээ орохогүйш. 38 Өөрынгөө туһамаршан, Нүүнэй хүбүүн Иисүүс гэгшые зоригжуула. Израилиин зониие газар эзэмдэхыень тэрэ хүтэлэн абаашаха.

39 Дайсадай олзо болохо гэжэ таанадай һанаһан үхибүүдтнай тиишээ орохо. Тэдэнэр һайн, муу юумэн гэжэ үшөө мэдэнэгүй. Тэдээндэ газар үгэхэдэм, эзэмдэн ажаһууха. 40 Харин та бүгэдэ зон, һөөргөө бусагты! Хулһата далай ^{▼▼ «Ям Суф» (эхэ еврей хэлэн дээрээ), Индийскэ океанай гарам, тэрэниие үшөө Улаан далай гээд нэрлэдэг.} тээшэ ошоһон харгыгаар элһэн сүл губи руу зоригты».

41 Таанад намда иигэжэ харюусаа бэлэйт: «Эзэнэй урда нүгэлтэйбди. Эзэн Бурханайнгаа захирһанай ёһоор ошожо дайлалдая». Тиигээд дайнай зэбсэгүүдээ зүүжэ, уулархаг орон нютаг руу ороходо ядаха юумэн үгы гэжэ һанаа бэлэйт.

42 Теэд Эзэн намда иигэжэ айладхаба: «Бү ошогты, бү дайлалдагты гэжэ хэлыш тэдэндэ, юуб гэхэдэ, Би таанадай дунда үгы байхаб, тиимэһээ дайсадтнай таанадые хюдахал». 43 Минии таанадта хэлэхэдэм, үгыем дуулаагүйт, Эзэнэй захиралтада һөөргэдэжэ, үсэрхэн, уулархаг орон нютаг руу ороо һэнта. 44 Тэрэ хада ууланууд дээрэ ажаһуудаг эмоор обог аймагайхид таанадай урдаһаа бодожо, зүгы мэтэ бүхы талаһаа тойрон, таанадые хадхан намнажа, Сэһиирэй хадалиг газар нютагта Хормаа хүрэтэр таанадые хюдаа. 45 Таанад бусажа, Эзэнэй урда уйлалдаа, туһа эреэ һэнта, теэд Эзэн таанадые дуулаагүй, анхараагүй.

Элһэн сүл губидахи он жэлнүүд

46 Иигэжэ Кадээштэ удаан сагта байһанайнгаа удаа,