‏ Deuteronomy 11

Эзэнэй һүр жабхалан

1Эзэн Бурхандаа дуратай байгты, тэрэнэй захиралта, хуулинуудые, ёһо гурим, мүн захяа заабарииень хододоо сахин, дүүргэн ябагты. 2Һанажа байгты! Үхибүүдтнай бэшэ, таанад өөһэдөө Эзэн Бурханайнгаа хэһээлтэ мэдэһэн, хараһан байнат. Тэрэнэй һүр жабхалан, бар хүсыень, агууехэ шадалынь һанаад үзэгты. 3Тэрэнэй дүлгэ тэмдэгүүдые, Египедэй фараонтой, бүхы газар оронтойнь хэһэн гайхамшагта үйлэ хэрэгүүдые; 4таанадай хойноһоо Египедэй сэрэгэй намнахадань, мори унаад, мүн дайшалхы тэргээр хойноһоотнай мүрдэхэдэнь, Хулһата далайн уһан соо Эзэнэй тэдэниие шэнгээһые, дууһан һалгааһые; 5энэ газарта ерэтэртнай элһэн сүл губида таанадай түлөө Тэрэнэй юу хэһые; 6Рэүбээнэй уг удамай Элиааб гэдэгэй хүбүүд болохо Датаан болон Абираамтай Тэрэнэй юу хэһые. Израилиин арад зоной хараһаар байтар газар дэлхэй аман мэтээр ангайн хахаржа, тэдэ хоёрые, гэр бүлэнүүдыень, майхангуудыень, абаад ябаһан бүхы эд зөөрииень залгижархёо бэлэй. 7Иигэжэ таанад лэ Эзэнэй эрхилэн бүтээһэн агууехэ хэрэгүүдые нюдөөрөө хараһан зон болонот.

Эзэнэй үгэһэн газарта

8Тиимэһээ мүнөөдэр минии дамжуулһан бүхы захяа заабаринуудые сахин байгты. Тиигэбэл, таанад шанга болохот, Иордан гол гаталан, эзэмдэхэ гэһэн газартаа ошожо, эзэлхэт. 9Тиигэбэл, Эзэнэй танай үбгэ эсэгэнэртэ, уг удамдань үгэхөөр тангариглан найдуулһан газар дайдада, һүн далайн урдажа, зүгын балай дэлгэржэ байһан газарта, удаан сагта ажаһуухат. 10Эзэлхэеэ ошожо ябаһан газартнай танай орхиһон Египедэй газартал адли бэшэ. Тэндэ үрэһэ тарин хаяхадаа, огород уһалһандал адли хүлөөрөө хүдэлэн, таряалангаа уһалдаг, угаа ехэ ажалтай бэлэйт. 11Харин танай эзэмдэхэеэ ошожо ябаһан тэрэ газар тэнгэриин хура бороогоор ундалдаг хада уулатай, намжаа нюруу газарнуудтай орон нютаг юм. 12Эзэн Бурхантнай тэрэ газарые анхаралаар хүреэлдэг, түхэреэн жэлэй туршада харааһаа табидаггүй.

13Хэрбээ минии мүнөөдэр хэлэһэн захяа заабаринуудые шагнан сахижа, Эзэн Бурхандаа дуратай байжа, бүхы зүрхэ сэдьхэлээрээ Тэрээндэ һүгэдөө гээшэ һаатнай, 14хабарай ба намарай үедэ, юрэдөө, хэрэгтэй сагтань Эзэн танай газарта бороо хура эльгээхэ. Тиихэдэнь таанад таряа талхатай, үзэмэй дараһан архитай, оливын тоһотой байхат. 15Малайтнай тэжээл болохо үбһэ ногоо газар дээрэтнай Тэрэ ургуулха, тиихэдэнь таанад элбэг эдеэтэй байхат.

16Теэд болгоомжологты, мэхээр хэн нэгэн дурыетнай буляагуужан. Хажуу тээшээ бү ходорогты, бусад бурхадта бү шүтэгты, тэдээндэ бү мүргэгты. 17Үгы һаатнай, Эзэн таанадта уур сухал болохо. Огторгойе бүглэн хаахадань, бороон орохогүй, газарһаа ургаса гарахагүй, тиигээд таанад Эзэнэй үршөөжэ байһан энэ һайхан газарта удахагүй хосорхот.

18Минии эдэ үгэнүүдые ой ухаандаа, зүрхэ сэдьхэлдээ хадуун абагты, гартаа дүлгэ тэмдэг болгон уягты, һанажа байхын тула магнай дээрэтнай тэдэ боолто болоод байг лэ. 19Тэдээн тухай хэлэжэ, үхи хүүгэдээ һургагты – гэртээшье һуухадаа, харгыдашье ябахадаа, амаржа байхадаашье, ажал хэхэдээшье. 20Тэдэниие гэрэйнгээ үүдэнэй тотого дээрэ, бартаанууд дээрээ бэшэгты. 21Танай үбгэ эсэгэнэртэ үгэхэеэ Эзэнэй тангариглан найдуулһан тэрэ газар орондо таанарай ба үхибүүдэйтнай удаан саг соо ажаһуухын тула, хэды саг соо огторгой газар дээрэ оршохоб – тэды сагай туршада таанадай тэндэ байхын тула эдэ бүгэдые хэгты.

22Минии хэлэһэн захяа заабаринуудые жэншэдгүй сахин дүүргэжэ байгаа һаатнай, Эзэн Бурхандаа дуратай байбалтнай, Тэрэнэй замаар ябабалтнай, Тэрээндэ үнэн сэхэ байгаа һаатнай, 23танай хажууһаа бусад арадуудые Эзэн үлдэхэ. Тиихэдэнь таанадһаа олон, хүсэтэйшье арадуудые диилэжэ, газар, уһыень эзэмдэхэт. 24Гэшхэһэн газар бүхэнтнай танай болохо – урда зүгэй элһэн сүл губиһаа хойто зүгэй Ливаан хүрэтэр, зүүн зүгэй Евфрат мүрэнһөө баруун зүгэй аяар Дундада далай хүрэтэр танай хилэнүүд нэмжыхэ. 25Хэншье танай урдаһаа тулажа шадахагүй. Эзэн Бурханайтнай найдуулһанай ёһоор, хайшаашье ошоболтнай, танай урда арадуудые Тэрэ һалгануулан байха.

Израилиин арадай шэлэхэ зүйлнүүд

26Анхарагты, би мүнөөдэр таанадта үреэл хараал хоёрой нэгыень шэлэхые дурадханаб: 27хэрбээ таанад мүнөөдэр минии дамжуулжа байһан Эзэн Бурханайнгаа захяа заабаринуудые сахибал, үреэл хайрада хүртэхэт; 28хэрбээ таанад Эзэн Бурханайнгаа захяа заабариие сахингүй, минии мүнөөдэр заажа байһан замһаа хотироо һаа, танигдаагүй ондоо бурхадта мүргэжэ эхилээ һаа, хараалда хүртэхэт.

29Эзэлхэеэ ошожо ябаһан газар руутнай Эзэн Бурханайтнай асархадань, Гэризиим хада дээрэһээ үреэл, харин Эбаал хада дээрэһээ хараал табигты. 30Тэдэ хаданууд Иордан голой баруун бэедэнь, наранай орохо зүгтэ, Арабаада ажаһуугша ханаһаан арадай газар дайда дээрэ, Гилгаал хотын хажуугаар, сарса модоной ургадаг Морээ гэдэг тахилгатай ойдо дүтэхэнэ юм.

31Эзэн Бурханайнгаа үгэжэ байһан газарые эзэмдэхэеэ таанад Иордан гол мүнөө гаталхатнай. Тиигээд тэрэ газарые эзэлжэ, тэндэ ажаһуухадаа, 32минии мүнөөдэр дамжуулан хэлэжэ байгааша бүхы хуули, ёһо гуримуудые сахин дүүргэгты.