‏ Deuteronomy 12

Гансал газарта үргэл хэхэт

1Элинсэг хулинсагайтнай Эзэн Бурханай эзэлхыетнай үгэжэ байһан тэрэ газарта заатагүй танай сахин дүүргэхэ хуули, ёһо гуримууд гэбэл, иимэ: 2Таанадта диилдэһэн тэдэ арадуудай үндэр уула, добо гүбээнүүд дээрэ, алибаа һаглагар модон доро өөһэдынгөө бурхадта мүргэдэг газарнуудыень бүримүһэн үгы хэгты. 3Тэдэнэй үргэлэй шэрээнүүдые һандаргаагты, нангин шулуун баханануудыень бута сохигты, Ашэраагай баханануудые галдагты, бэшэ хэзээдэшье тэрэ газарта дурсагдахагүйгөөр бурхадайнь һиилэмэл хүрэгүүдые таһа сабшагты. 4Эзэн Бурхандаа таанад ондоогоор мүргэхэ ёһотойт. 5Эзэн Бурхантнай бүхы обогуудайтнай газар дайдада Өөрынгөө һуури шэлэн тодорхойлжо, тэндэ Өөрынгөө нэрэ баталха. Мүргэхэеэ таанад гансал тиишээ ерэхэ ёһотойт. 6Түгэс шатаалта үргэлөө, үргэлөө, ургасынгаа болон малай арбанай нэгэ хубиие, өөһэдынгөө хубиин үргэл, шахаа тангаригаартнай хараалагдаһан үргэл, өөһэдын һайн дуранай үргэл, томо болон жэжэ малай түрүүшын түл тиишээ асарагты. 7Тэндэ Эзэн Бурханайнгаа урда гэр хотоноороо эдеэ хоол баригты. Ямар ажал хэһэнээ, ямар үрэ дүн туйлаһанаа баяртайгаар мэдээсэн, Эзэн Бурхантнай таанадта эдэ бүгэдые үршөөгөө гээд һанан дурсан байхат.

8Хүн бүхэндэ юун зүб шэнгеэр һанагданаб, тиимээр лэ бидэ Бурхандаа мүргэдэг байгаабди. Харин тэндэ таанад тиигэжэ байха ёһогүйт. 9Эзэн Бурханайнгаа үгэжэ байһан амгалан тайбан газарта, тэрэ хубита газартаа, арай хүрөөгүй байнат. 10Харин Иорданиие гаталаад, Эзэн Бурханайтнай эзэлхыетнай үгэжэ байһан газар дайдада түбхинэхэдөө, тойроод байһан дайсадһаатнай Тэрэнэй амаруулхада, амгалан тайбан, аюулгүй ажаһуужа эхилхэдээ, 11Эзэн Бурханайтнай нэрэеэ нэрлүүлхэ газар шэлэн заахадань, тиишэнь минии хэлэһэн бүхы юумэ асарагты: түгэс шатаалта үргэлөө, үргэлөө, ургасынгаа болон малай арбанай нэгэ хубиие, өөрынгөө хубиин үргэл, Эзэндэ үргэһэн шахаа тангаригаартнай хараалагдаһан эрхим үргэл. 12Таанад үхи хүүгэдтэеэ хамта, зарасанартнай, хото һуурин соотнай байдаг левидүүд тэндэ ошожо, бултадаа Эзэн Бурханайнгаа урда хүхилдэгты. Левидүүд өөрын хуби газаргүй гээшые бү мартагты. 13Хараһан лэ газартаа түгэс шатаалта үргэл хэхэеэ тэбшэгты. 14Харин танай али нэгэн обогуудай эзэлдэг дайдын нэгэ газар Эзэнэй заахада, тэндэ түгэс шатаалта үргэл хэгты, мүн минии хэлэһэн юумые бултыень дүүргэгты.

15Гэхэтэй хамта, Эзэн Бурханайнгаа үршөөһэнэй хэмээр хэды малтай болонобши, тэрээнһээ дулдыдан, һанаһан лэ сагтаа, дураараа малаа үүсэлжэ, мяхыень эдихэдэтнай болохо. Бузартаһан ба арюун сэбэр хүншье тэрэниие гүрөөһэнэй гү, али зээрэнэй мяха эдиһэндэл адляар эдихэ аргатай. 16Гансал шуһыень эдихэ ёһогүйт, уһан шэнгеэр тэрэниие газарта адхагты. 17Бурханда үргэхэ үргэлөө – орооһо таряанайнгаа, үзэмэй дараһан архиингаа, мүн оливын тоһонойнгоо Бурханда үргэгдэхэ арбанай нэгэ хубиие, томо болон жэжэ малайнгаа түрүүшын түл, шахаа тангаригаартнай хараалагдаһан үргэл, өөһэдын һайн дуранай үргэл, хубиин үргэл ажаһуудаг газартаа бү эдигты. 18Эдэ бүгэдые Эзэн Бурханайнгаа урда, Тэрэнэй шэлэһэн газарта эдеэрэйт. Таанад хүбүүд, басагадтаяа, бүхы зарасанартаяа, хото соотнай байдаг левидүүдтэй хамта эдэниие эдижэ, Эзэн Бурханайнгаа урда хүхилдэн, хэһэн ажалаараа сэдьхэлээ ханан байгты. 19Ойлгогты, өөрынгөө газар дайда дээрэ байгаа бүхы үе сагтаа левидүүдтэй бүхы юумээрээ хубаалдажа байгты.

20– 21Эзэн Бурхантнай орон түрынтнай хилэнүүдые үргэдхэхөөр найдуулаа бэлэй. Тэрэнэй энэ хэрэг бүтээхэдэнь, шэлэн зааһан нангин үргөөһөөнь таанадай хэн нэгэнэй гэр дан холо үлэжэ магад. Холо байжа, мяха эдихэеэ һанабал, эдихэдэтнай хамаагүй. Эзэнэй үршөөһэн малһаа үүсэлхэдээ, минии хэлэһээр, гэртээ тэрэниие хэзээшье эдихэдэтнай болохо. 22Гүрөөһэ гү, али зээрэн эдиһэндэл адляар энэ мяха эдихэдэтнай болохо. Арюун сэбэршье, мүн бузартайшье хүнэй энээниие эдихэдэ хамаагүй. 23Гансал шуһа эдихэгүй гэжэ ехэ нарибшалаарай, юуб гэхэдэ, шуһан гээшэ ами наһан болоно, мяхантай хамта ами наһа эдижэ болохогүй. 24Шуһа бү эди, уһан мэтээр тэрэниие газарта адха. 25Эзэнэй захирһаар бүхы юумэ хээд байбалшни, шамда ба һүүлдэнь шинии уг удамда һайн байха. Шуһа бү эдеэрэй. 26Нангин зүйлөө, шахаа тангаригаар хараалагдаһан үргэлөө хэхэ гэбэл, Эзэнэйнгээ шэлэһэн газарта ошоорой. 27Тэндэ Эзэн Бурханайнгаа үргэлэй шэрээ дээрэ түгэс шатаалта үргэлэй мяха болон шуһые шатаан үргөөрэй; харин амгалан байдалай түлөө үргэлэй шуһа Эзэн Бурханайнгаа үргэлэй шэрээ дээрэ адхаад, мяхыень эдеэрэй. 28Минии захин хэлэһэн үгэнүүдые дуулажа, сахин дүүргэгты. Эзэн Бурхандаа аятай, һайн юумэ хэжэ байбалтнай, таанадта, мүн үри һадаһандатнай хэтын хэтэдэ һайн байхал.

Шүтөөнүүдтэ бү мүргэгты!

29Таанадай эзэмдэхэеэ ошожо байһан газарта бусад арадуудые Эзэн Бурханайтнай хюдахадань, тэдэ арадуудай газарые эзэмдэжэ, тэндэнь ажаһуудаг болоходоо, 30болгоомжологты! Эдэ арадуудай үгы хэгдэжэ байхада, урьхадань бү орогты, тэдэнэй бурхад тухай бү асуугты, «Тэдэ арадууд яажа бурхадтаа мүргэдэг байгаа гээшэб? Би мүн лэ тиимээр мүргэдэг болохоб», – гэжэ бү хэлэгты. 31Эзэн Бурхандаа тэдээндэл адляар бү хандагты. Эзэнэй жэрхэдэг, үзэн ядадаг юумые эдэнэр хэдэг, үхи хүүгэдээшье бурхадтаа үргэн, гал дээрэ шатаадаг байгаал! 32Минии таанадта захиһан юумэ бултыень дүүргэхэеэ оролдогты, хэлэһэндэм юушье бү нэмэгты, бү хороогты!