‏ Deuteronomy 14

Гашуудалай хорюултай ёһолол

1Таанад Эзэн Бурханайнгаа арад зон болонот. Хэн нэгэнэй наһа барахада, гашуудалай тэмдэг харуулан, өөһэдыгөө хадхажа, отолжо бү байгты, магнай дээрэхи үһэеэ бү хюһагты. 2Юундэб гэхэдэ, таанад Эзэн Бурханай нангин арад ха юмта. Дэлхэйн арадууд сооһоо Эзэн таанадыел Өөрынгөө арад болгохо гэжэ шэлэһэн байна.

Сээргүй ба сээртэй амитад

3Жэгшүүритэй муухай ямаршье юумэ бү эдигты. 4Таанадай эдижэ болохо амитад гэбэл: үхэр, хонин, ямаан, 5буга, зээрэн, боро гүрөөһэн, янгир, зэрлиг буха, оронго, аргали. 6Асатаһан туруутай, хибэдэһэ хибэдэг мал эдихэдэтнай болохо. 7Гансал тэмээ, туулай, дорго бү эдигты, юундэб гэхэдэ, тэдэнэр хибэдэһэ хибэдэгшье һаа, харин аса туруугүй. Тэдэнэр таанадта сээртэй. 8Тиигээд гахай аса туруутай байбашье, харин хибэдэһэ хибэдэггүй, тиимэһээ танда бузартай байха. Тэдэнэй мяханһаа бү эдигты, һэедэньшье гар бү хүрэгты; танда бузартай байха.

9Уһанай амитадһаа һэрбээтэй болон хашарһатай амитадые таанадай эдихэдэ болохо. 10Зүгөөр һэрбээгүй, хашарһагүй амитадые бү эдигты: тэдэ танда бузартай байха.

11Сээргүй ямаршье шубуу эдихэдэтнай болохо, 12– 13– 14– 15– 16– 17– 18харин элдэб янза түрэлэй иимэ шубуудые эдижэ болохогүй: бүргэд, бэгсэргэ, харсага, нашан харсага, элеэ, ёло, хирээ, тэмээн хяруул, шара шубуун, сахали, хилэн шубуун, хүхэ дэглээ, хотон шубуун, суусагаалжан, бүбөөлжэн, һарьһан баабгай.

19Далитай бүхы хорхой шумуул таанадта сээртэй, тиимэһээ тэдэниие бү эдигты, 20харин сээргүй алишье шубуу эдихэдэтнай болохо.

21Үхэһэн амитадай һэе бү эдигты. Танай хотодо байгша ерүүл хариин хүндэ тэрэниие үгэгты, үгышье һаа, худалдагты, тэрэ эдиг. Юуб гэхэдэ, таанад Эзэн Бурханайнгаа нангин арад ха юмта.

Эшэгые эхынь һүн соо бү шанагты.

Арбанай нэгэ хуби тухай

22Жэл бүри ургуулдаг ургасынгаа арбанай нэгэ хубиие амяарлан орхи. 23Тиигээд Эзэн Бурханайнгаа нангин үргөөдэ ошожо, Тэрэнэй урда таряанайнгаа, үзэмэй дараһан архиингаа, оливын тоһоной арбанай нэгэ хубииень, мал һүрэгэйнгөө түрүүшын түл эдеэрэй. Иигэжэ ши Эзэн Бурханаа хододоо хүндэлжэ, түбэгшөөжэ һурахаш. 24Эзэн Бурханайтнай нангин үргөө шамһаа холо байба гэел даа. Тэрэнэй үршөөһэн ургаса, мүн түлэй арбанай нэгэ хубиие тиишэнь абаашажа шадахагүй байгаа һаа, 25эдэ бүгэдэеэ худалдаад, мүнгэн болгоод, Эзэн Бурханайнгаа нангин үргөөдэ тэрэ мүнгөө абаад ошоорой. 26Тиигээд тэрэ мүнгөөрөө һанаһан юумэеэ худалдан аба: үхэр, хони, үзэмэй дараһан архи, шара ундаа, һанаһан бүхы юумэеэ. Гэр бүлэтэеэ хамта тэндэ Эзэн Бурханайнгаа урда эдеэлэ, сэнгэ.

27Гэбэшье шинии хотодо ажаһуудаг левидүүд тухай бү марта. Юундэб гэхэдэ, шамда орходоо тэдээндэ газарай хуби үгы ха юм. 28Гурбан жэлэй үнгэрхэ эсэстэ жэлэй ургасын, мүн түлэйнгөө арбанай нэгэ хубиие суглуулжа, хото соогоо нөөсэлдэг бай. 29Тиихэдэш өөрын хубиин газаргүй левидүүд, ерүүл зон, шинии хотын үншэн хэнзэнүүд, бэлбэһэн эхэнэрнүүд ерэжэ, садатараа эдеэлжэ байг. Иигээд байгаа һаашни, Эзэн Бурханшни хэһэн хэрэг бүхэнииеш үреэхэл.