Deu 15 | BxrBBL2024 | STEP | Долоон жэлэй үнгэрхэ эсэстэ зоной үриень хүлисэ.

‏ Deuteronomy 15

Үри хүлисэхэ тусхай жэл

1 Долоон жэлэй үнгэрхэ эсэстэ зоной үриень хүлисэ. 2 Энэ яагаад хэгдэхэб гэхэдэ, нэгэ яһанай болохо хүндэ зөөри, мүнгэ хэн нэгэн зээлеэр үгэһэн байгаа һаа, тэрэниие хүлисэжэ, нэгэ уг унгиин энэ хүнһөө үриеэ бү нэхэг. Юуб гэхэдэ, тэрэ жэлдэ үри хүлисэхэ ёһотой гээд Эзэн тунхаглаһан байна. 3 Хариин хүнһөө үриеэ нэхэхэдэш болохо, гэбэшье Израилиин уладай үритэй нэгэндэ үриень хүлисэ.

4 Танай орон нютагта үгытэй хүн бү үзэгдэг. Эзэн Бурхан танай хуби гээд эдлэхыетнай тэрэ газар үгэнэ, таанадые үреэхэл. 5 Эзэн Бурханайнгаа үгэ дуулажа, минии мүнөөдэр дамжуулан хэлэһэн бүхы захяа заабаринуудые сахин дүүргэхэеэ оролдоо гээшэ һаатнай, эдэ бүгэдэ хүсэлдэхэ байна. 6 Найдуулһанайнгаа ёһоор, Эзэн Бурхантнай таанадые үреэхэ, тиихэдэнь ондоо арадуудта урьһаар үгэхэ мүнгэтэй, баян һуухат, өөрөө хэнһээшье мүнгэ урьһалхагүйт. Таанад олон арадуудые зонхилон һуухат, харин тэрэ арадуудай нэгэнииньшье таанадые захиран зонхилхогүй.

7 Эзэн Бурханайшни үгэжэ байһан газарта ажаһууха үедэш нэгэ хотодо шинии арад зонһоо хэн нэгэн үгыржэ болохо. Хатуу, шэрүүн сэдьхэлтэй бү бай, үгытэй угсаатандаа туһалхаяа бү арса. 8 Тэрээндэ заабол туһала, хамһалса, хэрэгтэй юумыень урьһаар үгэ. 9 «Долоодохи жэл, үри шэри хүлисэхэ жэл, ойртоо» гэһэн муу һанаан толгойдош орожо, үгытэй угсаатандаа шэрүүнээр хандан, тэрээндэ туһалхаяа арсахаһаа болгоомжоло. Юуб гэхэдэ, тэрэ Эзэндэ шам тухай гомдол бариха, тиихэдэнь ши зэмэтэй болохош. 10 Тэрээндэ эриһэн юумыень үгэ, үгэжэ байхадаа сэдьхэлдэшни бүглэржэ бү байг. Юуб гэхэдэ, энэ хэрэгэй түлөө Эзэн Бурханшни бүхы ажал хэрэгүүдыеш, бүтээжэ байгаа бүхы юумыеш үреэхэ. 11 Газар дэлхэй дээрэ үгытэй нэгэ тэды израильшууд хододоо байха. Тиимэһээ үгытэй угсаатандаа туһалхые, өөрынгөө орон нютагай гуйраншанда туһалжа байхые би шамда захирнаб.

Богоолые сүлөөдэ табиха тухай

12 Еврей яһанай эрэ гү, али эхэнэрэй богоол болон, шамда бэеэ худалдаад, зургаан жэл соо тэрэшни шамда зарагдабал, долоодохи жэлдэнь тэрэниие сүлөөдэ табяарайш. 13 Сүлөөдэ табихадаа, тэрэниие хооһоор бү эльгээгээрэй. 14 Өөрынгөө таряа талханһаа, мал адууһанһаа, үзэмэй дараһан архи хорзоһоо харамнангүй тэрээндэ үгэ. Эзэн Бурханайшни үршөөһэн юумэнһээ хубаалда. 15 Египедэй газар дайдада богоол байһанаа, Эзэн Бурханайшни шамайе сүлөөлһые бү марта. Тиимэһээл би мүнөө шамда захиржа захижа байна ха юмбиб.

16 Хэрбээ богоолойшни шамда болон гэр бүлэдэш дуратай байһан, һайн байһан ушарһаа танайда үлэхэеэ һанажа, гаран ошохоо арсаа һаань, 17 шүбгэ абажа, шэхээрнь үүдэн руу нэнгүүлжэ, шэхыень нүхэлэ. Энэ хадаа тэрэнэй хэтэ мүнхэдөө шинии богоол болоһоной тэмдэг юм. Богоол эхэнэрэйшье шэхэ иимээр нүхэлөөрэй. 18 Сүлөөдэ богоолые табихадаа, бү хара буу, юуб гэхэдэ, тэрэ зургаан жэл соо хүдэлжэ, шинии хүлһэлжэ абаха ажалшанай түлбэриин хахадайнь түлөө хүдэлөө бшуу. Иигэжэ хэрэг бүхэнииеш Эзэн Бурханшни үреэхэл.

Малай түрүүшын түл

19 Томо болон жэжэ малайнгаа түрүүшын эрэ түлые Эзэн Бурхандаа тусгаарлан орхи. Иимэ тугал ажалда бү хэрэглэ, иимэ хурьганай нооһошье бү хайшала. 20 Эзэн Бурханайнгаа урда, нангин үргөөдэ жэл бүри гэр бүлөөрөө тэрэниие эдеэрэй. 21 Малда ямар нэгэн дутагдал – дохолон гү, али һохор, үгышье һаа, үшөө ондоо дутуу дундатай байгаа һаань, тэрэниие Эзэн Бурхандаа бү үргэ. 22 Ши тэрэниие гэртээ эди. Арюун, мүн бузартайшье хүнэй эдихэдэ хамаагүй, гүрөөһэн, зээрэнэй мяха эдиһэндэл адляар тэдэ эдиг лэ. 23 Гансал малай шуһа бү эди, уһан шэнгеэр тэрэниие газар руу адха.