‏ Deuteronomy 16

Паасха

1Авиив гэһэн һарада Паасха гэһэн һайндэр һайндэрлэжэ, Эзэн Бурханаа хүндэлэгты. Юуб гэхэдэ, авиив һарада һүниндөө Тэрэ таанадые Египедһээ гаргаа бэлэйл. 2Эзэнэй нангин үргөөдэ үхэр, хонёор Паасхын үргэл хээрэйгты. Энэ үргэл Эзэн Бурхандашни зорюулагдаха ёһотой. 3Эһээһэн талхаар бариһан хилээмэ Паасхын үргэлтэй хамта бү эдигты. Долоон үдэр эһээбэригүй талхаар болгоһон хилээмэ Паасхын үргэлтэй хамта эдеэрэйгты, Египедэй газар дайдаһаа яаралтайгаар гаран ошоходоо иимэ хилээмэ эдеэ бэлэйлта. Эдигты энэ гай зоболонгой хилээмэ, Египедһээ гараһан тэрэ үдэрые амиды мэндэ байһан сагтаа һанан байгаарайт. 4Танай газар нютагта долоон хоногой туршада хэндэшье эһээбэри байха ёһогүй. Тиихэдэ түрүүшын үдэр боро хараанаар үргэһэн мяханһаа үглөөгүүр болотор юуншье үлэнгүй эдигдэхэ ёһотой.

5– 6Малаар Паасхын үргэл гансал Эзэнэй нангин үргөө соо хээрэйгты. Эзэн Бурханайтнай танда үршөөжэ байһан газарта хаа-хаанагүй иимэ үргэл хэжэ болохогүй. Үдэшэлэн, наранай орохо үедэ, таанадай Египедһээ гараһан сагта Паасхын үргэл хээрэйгты. 7Эзэн Бурханайнгаа нангин үргөөдэ мяха шанажа эдеэрэйгты, тиигээд үглөөдэрынь гэртээ харихадатнай болохо. 8Эһээбэригүй талхаар болгоһон хилээмэ зургаан хоногой туршада эдигты, харин долоодохи үдэртөө нангин суглаагаа үнгэргэжэ, ямаршье ажал бү хэгты.

Ургаса Хадалгын һайндэр

9Ургаса хадажа эхилһэн сагһаа хойшо долоо дахин долоон хоногые тоолоорой. 10Тиигээд Эзэн Бурханайнгаа нэрэ хүндэдэ Ургаса хуряалгын һайндэр һайндэрлэгты, Эзэн Бурханайтнай таанадые үршөөһэнэй хэмжүүрээр, юрэдөө, шадалайнгаа аяар Тэрээндэ үргэл хээрэйгты. 11Эзэнэй нангин үргөөдэ таанад үхи хүүгэдтэеэ, зарасанараараа, левидүүдтэй, ерүүл зонтой, танай хотын үншэн хэнзэнүүдтэй, бэлбэһэн эхэнэрнүүдтэй хамта Эзэн Бурханайнгаа урда хүхилдэгты. 12Египедтэ богоол байһанаа бү мартагты, тиигэжэ эдэ хуулинуудые сахин гүйсэдхөөрэйгты.

Майхангуудай һайндэр

13Таряагаа тээрмэдэһэнэй, үзэмэй модонойнгоо шүүһэ даража дүүргэһэнэй удаа Майхангуудай һайндэр һайндэрлэгты. 14Таанад үхи хүүгэдээрээ, богоолнуудтаяа, левидүүдтэй, ерүүл зонтой, танай хотын үншэн хэнзэнүүдтэй, бэлбэһэн эхэнэрнүүдтэй хамта һайндэрэй үедэ хүхилдэгты. 15Эзэнэй нангин үргөөдэ долоон хоногой туршада Тэрэниие магтан һайндэрлэгты. Ургасыетнай, бүхы ажал хэрэгүүдыетнай Эзэн Бурханай үреэһэн ушарһаа таанад сэдьхэл дүүрэн сэнгэгты.

16Танай үндэһэ яһанай бүхы эрэ зон Эзэн Бурханайнгаа нангин үргөөдэ жэлдээ гурба дахин ерэхэ ёһотой: Паасхын, Ургаса хуряалгын һайндэр болон Майхангуудай һайндэрнүүдэй үедэ. Ерэхэдээ, Эзэнэй урда гар хооһон бү ерэгты. 17Эзэн Бурханайнгаа үршөөн үгэһэнэй хэмээр, шадалайнгаа аяар хүн бүхэн бэлэг асараг лэ.

Зарга хэрэгүүдые шиидхэлгэ

18Эзэн Бурханайнгаа үршөөһэн бүхы хото соо обог бүхэндэ хэрэг шүүн шиидхэгшэдые болон ахамадуудые томилон табигты. Тэдэнэр улад зоной хэрэгүүдые зүбөөр шиидхэжэ байг лэ. 19Тэдэ хуули гурим хазагайруулха, нюур илгажа байха ёһогүй. Эдилгэ бү аба, юуб гэхэдэ, эдилгэ хадаа сэсэн хүниие һохор болгодог, үнэн шударга хүниие худалша болгодог. 20Үнэн шударга, гансал үнэн шударга байхаяа эрмэлзээрэй! Тиигэбэл, Эзэн Бурханайнгаа үгэжэ байгаа газарые эзэмдэн, амар мэндэ ажаһуухат.

Бусад бурхадые шүтэлгэ

21Эзэн Бурхандаа үргэлэй шэрээ бүтээхэдээ, Ашэраа бурханай модо хажуудань бү һуулгагты, ямаршье модо бү һуулгагты. 22Шүтөөнүүдтэ мүргэхэ шулуун бахана бү бодхоогты, юуб гэхэдэ, Эзэн Бурхантнай энээниие үзэн ядадаг.
Copyright information for BxrBBL2024