‏ Deuteronomy 20

Дайн тухай ёһо гуримууд

1Дайсадайнгаа урдаһаа байлдаанда гарахадаа, таанадһаа олон моритой, дайшалхы тэргэтэй, сэрэгтэй байһыень обёороод, бү айгты, юуб гэхэдэ, Египедһээ гаргаһан Эзэн Бурхантнай таанадтай байһаар. 2Байлдаанда гарахадатнай санаартан дүтэлөөд, сэрэгшэдтэ хандаг, 3иигэжэ хэлэг: «Израилиин арад, соносогты! Мүнөөдэр таанад байлдаанда орохотнай. Хатуу шанга зоригтой байгты, тэдээнһээ бү айгты, бү тэбдэгты, бү һүрдэгты! 4Юундэб гэхэдэ, таанадай түлөө дайсантай тулалдахын, диилүүлхын тула Эзэн Бурхантнай таанадтай хамта ябана». 5Ахамадууд сэрэгшэдтэ иигэжэ хэлэг: «Шэнэ гэр баряад, арюудхалгын ёһолол хээгүй хүн хэн байнаб? Ондоо хүнэй гэрыень арюудхахагүйн тула тэрэ хүн гэртээ бусаг. Юуб гэхэдэ, байлдаанда тэрэ унажа магад. 6Хэн нэгэн үзэмэй модоной сэсэрлиг тарижа, жэмэсыень амталаагүй байбал, гэртээ бусаг. Ушар гэхэдэ, тэрэ байлдаанда унажа магад, тиихэдэнь ондоо хүн тэрэнэй жэмэс суглуулхал. 7Хэн нэгэн басага хадамлаад, үшөө гэрлээгүй байбал, гэртээ бусаг. Юуб гэбэл, тэрэ дайнда унажа магад. Тиигэбэлнь, ондоо хүн тэрээнтэйнь гэрлэхэ бшуу».

8Ахамадууд нэмэн иигэжэ хэлэг: «Хэн аймхайб, дээрэ зүрхэтэйб, бэшэ зониие һажаалдуулхагүйн, зоригыень мүхөөхэгүйн тула гэртээ бусаг». 9Арад зондо хэлэхэ юумэеэ хэлээд, ахамадууд сэрэгшэдые хүтэлхэ сэрэгэй дарганарые томилог.

10Эзэмдэхэ зорилготойгоор хото руу дүтэлхэдөө, байлдаа хэнгүй эбээ ойлголсохые ажаһуугшадтань дурадхагты. 11Хэрбээ тэдэ таанадтай үгэеэ ойлголсохоёо һанажа, бартануудаа сэлеэ һаа, таанадта ясаг түлэхэ, ажалыетнай хэхэ ёһотой. 12Хэрбээ тэрэ хотынхидой таанадта бэеэ тушаахаһаа арсажа, урдаһаатнай эсэргүүсэн дайлалдабалнь, тэрэ хотые бүһэлэгты. 13Эзэн Бурхантнай тэрэниие эзэлхэдэтнай туһалха, тиихэдэнь бүхы эрэшүүлыень һэлмээр хороогооройгты. 14Харин эхэнэрнүүдые, үхи хүүгэдые, адуу мал болон хото соо байгаа бүхы юумэ өөртөө абахадатнай болохо; Эзэн Бурханайнгаа туһаар дайсадаа диилээт, иигэжэ тэдэнэй зөөриие олзо болгон абажа, эдлэхэдэтнай болохо. 15Танһаа угаа холо хотонуудта (хажуудахи арадуудайтнай хото бэшэл һаань), бултандань тон иимээр лэ хандаарайгты.

16Харин Эзэн Бурханайнгаа эзэлхыетнай үгэжэ байһан тэрэ газарай хотонууд соо нэгэшье халуун ами бү үлөөгты, бултыень алагты! 17Хээт, эмоор, ханаһаан, пэриззии, хиив, евүүс гэдэг арадуудые дууһан хюдаарайгты, юуб гэхэдэ, Эзэн Бурхантнай таанадта тиигэжэ захираа бэлэй. 18Өөһэдынгөө бурхадта һүгэдэн хэдэг жэгшүүритэй муухай юумэ тэдэнэй таанадта заахагүйн тула, тиигээд Эзэн Бурханайнгаа урда нүгэл та бүгэдын хэхэгүйн тула тэдэниие хюдагты.

19Эзэлхэ зорилго табижа, хотые удаан сагта бүһэлөөд байбашье һаа, алим жэмэстэ мододыень бү эбдэгты. Тэдэнэй үрэ жэмэсээр хооллоходо болохо бшуу. Оршон тойронхи байгаалиие ханха зайдан бү болгогты, юуб гэхэдэ, талын модон танһаа хоргодон хорохо хүн бэшэ ха юм даа. 20Эдихэ жэмэс үгэдэггүй модод гээд һайн мэдэхэ мододоо орбонгоорнь унагаажа, дайлажа байһан хото эзэлтэрээ урдаһаань бүхэлэлтэ тэрээгээр лэ хэхэдэтнай болохо.
Copyright information for BxrBBL2024