Deu 21 | BxrBBL2024 | STEP | Эзэн Бурханайтнай үгэжэ байһан газар дайдада алуулһан хүн олдобол, теэд хэн тэрэниие хороогооб гэжэ мэдэхын аргагүй байгаа һаань,

‏ Deuteronomy 21

Хүниие алаһан ушар тухай

1 Эзэн Бурханайтнай үгэжэ байһан газар дайдада алуулһан хүн олдобол, теэд хэн тэрэниие хороогооб гэжэ мэдэхын аргагүй байгаа һаань, 2 шинии аха захатан болон шүүбэрилэгшэд ошожо, алуулһан хүниие тойроод оршогшо хотонууд хүрэтэр зай хэмжэг лэ. 3 Алуулһан хүндэ дүтэ хотые элирүүлхэдээ, тэрэ хотын аха захатан нэгэшье хүллэгдөөгүй, ажалда хэрэглэгдээгүй залуу үнеэ шэлэн абажа, 4 элдүүрилээгүй, үрэһэ хүрэнгэ таряагүй эрьетэй, шэргэдэггүй горхон руу абаашаад, тэндэ, горхоной хажууда, тэрэ залуу малай амарга хүзүүень хухалаг. 5 Санаартан, Левиин үри һадаһад, тиишээ дүтэлэг, юуб гэхэдэ, Эзэн Бурхантнай тэдэниие өөртөө алба хүүлэхын, мүн Эзэнэй нэрээр зониие тэдэнэй юрөөхын тула шэлээ ха юм. Бүхы зарга хэрэгүүдые, гэмтэхэ хохидохо бүхы ушарнуудые эдэнэр лэ шиидхэдэг бшуу. 6 Үнөөхи алуулһан хүндэ хамагһаа ойро оршодог хотын бүхы аха захатан залуу малай хүзүү хухалан мушхаһанай удаа дээрэнь гараа угааха ёһотой. 7 Тиигээд тэдэнэр иигэжэ хэлэг: «Манай гарһаа энэ хүн гээгдээ бэшэ, энэ хэрэгые хараа бэшэбди. 8 Оо, Эзэн! Танай Египедһээ сүлөөлһэн Өөрын арад Израилиие хүлисыт. Гэм зэмэгүй хүниие алаһан ушарые Өөрынгөө арадта, Израильда, бү тохыт». Иигэжэ урдахуулһан шуһанай түлөө таанад зэмэтэй бэшэ болохот. 9 Иигэжэ таанад гэм зэмэгүй хүнэй шуһа урдахуулһанһаа гэмээ арюудхахат. Энэ болбол Эзэндэ таатай.

Баряанда байһан эхэнэр тухай

10 Шинии дайнда мордоходо, Эзэн Бурхантнай дайсадые диилүүлбэ гэлэй. Тэдэниие баряанда абаха үедөө 11 дундань сэбэр һайхан эхэнэрые ши хаража, дурлажа, тэрээгээр һамга хэхэеэ һанабал, 12 гэртээ асара. Тиигээд тэрэ толгойгоо хюһаг, хюмһаяа абаг, 13 баряанда байһанайнгаа хубсаһа һэлгэг. Тиигээд гэртэшни байжа, һарын туршада эсэгэ, эхэ тухайгаа гашуудаха. Һүүлдэнь ши тэрэнэй үбгэн, тэрэшни шинии һамган болохо аргатай. 14 Удаань тэрээндэ дурагүй болоо һаа, һанаһан тээшэнь таби, гэбэшье тэрэниие бү худалдаарай, богоол бү болгоорой, юуб гэхэдэ, тэрэниие хүсөөрөө һамган болгоо ха юмши.

Ууган хүбүүнэй эрхэ

15 Хэн нэгэн хоёр һамгатай байжа, нэгэндэнь дуратай, нүгөөдэдэнь дурагүй байба гэел даа. Тиигээд хоюулаа тэдэнь хүбүүдые түрөөд, дурагүй һамганһаань хүбүүн түрүүн гараа гээшэ һаань, 16 хүбүүдэйнгөө дунда эд зөөриеэ хубаарилхадаа, тэрэ хүн дурагүй һамганһаа гараһан хүбүүндээ хүртэхэ зөөриие дуратай һамганһаа гараһан хүбүүндээ үгэхэ ёһогүй. 17 Дурагүй һамганһаань гараһан ууган хүбүүгээ мэдэржэ, байһан зөөриһөө хоёр дахин ехээр хуби тэрээндэ үгэхэ ёһотой. Юуб гэхэдэ, тэрэ эрэ шадал хүсэнэйнь дээжэ болоно, түрүүлэн гараһан эрхэ түлөөлгэтэй.

Үгэ дууладаггүй хүүгэд тухай

18 Хэн нэгэнэй хүбүүн үсэд, һөөргэдэдэг, эхэ, эсэгынгээ үгэ дууладаггүй, һургаал заахадань, үгыень дууладаггүй һаань, 19 эхэ, эсэгэнь тэрэниие абажа, хотынгоо аха захатанда, хотын бартаануудай дэргэдэ асараг. 20 Тиигээд хотынгоо аха захатанда иигэжэ хэлэг: «Энэ манай хүбүүн үсэд, һөөргэдэдэг, манай үгэ дууланагүй, мүнгэ дэмы үригшэ, архинша». 21 Тиихэдэнь хотын бүхы ажаһуугшад тэрэ хүбүүе шулуудажа алаг. Иигэжэ өөһэдһөө муу муухай юумэ зайсуулхат. Израилиин бүхы улад зон энээн тушаа дуулажа, айхал.

Саазын һүүлээрхи хуули ёһо

22 Хэн нэгэнэй ами наһыень таһалдуулма гэмтэ ябадал хээ гээшэ һаань, тэрэниие алахадаа, бэеынь модондо үлгэжэ, 23 һүниндөө модондо орхихо ёһогүйт. Тэрэл үдэр тэрэниие хүдөөлүүлэгты, юуб гэхэдэ, модондо үлгөөтэй хүн Бурханай урда хараалай ехэ хараалтай. Эзэн Бурханайнгаа эдлэхыетнай үгэжэ байһан газар дайда бү бузарлагты.