‏ Deuteronomy 23

Эзэнэй улад зоной тоодо хэн байха ёһогүйб

1Эмнюулһэн гү, али гэмтэһэн заһаатай хүн Эзэнэй улад зоной дунда тоологдохо ёһогүй.

2Тэдэнэй дунда мүн лэ янхан эхэнэрэй хүбүүнэй байхань хорюултай. Тэрэнэй уг удам арбадахи үе хүрэтэрөө Эзэнэй зонтой хамтарха ёһогүй.

3Аммоон болон моһааб арадуудай хэн нэгэн, мүн үри хүүгэдынь арбадахи үе хүрэтэрөө Эзэнэй арад зонтой хамта байха эрхэгүй. Хэзээшье! 4Юуб гэхэдэ, таанадай Египедһээ гараад ябаха үедэ тэдэнэр хара уһа, хилээмэ таанадһаа харамнаа бэлэй. Үшөө таанадта хараал шэнгээхыень Месопотамиин Пэтоор хотын Бэһоорой хүбүүн Балаһаамые тэдэнэр хүлһэлөө һэн. 5Теэд Эзэн Бурхантнай Балаһаамай үгэ дуулаагүй, тэрэнэй хараалые танда үреэл болгон хубилгаа, юундэб гэхэдэ, Эзэн Бурхантнай танда дуратай. 6Амиды мэндэ байгаа сагтаа аммоон болон моһааб арадуудта ажана амгалан байдал бү хүсэгты, тэдээндэ бү туһалагты.

7Эдоом арадые шоо бү үзэгты, юуб гэхэдэ, тэдэнэр таанадтай аха дүү арадууд болохо. Египедэй арад зониие мүн лэ шоо бү үзэгты, юуб гэхэдэ, таанад тэдэнэй газар дайдада ерүүл зон байгаа ха юмта. 8Тэдэнэй гурбадахи үеын үхибүүд Эзэнэй улад зоной дунда тоологдохо аргатай.

Буусаяа сэбэр байлгагты

9Дайсадайнгаа урдаһаа байлдан ошоходоо, бузартаха ушарһаа һэргылэн байгты. 10Хэрбээ һүниндөө хэн нэгэнэй үрэнь гаража, мэдэнгүй гэнтэ бузарлагдаа һаа, тэрэ хотон хүреэнһөө гаража ошог, тиигээд һөөргөө бү оруужан. 11Үдэшэ болоходонь, тэрэ бэеэ уһаар угааха, тиигээд наранай ороходо, һөөргөө хотон хүреэндээ бусаха аргатай.

12«Мори хараха» газартнай хотон хүреэнһөө гадуур байха ёһотой. 13Дайнай зэр зэбсэгһээ гадна ондоо модо абаад ябагты. Бэеэ заһахадаа, тэрээгээр нүхэ малтажа, үдхэнөөр гараһанаа булагты. 14Юундэб гэбэл, Эзэн Бурхантнай таниие хамгаалхын, мүн дайсадаа диилэхэ, даагаяа һүүлдэхэдэтнай туһалхын тула хотон хүреэндэтнай таанадтай хамта байлсана. Тиимэһээ Тэрэнэй муухай юумэ хараха үзэхэгүйн, тиигээд таанадые орхихогүйн тула хотон хүреэнтнай арюун байха ёһотой.

Элдэб хуули ёһонууд тухай

15Ямар нэгэ богоолой эзэнһээ тэрьелжэ ерээ гээшэ һаань, тэрэниие эзэндэнь бү бусаа. 16Таанадай хажууда, шэлэһэн хото соогоо тэрэ ажаһуун байг лэ, ши тэрэниие бү харшала.

17Шажан мүргэлэй тусхай ёһолол – хурисалда бэеэ зорюулһан эмэ, эрэшье хүн Израилиин улад зоной дунда бү үзэгдэг. 18Эзэн Бурханайнгаа үргөө руу ямаршье ёһо гуримаар үндэһэлэн янхан эхэнэрэй гү, али янхан эрын олоһон мүнгэ бү оруулагты. Юуб гэхэдэ, эдэ бүгэдэ Эзэн Бурхандатнай жэгшүүритэй муухай юумэн гээшэ.

19Өөрынгөө арад зоной хэн нэгэндэ мүнгэ гү, али эдеэ хоол, үшөөшье ондоо юумэ зээлеэр үгөө гээшэ һаа, түрэсэ тэрээнһээ бү нэхэ. 20Хариин хүнһөө түрэсэ абахадаш болохо, гэбэшье нэгэ арад яһанай болохо хүнһөө тэрэниие бү аба. Тиигээд байбалшни, Эзэн Бурхантнай эзэмдэхэеэ ошожо ябаһан газар дайдадашни шинии бүхы хэрэг үреэн байхал.

21Эзэн Бурхандаа дашаа тангариг үгөө хадаа тэрэниие удаан болгонгүй бэелүүлэ. Юуб гэхэдэ, Эзэн Бурхантнай заабол тэрэниие шамһаа нэхэхэ, дүргээгүй һаа, нүгэлтэй болохош. 22Дашаа тангариг үгөөгүй һаа, нүгэлгүй байхаш. 23Эзэн Бурхандаа һайн дураараа тангариг үгэнэш, тиимэһээ аманһаа унаһан үгэеэ дүүргэхэеэ оролдо.

24Израилиин хүнэй үзэмэй модоной сэсэрлигтэ ороходоо, үзэм хэдышье һаа, садатараа эдихэдэшни болохо, гансал амһарта руугаа тэрэниие хэжэ бү абааша. 25Израилиин хүнэй надхажа байгаа таряаланда ерэхэдээ, гараараа хоолос шобторон, орооһо эдихэдэшни болохо, харин хадуур далайжа, тэрэнэй ургаса бү олзоборило.