‏ Deuteronomy 24

Һамга абаха мүн һалаха ушарнууд

1Хэрбээ хэн нэгэн һамга абаад, удаань тэрээндэ хандасань хубилжа, тэрээнһээ жэрхэжэ эхилээ һаа, һалаха тухай гэршэлгэ бэшэжэ, гартань барюулаад, гэрһээ эльгээг. 2Тэрэ һамган гэрһээнь гаража ошоходоо, ондоо хүндэ хадамда гаража болохо. 3Теэд нүгөөдэшье үбгэнэйнь тэрээндэ дурагүйтэжэ, һалаһан тухай гэршэлгэ бэшэжэ үгөөд, гэрһээ эльгээгээ һаань, үгышье һаа, наһа бараа һаань, 4түрүүшын үбгэниинь тэрэниие дахин һамга абаха ёһогүй. Юуб гэхэдэ, тэрэ һамган бузарлагдаа. Энэ хэрэг Эзэндэ жэгшүүритэй муухай байхал. Эзэн Бурханайнгаа хуби болгон үгэжэ байһан газар дайда дээрэ иимэ нүгэл шэбэл бү хэгты.

Бусад ёһо гуримууд

5Хэн нэгэн һая һамга абаа гээшэ һаа, дайн дажарта бү мордог, ямаршье ажал тэрээндэ даалгаха хэрэггүй. Нэгэ жэлэй туршада тэрэ сүлөөтэй гэртээ байжа, залуу һамгаяа жаргуулха ёһотой.

6Урьһаар хэн нэгэндэ юумэ үгэһэнэй түлөө орондонь барюулга гэжэ хэншье тэрэнэй шулуун тээрмэ абаха ёһогүй. Юуб гэхэдэ, ами наһаяа залгадаг бүхы эдеэ хоолыень тэрэ хуряан абаһандал болоно ха юм.

7Ямар нэгэн хүнэй өөрынгөө Израилиин арад түмэнһөө хэнииешьеб хулгайлжа, богоол болгон худалдаа гээшэ һаань, тэрэниие алаха хэрэгтэй. Иигэжэ өөһэдынгөө дундаһаа муу юумэ сарагты.

8Арһанай халдабарита үбшөөр үбшэлөө гээшэ һаа, левит санаартадта минии дамжуулһан бүхы һургаалнуудые жэншэдгүй сахин дүүргэн байгты. 9Египедһээ гараад ябажа байхадатнай Эзэн Бурханайтнай Мириамда юу хэһые бү мартагты.

10Хүндэ зээлеэр юушьеб үгөө гээшэ һаа, тэрэнэй түлөө барюулга абахын тула гэртэнь бү оро. 11Газаа байгаарай. Шамһаа урьһалһан тэрэ хүн барюулга гэжэ хубсаһаяа гэрһээ өөрөө гаргажа үгэг лэ. 12Тэрэнэй үгытэй гээшэ һаань, һүниндөө тэрэ барюулгыень өөртөө бү байлга, 13тэрэл үдэшэндөө бусаагаарай, тиихэдэшни тэрэ унтаха хубсаһатай боложо, шамайе үреэхэл. Эзэн Бурхантнай зүб, һайн хэрэг хээ гэжэ шамайе тоолохо.

14Нэгэ яһанай гү, али танай газар дайдада, танай хото соо ажаһуудаг ерүүл хүншье һаань, хүлһэншэниие, үгытэй, мүн угаа ядуу байдалтай хэн нэгэниие бү харшала. 15Наранай орохын урда тээ үдэрэйнь түлбэриие үгэдэг бай, юуб гэхэдэ, тэрэ үгытэй, тиигээд энэ мүнгэ ехэ хүлеэнэ. Түлөөгүй һаашни, тэрэ Эзэндэ шам тухай гомдол бариха, тиигээд ши нүгэлтэй болохош.

16Үхибүүдэйнь хэһэн гэмтэ ябадалай түлөө эсэгэнэрынь, эсэгэнэрэйнь хэһэн гэмтэ ябадалай түлөө үхибүүдынь саазалжа болохогүй. Харин өөрын хэһэн гэмтэ ябадалайл түлөө хүн үхэлэй саазада хүртэхэ зэргэтэй.

17Ерүүл хүниие, үншэн хэнзые гажа буруу бү шүүбэрилэ. Зээлеэр абаһан юумэнэйнь түлөө барюулга болгон бэлбэһэн эхэнэрэй хубсаһа бү аба. 18Египедтэ богоол байһанаа, Эзэн Бурханайтнай тэндэһээ таанадые гаргажа сүлөөлһыень бү мартагты. Тиимэһээ би таанадта эдэ бүгэдые үгытэй зоной аша туһада хэхыетнай захирнаб.

19Өөрынгөө таряалан дээрэ ургаса хадажа байхадаа, поолидо нэгэ боолто таряа мартаа гээшэ һаа, һөөргөө бү эрье. Ерүүл хүндэ, үншэн хэнзэдэ, бэлбэһэн эхэнэртэ тэрэ хүртэг. Тиигэбэлшни, Эзэн Бурхантнай бүхы хэһэн юумыешни үреэхэл. 20Оливын модо сохин, жэмэсыень суглуулжа байхадаа, һөөргөө эрьен, үлөөшыень суглуулжа бү бай. Ерүүл хүндэ, үншэн хэнзэдэ, бэлбэһэн эхэнэртэ тэрэ үлэг.

21Үзэмэй жэмэсэй сэсэрлигһээ үзэм хуряагаад, үлөөшыень дахин бү түү. Эдэ бүгэдэ ерүүл хүндэ, үншэн хэнзэдэ, бэлбэһэн эхэнэртэ үлэг лэ. 22Египедтэ богоол байһанаа бү мартагты. Тиимэһээл би иимэ юумэ захирнаб.