‏ Deuteronomy 32

1Огторгой, анхара, би хэлэхэмни,
газар, шагна минии үгэнүүдые.
2Багахан дуһалнуудай зүлгэ ногоон дээрэ унаһандал,
зөөлэн ногоон дээрэ аадарай адхарһандал,
һургаални бороо мэтэ адхарха, үгэнүүдни шүүдэр мэтэ унаха.
3Эзэнэй нэрэ дуулан магтанаб!
Бурханайнгаа агууехые магтагты!
4Тэрэ – танай хамгаалагша,
хэрэгүүдынь түгэс.
Бүхы аян замынь залан сэхэ.
Бурхан найдамтай, хуурмаг худал юумэн Тэрээндэ үгы,
Тэрэ үнэн зүб, шударга сэхэ юм.
5Тэрэнэй арад зон гэжэ нэрлүүлхэ һэшхэлтнай хаанаб?
Нүгэл шэбэлтнай угаа ехэ,
таанад – мэхэшэд ба хара худалшад гээшэт!
6Эзэндээ юундэ иигэжэ ханданабта,
тэнэг, ухаагүй арад?
Тэрэ – танай Эсэгэ, таанадые байгуулаа, үндэһэ яһатан болгоо.
7Эртэ урдын саг һанаад үзэгты,
үни заяанда үнгэрһэн он жэлнүүд тушаа бодомжолоод туршагты.
Эсэгэнэрһээ асуун һурагты,
тэдэ танда ойлгуулха,
үбгэдһөө асуугаарайгты,
тэдэ танда хэлэхэ.
8Дээдэ Бурхан газар дэлхэйе
арадуудта хуби болгон хубаарилхадаа,
хүн түрэлтэниие сасан тараахадаа,
Израилиин улад зоной аша туһада
арадуудай харьяата газарай хилэнүүдые табяа.
9Эзэн Өөрын хуби болгон
Израилиин арадые,
Яковай уг удамые шэлэһэн юм.
10Тэрэ Яковай уг удамые
элһэн сүл губида,
хубхай хооһон, һалхитай гүн талада олоо.
Эзэн тэдэниие анхаралаараа хүреэлөө, харууһалаа, нюдэнэйнгөө сэсэгы мэтэ
аршалаа.
11Бүргэд шубуунай дальбараануудаа
ниидэжэ һургахын тула
уурхайһаа түлхин гаргажа,
дээгүүрнь элин ниидэжэ,
даляа дэбин, тэдэнээ дүнгэн байһандал,
Эзэн Израилиие унахаһаань һэргылэн аршалаа.
12Эзэн арад зоноо
гансаараа хүтэлэн ябаа,
ондоо бурхан тэрээнтэй байгаагүй.
13Эмээл дээрээ һуулгаһандал, Тэрэ
Яковай уг удамые гүбээ газарнуудые унуулан ябуулжа,
таряалангай ургасаар хооллуулаа,
хабсагайһаа – зүгын бала,
сахюур шулуунһаа оливын тоһо гарган тэнжээгээ.
14Тэдэнэй үнеэнүүд, хонид
һү, тоһо элбэг дэлбэг үгэдэг байгаа,
эгээл эрхим хуса, ямаадые,
үхэр мал, эрхим шэниисэ Тэрэ тэдээндэ үгөө.
Үзэмэй дараһан архишье байгаа.
15Ешүрүүн ▼

▼ Ешүрүүн – Израилиин арадай үшөө нэгэ нэрэ, «һайн», «сэхэ» гэһэн удхатай. Мүн 33:5 хара.

маряажажа, дээрэлхүү зантай болобо,
таргалаа, бүдүүрээ, үсэд болоо,
Бүтээгшэ Бурханаа, өөрын абаралта Хабсагайгаа тообогүй.
16Эгээлэ бурхадта тэдэнэр мүргэжэ,
Эзэнэй уур хүдэлгөө.
Жэгшүүрилтэ муухай юумэ тэдэнэр хэжэ,
Тэрэниие сухалдуулаа.
17Тэдэ Бурхадта бэшэ,
альбан шүдхэрнүүдтэ үргэл хэдэг байгаа.
Хажуудахи арадһаа халан абаһан,
үбгэ эсэгэнэрэйнгээшье мэдэхэгүй
ондоо шэнэ бурхадта
тэдэнэр үргэл хэжэ эхилээ.
18Мүндэлүүлһэн Хабсагайгаа
тэдэ мартаа,
ами наһа үршөөһэн Бурхаяа
ой ухаандаашье оруулаагүй.
19Энээниие Эзэн ажаглажа, дураа гутажа,
хүбүүд, басагадаа тоохоёо болибо.
20Тиигээд Тэрэ иигэжэ айладхаба:
«Тэдээнһээ буруу хаража,
һүүлдэнь юун бологшо ааб гээд хүлеэхэмни.
Тэдэ ёһоо алдаһан зон,
аша харюулхаяа мартаһан үхибүүд мэтэ.
21Тэдэнэр шүтөөнүүдтэ мүргэдэг боложо,
Минии сухал хүргэбэ.
Тэдэнь бурхад бэшэ ха юм,
хэндэшье хэрэггүй юумэд.
Тиимэһээ Би арад боложо бүрилдөөдүй уладаар
тэдэниие атаархуулжа,
тэнэг зоноор тэдэнэй уур сухал хүргэхэб!
22Гал дүлэн мэтээр
Минии уур сухал бужаганаа,
үхэлэй орон хүрэтэр дүлэтэнэ,
газарые болон хэшэгыень шатаан залгижа,
хада уулын үндэһэ һуури хайрана.
23Би тэдээн дээрэ гай тодхор обоолжо,
годлинуудаа дууһан тэдээн руу харбахаб!
24Тиихэдэ тэдэнэр гэдэһээ үлдэн,
мүн үбшэ хабшанһаа гээгдэхэ.
Би урдаһаань зэрлиг арьяатанай шүдэ,
могойн хоро эльгэхэб.
25Газаа – тэдэнэр һэлмээр хороогдохо,
гэртээ – айһанһаа зүрхэеэ хахаран гээгдэхэ:
эдир хүбүүншье, залуу хүүхэншье,
хүхөөр үхибүүншье, сагаан үһэтэй үбгэншье.
26Би хэлээб:
„Тэдэниие тараан сасахаб, үгы хэхэб,
тиихэдэм тэдээн тушаа зон
огтолон мартаха“.
27Теэд дайсадынь юун гээд һанахаб гэжэ
мэдэнэб.
„Эзэн Израилиие хюдаа бэшэ,
энэ хадаа бидэ өөрынгөө асари ехэ хүсөөр тэдэниие диилээбди“, –
гэжэ дайсадынь буруу ойлгохол».

28Израиль болбол толгойгоо төөриһэн,
ухаагүй арад юм.
29Ухаатай гээшэ һаа, тэдэнэр
тэдээнтэй юунэй болохоёо байһыень
ойлгохо бэлэйл.
30Нэгэ хүн мянган зониие
намнажа шадаха гү,
хоёр хүн үй түмэниие
үлдэжэ бираха гү?
Тэдэ мянган зоной Хабсагайн
өөһэдыень орхёо гээшэ һаа,
Эзэнэй тэдээнһээ арсаа гээшэ һаань,
иимэ юумэн ушархал.
31Дайсадай «хабсагайнь»
манай Хабсагайдал адли
бата бэхи бэшэ юм.
Тэдэ өөһэдөө энээн тушаа мэдэнэ.
32Дайсад Содом болон Гоморродол адли
забхай, һальхай, хорото гашуун жэмэстэй
уһан үзэмэй эшэ мэтэл.
33Үзэмэй дараһан архинь луу, могойн хорон мэтэ!
34Эзэн иигэжэ айладхаа:
«Үһөөгөө абахаяа хүлеэжэ,
хэһээлтэеэ хадагалан байхамни.
Ханза соогоо ласадуулхам.
35Бүдэрхэдэнь, үһөөгөө абахаб,
зэмыень амасуулхаб.
Хосорхо сагынь дүтэлөө,
удахагүй тэдэнэр хэһээгдэхэ».
36Эзэн Өөрынгөө арад зониие сүүдлэхэ.
Тэдэнэр хүсэгүй болоо,
Өөртэнь мүргэдэг зон
ямаршье туһагүй болоо гэжэ харахадаа,
эдэ зониие Тэрэ хайрлаха.
37Тиихэдэ Эзэн Өөрын улад зонһоо
иигэжэ асууха:
«Найдадаг бурхадтнай хаана гээшэб?
Хабсагайтнай хаанаб?
38Танай асарһан үргэлэй өөхэ тэдэ эдеэ,
үргэлэй үзэмэй дараһан архи уугаа,
бодожо тэдэнэр таанадта туһалаг лэ!
Таанадые аршалаг лэ!
39Мүнөө харана гүт:
Биб, ганса Би байнаб.
Намһаа бэшэ ондоо Бурхан үгы.
Би гээгдүүлнэб, нэгэн доро амидыруулнаб,
Би хюданаб, мүн аргалнаб.
Минии урдаһаа хэншье һөөргэдэжэ шадахагүй!
40Гараа огторгой руу һарбайжа,
Өөрын амиды байһаар тангаригланаб:
41Өөрынгөө сахилгаан һэлмэ хурсадажа,
шүүбэрилжэ эхилхэдээ,
дайсадһаа үһөөгөө абахаб,
Намайе үзэн ядагшадта
зэмыень амасуулхаб;
42годлинуудтаа шуһа һоруулхаб,
Минии һэлмэ зоной мяха эдихэ,
алуулһан, баряанда абтаһан зоной шуһа ууха,
дайсанай удамаршадай толгойнуудые сабшаха!»

43Бусад яһатад, Бурханай арадтай хамта баярлагты!
Юуб гэхэдэ, зарасануудыень алаһан зондо
Тэрэ хэһээлтэ амасуулдаг,
тэдэнэй түлөө дайсадһаа үһөөгөө абадаг,
Өөрынгөө газарай, арад зоной
нүгэл хүлисэн арюудхадаг.

Моисей зониие дуунда һургана

44Тиигээд Моисей Нүүнэй хүбүүн Иисүүстэй хамта энэ дуунай бүхы үгэнүүдые арад зоной дуулахаар хэлэжэ үгэбэ. 45Израилиин бүхы зондо эдэ үгэнүүдые бултыень хэлэжэ дүүргэхэдээ, Моисей 46үшөө иигэжэ нэмэбэ:

– Мүнөөдэр минии һэргылжэ хэлэһэн үгэнүүдые зүрхэ сэдьхэлдээ хадуужа абагты, энэ һургаал заабариин бүхы үгэнүүдые сахин дүүргэхыень үхи хүүгэдтээ захигты. 47Юуб гэхэдэ, энэ хооһон үгэнүүд бэшэ, энэ хадаа танай ами наһан гээшэ. Энээнэй ашаар таанад ошожо ябаһан газартаа, Иорданай саана, удаан сагта ажаһуухат.

Эзэнэй зарлиг

48Тэрэл үдэр Эзэн Моисейтэй хөөрэлдэжэ, иигэжэ айладаба:

49– Абариим хада руу ошо, Моһаабта, Ерихооной урда байдаг Нэбоо хада өөдэ гараарай, тэндэһээ Ханаһаанай орон нютаг тээшэ хара. Тэрэ газар дайдые Би Израилиин арад зондо эзэлхыень үгэнэб. 50Гараһан хада дээрээ ши наһа барахаш. Шинии аха Аһарооной Һоор хада дээрэ нүгшэжэ, урда түрэлдөө ошоһондол, ши мүн лэ тиимээр урда түрэлнүүдтэеэ хамтархаш. 51Юуб гэхэдэ, Циин гэһэн элһэн сүл губида, Мэрибаа-Кадээш булагай хажууда байхадаа, Израилиин зоной дундаһаа та хоёр Минии урда нүгэл хэһэн байнат. Израилиин улад зондо гэгээн арюун байһыемни эли тодоор харуулаагүйт. 52Тиимэһээ ши Израилиин арад зондо Минии үгэжэ байһан тэрэ газар дайдые холоһоо харахаш, теэд тиишээ орожо шадахагүйш!