‏ Deuteronomy 33

Моисейн һүүлшын юрөөлнүүд

1Бурханай хүн Моисейн нүгшэхынгөө урда тээ Израилиин улад зондо үгэһэн үреэлынь иимэ мүн. 2Тэрэ хэлэбэ:

Эзэн Синайһаа ерээ,
Сэһиир дээгүүр мандаа,
Параан хадаһаа толороо.
Мэрибаа-Кадээшһээ, ташаланһаа, урда зүгһөө Тэрэ ерээ.
 3Нээрээшье, Тэрэ Өөрынгөө арадта дуратай!
Гэгээн зониинь Тэрэнэй гарта!
Тэдэнь һургаал абахаяа хүлдэнь һүгэдэн байна.
 4Моисей бидэндэ һургаал заабари дамжуулаа,
Яковай арад зондо угай баялиг – хуули захин үгөө.
 5Израилиин удамаршадай, обогуудай
хамта суглараад байха үедэ
Хаан Ешүрүүнэй толгойлогшо болоо.

6Моисей Рэүбээнэй обог тушаа иигэжэ хэлээ:
«Үсөөншье һаа, Рэүбээнэй уг удам
хододоо ажаһууна».

7Иуда тушаа Моисей иигэжэ хэлэбэ:
«Эзэн, Иудые анхарыт,
арад түмэн руунь асарыт,
өөрын гараар тэрэ бэеэ аршална,
дайсадаа дарахадань туһалыт!»

8Левиин обог тушаа тэрэ иигэжэ хэлэбэ:
«Эзэн, Өөрынгөө шиидхэбэри
урим ба туммим ▼
▼ Жээрэб шэнгеэр хэрэглэгдэдэг шулуунууд гү, али модон, үгышье һаа, яһан.
 гэгшээр элирхэйлнэт.
Үнэн сэхэ левидүүд тэдэнииетнай хадагалдаг.
Массаада тэдэниие туршаад үзөө һэнта,
Мэрибаагай уһанай дэргэдэ шалгаа һэнта.
 9Тэдэнэр эхэ, эсэгэеэ харахаяа болинхой,
аха, дүүнэрээ танихаа болёо,
үхи хүүгэдээ орхинхой,
гэбэшье Танай үгэнүүдые сахин хадагална,
Тантай баталһан хэлсээгээ дүмэн дүүргэнэ.
 10Тэдэнэр Яковые ёһо гуримуудтатнай һургана,
Израилиин уладта һургаалыетнай дамжуулна,
Танай урда хүжэ санзай ууюулна,
үргэлэй шэрээ дээрэтнай
түгэс шатаалта үргэл үргэнэ.
 11Эзэн, хүсэ шадалыень юрөөгыт,
хэһэн хэрэгынь дэмжыт,
тэдээндэ үһэрхэн бодоһон зониие хюдыт,
үзэн ядагшадыень үндыхэеэ болиторынь һалгаагыт».

12Бэньямиинэй обог тушаа тэрэ иигэжэ хэлэбэ:
«Эзэнэй дуратай эдэ зон
хажуудань һанаа амар ажаһууна,
Бурхан тэдэниие хододоо аршална,
Бурханай дэбисхэрэй дунда
тэдэ хашалгүй байна».

13Иосифой обог тушаа тэрэ иигэжэ хэлэбэ:
«Эзэн тэдэнэй газар дайдые
бороо хураар, шүүдэрэй дуһалаар,
доро байгаа гүн уһаар үреэнэ,
 14наранай элшэһээ һайн үрэ жэмэс,
һарын туяаһаа эрхим ургаса тэдээндэ үршөөнэ,
 15эртэ урдын хадануудай оройһоо,
хэтэ мүнхэ гүбээнүүдэй үндэрһээ
эрхим дээжыень бэлэглэнэ,
 16хүрьһэтэ газарай хэшэгые,
дээрэнь байгааша бүхы юумэ
Иосифто Тэрэ үгэхэ,
дүрэжэ байһан бургааһан соо
харагдагша Эзэнэй үреэл
аха дүүнэрэй дунда шалгарагша
Иосифой обогто хүртэхэ.
 17Иосиф – бухын түрүүшын түл!
Зэрлиг үхэрэй эбэртэл адли эбэртэй,
тэдэ эбэрынь гэбэл,
Эпрааимай үри һадаһад,
Мэнашшээ гэгшын хэдэн мянгаад уг удам юм.
Тэдэ эбэрнүүдээрээ
ондоо арадуудые мүргэжэ,
газарай заха руу түринэл!»

18Зэбүлүүнэй болон Иссахаарай обогууд
тушаа тэрэ иигэжэ хэлэбэ:
«Аян замдаа Зэбүлүүн амжалтатай ябаха,
Иссахаар, майхангуудтаа баяртай ажаһуугаарай!
 19Зониие тэдэ үндэр өөдэ дуудана,
тэндэ хэхэ ёһотой үргэлөө үргэнэ.
Далайн баялиг тэдэ олзоборилдог,
элһэнһээшье ашаг үрэ абадаг байна».

20Гаадай обог тушаа тэрэ иигэжэ хэлэбэ:
«Гаадай газар үргэдхэгшэ юрөөлтэй!
Амаржа байтараа, гэнтэ ямар нэгэн амитанда добтолжо,
шүрбэһэ шандааһыень,
толгой эхииень хайра гамгүй таһалдаг
арсаландал адли юм Гаад.
 21Газарай эрхимыень тэдэ өөһэдтөө абанхай,
арад зоной удамаршад болон тодороо,
Израилиин удамаршадай хамта суглараад байхада,
Эзэнэй сүүд тэрэ хээ,
Израиль тухай Эзэнэй шиидхэбэринүүдые тэрэ дүүргээ».

22Даанай обог тухай тэрэ иигэжэ хэлэбэ:
«Башаанһаа һүрэн гарадаг
залуу арсалан мэтэ Даан».

23Напталиигай обог тухай тэрэ иигэжэ хэлэбэ:
«Напталиида Эзэн хододоо талархай байдаг,
Эзэнэй юрөөхэдэнь, газарынь
баруун, урда зүгүүдээр нэмжыхэ».

24Ашээрэй обог тушаа тэрэ иигэжэ хэлээ:
«Бусад обогуудта орходоо
Ашээр юрөөлтэй ажаһууна,
аха, дүүнэрынь тэрээндэ дуратай,
оливын тоһондо хүлнүүдынь умбана.
 25Хотонуудынь бүхэ түмэр, зэд бартаануудтай,
тэрэ хододоо хүсэ шадалтай амидарха».

26Израилиин арад зон,
Ешүрүүнэй Бурхандал адли ямаршье бурхан байхагүй!
Тэрэ һүр жабхалантайгаар үүлэд дээрэ
тэнгэреэр соёрон, танда туһалхаяа ерээ.
 27Эртэ урдын Бурхан – амарха газар,
Тэрэнэй хэтэ мүнхэ гарнууд
таниие дэмжэдэг,
Тэрэ хажууһаатнай дайсадыетнай үлдөө,
тэдэниие «хюда!» гээд танда айладаа.
 28Израиль аюулгүй амгалан ажаһууна,
Яков орооһо таряагаар, жэмэсэй архяар баян,
бороо хурын ородог газар дээрэ
гансаараа хашалгүй ажаһууна.
 29Буянтайш, Израиль!
Эзэнэй хамгаалдаг шамдал адли арад байхагүй!
Эзэн – шамайе аршалдаг бамбай,
алдар солыншни һэлмэ.
Дайсадшни шинии урда дохин байха,
нюргыень ши дэбһэхэш.
Copyright information for BxrBBL2024