Deu 6 | BxrBBL2024 | STEP | Эзэмдэхэ зорилготойгоор ошожо ябаһан газартаа сахин байхыетнай Эзэн Бурхантнай таанадые иимэ захяа заабаринуудта, хуули, ёһо гуримуудта һургаха гэжэ намда захиһан байна.

‏ Deuteronomy 6

Эзэндэ хододоо дуратай байгты!

1 Эзэмдэхэ зорилготойгоор ошожо ябаһан газартаа сахин байхыетнай Эзэн Бурхантнай таанадые иимэ захяа заабаринуудта, хуули, ёһо гуримуудта һургаха гэжэ намда захиһан байна. 2 Таанад, үри һадаһадтнай Эзэн Бурханаа бүхы наһаараа хүндэлжэ ябагты. Минии дамжуулжа байһан Тэрэнэй бүхы хуули ёһо, захяа заабаринуудые сахин ябагты. Тиигэбэл, удаан саг соо ажаһуухат. 3 Израилиин улад зон, соносогты, тиигээд эдэ бүгэдые жэншэдгүй сахин дүүргэхэеэ оролдогты! Тиигэбэл, таанадта һайн байха, угаа үнэржэн, шадал түгэс үндэһэ яһатан болохот, Эзэнэй, үбгэ эсэгэнэрэйтнай Бурханай, найдуулһаар, бүхы юумээр элбэг дэлбэг газартай болохот.

4 Израилиин арад зон, соносогты! Манай Эзэн Бурхан ори ганса Эзэн юм. 5 Бүхы зүрхэ сэдьхэлээрээ, бүхы амин һүлдөөрөө, бүхы хүсэ шадалаараа Эзэн Бурхандаа дуратай байгты. 6 Мүнөө дамжуулан хэлэжэ байгааша эдэ үгэнүүдыемни хододоо һанажа ябаарайгты. 7 Үхи хүүгэдтээ энээн тушаа хододоо һануулжа, хэлэжэ байгты. Өөрынгөө гэртэшье һуухадаа, аян замдашье ябахадаа, амаржа байхадаашье, ажал хэжэшье байхадаа энээн тухай хэлэжэ байгты. 8 Дүлгэ тэмдэг мэтээр тэдэниие гартаа уягты, һануулга мэтээр магнай дээрээ боолто болгон байлгагты. 9 Гэрэйнгээ үүдэнэй тотого дээрэ, бартаанууд дээрэ тэдэниие бэшэгты.

10 «Үгэхэб» гэжэ үбгэ эсэгэнэртэтнай – Абраһаамда, Исаагта, Яковта тангариглан найдуулһан газар дайда, танай баряагүй мантан ехэ, һайн хотонуудтай тэрэ газарые Эзэн Бурханай та бүгэдэндэ үгэхэдэнь, 11 таанадай суглуулаагүй элдэб һайн зөөри зөөшөөр дүүрэн гэрнүүдые, таанадай малтаагүй худагуудые, таанадай һуулгаагүй үзэмэй модоной ба олива модоной сэсэрлигүүдые үгэхэдэнь, иимэ газарта Эзэнэй таанадые асархадань, эдеэ хоолоор элбэг болоходоо, 12 тиихэдээл одоо болгоомжологты! Египедэй газар дайдаһаа, богоол байдалһаа таанадые гаргаһан Эзэниие бү мартагты! 13 Эзэн Бурханаа хүндэлэгты, гансал Тэрээндэ алба хэгты, гансал Тэрэнэй нэрээр тангариглагты. 14 Ондоо бурхадта бү мүргэгты, тойроод байһан арад үндэһэтэдэй бурхадта алинданьшье бү һүгэдэгты. 15 Ондоо бурхадта мүргөө һаатнай, Эзэн таанадта уур хилэнтэжэ, газарай хүрьһэн дээрэһээ таанадые үгы хэхэ, юуб гэбэл, Эзэн Бурхантнай ондоо бурхадые тэсэжэ байхагүй.

16 Массаада туршаһандал, Эзэн Бурханаа бү туршагты. 17 Эзэн Бурханайнгаа таанадта захирһан захяа заабаринуудые, эрхэ нүхэсэлнүүдые, хуули ёһонуудые жэншэдгүй сахигты. 18 Үнэн зүб, һайн хэрэгүүдые, Эзэнэй һанаанда таарама юумэ хэжэ байгты. Тиигэбэл, таанадта һайн байха, үбгэ эсэгэнэртэтнай Эзэнэй тангариглаһан тэрэ үрэжэлтэ һайхан газар нютагта ошожо, эзэмдэн ажаһуухат. 19 Тиигэбэл, Тэрэ найдуулһанайнгаа ёһоор, дайсадыетнай үлдэхэ.

20 Хожом шинии хүбүүнэй «Эзэн Бурханаймнай таанадта захиһан эрхэ нүхэсэлнүүд, хуули, ёһо гуримуудай удхань ямар гээшэб?» гэжэ асуубал, 21 хүбүүндээ иигэжэ хэлээрэй: «Египедтэ фараоной богоолнууд байһан гээшэбди, теэд Эзэн тэндэһээ бар хүсөөрөө маанадые гаргаһан юм. 22 Тэрэ дүлгэ тэмдэгүүдые, гайхамшагта үзэгдэлнүүдые, хэһээлтэнүүдые Египедтэ, фараондо, түшэмэлнүүдтэнь манай хараһаар байтар хэһэн, харуулһан гээшэ. 23 Үбгэ эсэгэнэртэмнай үгэхэб гэжэ тангариглаһан газартаа бидэниие абаашахын, тэрэ газарые маанадта үгэхын тула Эзэн бидэниие Египедһээ гаргаа. 24 Тэрэ эдэ бүхы хуули ёһонуудые сахин дүүргэхыемнай захяа. Эзэниие, өөрынгөө Бурханиие, хүндэлхэ ёһотойбди. Тиигэбэл, һайн һайхан ажамидархабди, мүнөөдөөл адли, амиды мэндэ байхабди. 25 Эзэн Бурханайнгаа захирһанай ёһоор, бүхы захяа заабаринуудыень сахин дүүргэхэеэ оролдоо гээшэ һаамнай, сэхэ сэбэр ябадалтай гээд бидэниие Тэрэ тоолохол».