Deu 8 | BxrBBL2024 | STEP | Амиды мэндэ байхын, мүн саашадаа үдэхын тула, Эзэнэй үбгэ эсэгэнэртэтнай үгэхөөр тангариглан найдуулһан газар руу орожо, эзэлхын тула мүнөөдэр минии хэлэһэн бүхы захяа заабаринуудые сахин бэелүүлэгты.

‏ Deuteronomy 8

Тэжээһэн буруун тэргэ бү эбдэг!

1 Амиды мэндэ байхын, мүн саашадаа үдэхын тула, Эзэнэй үбгэ эсэгэнэртэтнай үгэхөөр тангариглан найдуулһан газар руу орожо, эзэлхын тула мүнөөдэр минии хэлэһэн бүхы захяа заабаринуудые сахин бэелүүлэгты. 2 Дүшэн жэлэй туршада элһэн сүл губяар таанадые Эзэнэй хүтэлөөд ябаһан бүхы аян зам бү мартагты. Досоогоо юу сэдьхэжэ байһыетнай, захяа заабарииень сахиха гүт, али үгы гүт гэжэ мэдэхын тула, таанадые номгоруулхын тула Тэрэ туршажа байгаа. 3 Хүн ганса хилээмээр амидардаггүй, харин Эзэнэй үгын ашаар амиды ябадаг гэжэ ойлгохынтнай тула Тэрэ таанадые даран номгоруулаа, гэдэһыетнай үлдэхүүлээ, удаань таанадай хараагүй, үбгэ эсэгэнэрэйтнайшье үзөөгүй сагаан будаагаар холлуулаа. 4 Энэ дүшэн жэл соо хубсаһантнай хуушаржа һалаагүй, хүлтнай хабдаагүй. 5 Хүбүүгээ һургаһан эсэгэдэл адляар Эзэн Бурхантнай таанадые хүмүүжүүлнэ гээд ойлгожо байгты. 6 Эзэн Бурханайнгаа захяа заабариие сахигты, Тэрэнэй замаар ябагты, Тэрэниие хүндэлэгты. 7 Эзэн Бурхантнай таанадые үрэжэлтэй һайхан газар руу абаашажа байна: талаар болон хадын хабшалаар гол горход, булаг, нуурнууд урдадаг; 8 шэниисэтэй, ешмээнтэй, үзэмтэй, инжиртэй, анар жэмэстэй газар руу, оливын тоһоор мүн зүгын балаар баян орон руу; 9 эдеэгээр элбэг дэлбэг, таанадай юугээршье дуталдахагүй газар руу; шулуун бүхэниинь – түмэр түдэгэ, хада уулаһаа зэд түмэр түгдэлжэ абамаар газар дайда руу. 10 Эдижэ садахадаа таанад Эзэн Бурхандаа һайн газар үгэһэнэйнь түлөө баяр баясхалан хүргөөрэйт.

11 Болгоомжотой байгты! Эзэн Бурханаа бү мартагты! Мүнөөдэр би таанадта захяа заабарииень, ёһо гуримыень, хуулинуудыень дамжуулнаб, тэдэниие сахигты. 12 Таанад эдеэ хоолоор элбэг дэлбэг болоходоо, һайн гэрнүүдые баряад, тэдээн соогоо ажаһуужа эхилхэдээ, 13 олон мал һүрэгтэй, алта мүнгөөр баян, бүхы юумээр элбэг дэлбэг болоходоо, 14 дээрэлхүү зан үзүүлхэеэ тэбшэгты, Египедэй газар оронһоо, богоол байдалһаатнай гаргаһан Эзэн Бурханаа бү мартагты. 15 Үргэн гэгшын, аймшагтай элһэн сүл губиин дундуур, элдэб хорото могойнуудтай, хадхууртай хорхойнуудтай, уһагүй хуурай газараар Тэрэ таанадые хүтэлэн гаргаа. Хабсагай шулуунһаа уһа гаргажа, Тэрэ таанадта үгэһэн байна. 16 Таанадые даран номгоруулхын, туршахын тула, һүүлдэнь һайе хэхэеэ Тэрэ таанадта бэрхэшээлнүүдые ушаруулһан байна. Таанадай мүн үбгэ эсэгэнэрэйтнайшье хараа-үзөөгүй сагаан будагаар элһэн сүл губида таанадые Тэрэ холлуулаа. 17 «Эдэ бүхы баялигые өөрынгөө шадалаар, өөрынгөө хүсөөр олооб» гэжэ досоогоо һанажа бү байгты. 18 Баян болохо шадал таанадта гансал Эзэн Бурхантнай үршөөнэ гээд мартангүй һанажа ябагты. Үбгэ эсэгэнэртэйтнай баталһан хэлсээгээ Тэрэ мүнөөшье бэелүүлнэ. 19 Хэрбээ Эзэн Бурханаа мартаад, ондоо бурхадта һүгэдэжэ, зальбаржа, тэдэниие шүтэжэ эхилээ гээшэ һаа, заабол хосорхот гээд таанадта мүнөөдэр сэхэ хэлэнэб. 20 Таанадай дабшан эзэлхэ газар орондо Эзэн бусад арадуудые хюдаха, теэд таанад Эзэн Бурханайнгаа үгэ дуулаагүй гээшэ һаа, тэдээндэл адляар хосорхот.