Deu 3 | BxrBBL2024 | STEP | Тэндэһээ һөөргөө хотиржо, Башаан тээшэ ябабабди. Башаанай хаан Оог бүхы сэрэгээ дахуулан, Эдрей хотын шадар бидэнтэй тулалдахаяа урдаһаамнай гараба.

‏ Deuteronomy 3

Оог хаанай үхэл

1 Тэндэһээ һөөргөө хотиржо, Башаан тээшэ ябабабди. Башаанай хаан Оог бүхы сэрэгээ дахуулан, Эдрей хотын шадар бидэнтэй тулалдахаяа урдаһаамнай гараба. 2 Эзэн намда иигэжэ айладаба: «Тэрээнһээ ши бү ай. Ушар юуб гэхэдэ, Би тэрэниие, сэрэгшэдыень, тэрэнэй бүхы газар дайдые шинии гарта үгэхэб. Хэшбоондо ажаһууһан Эмоорой Сиһоон хааниие яагаад ши диилээ һэмши, тэрээндээл тон адляар тэрэниие диилэхэш». 3 Иигэжэ Эзэн Бурхамнай Башаанай Оог хааниие, бүхы сэрэгыень манай мэдэлдэ үгэбэ. Тиихэдэнь нэгэшье хүниие амиды мэндэ үлөөнгүй усадхаа бэлэйбди. 4 Мэдэлдэнь байһан бүхы хотонуудые тэрэ үедэ эзэмдээ һэмди, бидэнэй эзэлээгүй нэгэшье хото үлөөгүй һэн. Дүн хамта жаран хото – Башаанай Оог хаанай зонхилдог Аргооб гэһэн бүхы хизаар дайда эзэмдээбди. 5 Эдэ хотонуудынь бултадаа үндэр ханануудтай, бартаануудтай, шэбхэнүүдтэй, юрэдөө, ехэ бүхэлэгдэнхэй байгаа. Тэрээнһээ гадна хана хэрэмгүй һууринуудшье олон һэн. 6 Хэшбооной хаан Сиһооной хотонуудые һандаргааһандал, бидэ тэдэниие һандаргаабди. Эдэ хотонуудта эрэшүүл, эхэнэрнүүдые, үхи хүүгэдые бултыень үгы хээ бэлэйбди. 7 Гэбэшье мал адууһа болон хотонуудта дээрмэдэһэн зүйлнүүдээ өөһэдтөө олзо болгон абаа һэмди.

8 Иигэжэ бидэ тэрэ үедэ Иордан голой саана байһан эмоор обог зоной хоёр хаанай газар – Арноон нюрууһаа эхилээд Хэрмоон хада хүрэтэр газарые эзэлэн абаабди. 9 (Сидоон арад Хэрмооные Сириһоон, эмоор арад Сэниир гээд нэрлэдэг юм.) 10 Иигэжэ бидэ Башаанай Оог хаанай бүхы газар дайдые: намжаа газарта оршодог бүхы хото, бүхы Галаад, Башаан, тиихэдэ Салэхаа, Эдрей хото бултыень эзэмдэн абаа бэлэйбди.

11 (Башаанай хаан Оог рэпаиимүүдэй дундаһаа эгээл һүүлшын үлөөшэнь бэлэй. Тэрэнэй шулуун хуурсаг мүнөөшье болотор аммоонуудай Раббаа хотодо байһаар: утань юһэн, үргэниинь эрэ хүнэй дүрбэн тохой болохо юм.)

Израилиин обогуудта газар хубаарилга

12 Тэрэ үедэ газар дайдые эзэлхэдээ, Арноон нюруу дээгүүр байгааша Ароһээр хотоһоо эхилээд, хадалиг Галаад орон нютагай хахадыень хотонуудтайнь хамта би Рэүбээнэй, мүн Гаадай обогуудта үгөөб. 13 Галаадай үлэһэн хубииень, мүн Оогой хаан түрэ болохо Башааниие бултыень, тусхайлбал, бүхы Аргооб гэдэг хизаар дайда, би Мэнашшээ гэгшын обогой зоной хахадтань үгэбэб. (Башаан хадаа рэпаиимүүдэй газар гэжэ нэрлэгдэдэг һэн. 14 Мэнашшээ гэгшын хүбүүн Яһиир гэшүүршүүдэй болон маһахаашуудай хилэ хүрэтэр Аргооб хизаарые бултыень эзэмдэжэ, Башааниие өөрынгөө нэрээр – Яһиирай һууринууд гээд нэрлээ бэлэй. Энэ нэрэнь мүнөөшье болотор бии.)

15 Мэнашшээ гэгшын ехэ хүбүүн Махиирай уг удамда Галаад үгөөб. 16 Арноон голой нюрууда Галаадһаа Яббоок гол хүрэтэр газарые Рэүбээнэй ба Гаадай обогуудта үгөөб. Нэгэ талаһаа тус газарай хилэнь Арноон голдо туладаг, нүгөө тээһээнь Яббоок гол бэлэй. Яббоок гол хадаа Аммооной уг изагууртантай тэдэнэй хилэ болодог юм. 17 Тэдэнэй газар дайда Иордан гол хүрэтэр, урда талаһаа Хиннээрэт нуурһаа ^{▼▼ Хиннээрэт нуур – үгышье бол, Галилейн нуур.} эхилээд, Нюруу газарай далай гү, али ондоогоор Дабһата далай ^{▼▼ Дабһата далай – «Һүнэһэн далай».} хүрэтэр, зүүлжээ Пиисгаа хадын хормой хүрэтэр нэмжыдэг.

18 Тэрэ үедэ би тус обогуудай зондо иигэжэ захираа бэлэйб: «Эзэн Бурхантнай энэ газарые таанадта эзэлэн һуухыетнай үгөө. Дайлалдажа шадаха зонтнай бултадаа зэбсэгжээд, Израилиин улад зоной урда байлдаанда орохо ёһотой! 19 Гансал һамгадтнай, үхи хүүгэдтнай, үхэр малтнай (таанадта мал олон гээд мэдэнэб) минии үгэһэн хотонуудта үлэг. 20 Таанадта үршөөһэндэл адляар, аха дүүнэртэтнай амгалан байдал Эзэнэй үршөөхэдэнь, Иордан голой баруун бэедэ Эзэн Бурханайтнай үгэжэ байһан газарые аха дүүнэрэйтнай эзэмдэхэдэнь, таанад минии үгэһэн харьяата газарта бусажа ерэхэт».

21 Иисүүстэ тэрэ үедэ иигэжэ хэлээ һэм: «Тэрэ хоёр хаашуулда Эзэн Бурханайтнай юу хэһые ши өөрөө хараа ха юмши. Шинии добтолон ороһон газарай хаан түрэнүүдтэ Тэрэ тон тиимээр лэ хандаха. 22 Тэдэнһээ бү айгты, юуб гэхэдэ, Эзэн Бурхантнай Өөрөө танай түлөө оролдон тэмсэжэ байна».

Моисей Ханаһаан руу орохогүй

23 Тэрэ үедэ би Эзэндэ зальбарбаб: 24 «Дээдэ Эзэн! Та Өөрынгөө асари ехэ һүр жабхалан, бата бэхи шадал шандааһа намда, Өөрын зарасада, харуулжа эхилээт. Тандал адли иимэ хэрэгүүдые эрхилхэ, иимэ ехэ хүсэ шадалтай ямар бурхан газар уһан дээрэ, огторгой тэнгэридэ байхаб даа. 25 Иордан голые гаталһуулби, голой саада тээ байгааша үрэжэлтэй һайхан газарые, тэрэ һайхан уулархаг орон нютагые болон Ливааниие харахыемни зүбшөөгыт!»

26 Теэд Эзэн таанадай түлөө намда уурлаһан байжа, намайе шагнабагүй, иигэжэ захирба: «Хүрөө, болоо! Энээн тушаа Намда бэшэ бү хэлэ! 27 Пиисгаа хадын оройдо гаража, хойшоо болон урагшаа, зүүн болон баруун тээшээ шэртэн хара. Бүхы юумэ гансал нюдөөрөө харахаш, юуб гэхэдэ, Иордан гол ши гаталхагүйш! 28 Иисүүстэ һургаал заабари хэлэ, тэрэниие зоригжуула, һүр һүлдыень үргэ, юуб гэхэдэ, тэрэл энэ арадые дахуулан, Иордан гол гаталха, шинии хужарлаха газарые улад зондо тэрэл хубаарилан үгэхэ».

29 Иигэжэ бидэ Бэт-Пэһоор хотын шанха урда, тала газарта тогтоо бэлэйбди.