Deu 34 | BxrBBL2024 | STEP | Моисей Моһаабай тэгшэ газарһаа Нэбоо хада дээрэ – Ерихоон хотоһоо зүүлжээ, Пиисгаа орьёл өөдэ гараба. Эзэн тэрээндэ бүхы газарые

‏ Deuteronomy 34

Моисейн наһа баралга

1 Моисей Моһаабай тэгшэ газарһаа Нэбоо хада дээрэ – Ерихоон хотоһоо зүүлжээ, Пиисгаа орьёл өөдэ гараба. Эзэн тэрээндэ бүхы газарые – Галаадһаа Даан хүрэтэр, 2 Напталии гэгшын бүхы газарые, Эпрааимай, Мэнашшээ гэгшын газарнуудые, Иудын газар дайдые, Дундада далай хүрэтэр, 3 Иудын урда газар дайда, тиихэдэ Пальма модоной хото гэжэ нэрлэдэг Ерихооной болон Цооһарай хоорондохи тэгшэ газарые бултыень харуулаа. 4 Тиигээд Эзэн тэрээндэ хандан, иигэжэ айладаба:

– Үри хүүгэдтэтнай энэ газар үгэхэб гэжэ Абраһаамда, Исаак болон Яковта «Минии тангариглан найдуулһан газар энэл даа». Шамда өөрынгөө нюдөөр энэ газар харахыешни зүбшөөгөөб, гэбэшье ши тиишээ орожо шадахагүйш.

5 Иигэжэ Моисей, Эзэнэй зараса, тэндэ, Моһаабай газарта, Эзэнэй айладаһанай ёһоор, наһанһаа нүгшэһэн байна. 6 Эзэн Моисей гэгшые Моһаабта, Бэт-Пэһоор хотын хажууда, тэгшэ газарта хүдөөлүүлбэ, теэд мүнөөшье болотор тэрэнэй хүүрэй тон хаана байһые хэншье мэдэдэггүй. 7 Моисей нүгшэхэдөө зуун хори наһатай байгаа. Тэрэнэй бэе шанга зандаа, нюдэнэйнь хараса балартаагүй бэлэй. 8 Израилиин арад зон Моисей тушаа гушан үдэрэй туршада гашуудал дүүрэн байба. Гашуудал, голхоролой сагай дүүрэтэр тэдэнэр Моһаабай нюруу газарта байгаа бэлэй.

Шэнэ удамаршан – Иисүүс

9 Нүүнэй хүбүүн Иисүүстэ сэсэн мэргэнэй һүр һүнэһэн шэнгэн халин оробо. Ушар юуб гэхэдэ, Моисей толгой дээрэнь гараа табижа, өөрынгөө орондо тэрэниие томилһон байгаа. Израилиин улад зон Иисүүсэй үгэ дууладаг, Эзэнэй Моисейдэ захин заабарилһан бүхы юумые сахин дүүргэдэг болоо һэн.

10 Моисейдэл адли лүндэншэ Израилиин арад зоной дунда бэшэ хэзээдэшье үзэгдөөгүй бэлэй. Юуб гэхэдэ, Эзэн гансал тэрээнтэй улаан нюураараа ушарһан байна. 11 Дүлгэ тэмдэгүүдые, гайхамшагта үзэгдэлнүүдые хэхыень Моисей гэгшые Эзэн Египет руу эльгээгээ. Тэрэ үзэгдэлнүүдые фараон, түшэмэлнүүдынь, Египедэй бүхы улад зон өөр дээрэ үзэһэн, хараһан байна. 12 Израилиин арад зоной хараһаар байтар агууехэ, гайхамшагта үзэгдэлнүүдые Моисейһээ бэшэ ондоо ямаршье лүндэншэ хэзээдэшье хээгүй бэлэйл.