‏ Deuteronomy 9

Ехэ нүгэлэй хойшолон

1Израилиин арад зон, соносогты! Мүнөөдэр Иордан гол гаталжа, таанадһаа олон, хүсэтэй арадуудай газар уһа эзэмдэхэеэ ошохотнай. Хотонуудынь мантан ехэнүүд, огторгойдо тулама үндэр хэрэм ханануудтай. 2Зониинь арсалан хүсэтэй, үндэр бэетэй гэжэ Анаак гэгшын уг залгамжалагшад тухай, хэншье тэдэниие диилэжэ шадахагүй тухай дуулаһан байхат. 3Теэд мүнөө одоо мэдэжэ байгты: Эзэн Бурхантнай бүхы юумэ үрэбхилдэг гал дүлэндэл, таанадай урда ябана. Тэрэ тэдэниие хюдаха, таанадаар диилүүлхэ. Эзэнэй та бүгэдэндэ найдуулһанай ёһоор, таанад газар уһыень эзэмдэхэт, түргөөр тэдэниие һалгаахат.

4Эзэн Бурханайтнай тэдэниие үлдэн гаргахада, «Бидэнэй сэбэр сэхэ ябадалтай байһанда Эзэн энэ газар эзэмдэхыемнай асарба» гээд досоогоо сэдьхэжэ бү байгты. Тэдэ арадуудай буруу ябадалтай байхадань Эзэн үлдэнэ бшуу. 5Тэдэнэй газар дайда үнэн сэхэ байһанайтнай түлөө бэшэ, сэбэр сэхээр ажаһууһанайтнай түлөө бэшэ таанадта хүртэхэ. Тэдэ арадуудай буруу ябадалтай һэн тула, мүн танай үбгэ эсэгэнэр болохо Абраһаам, Исаак, Яков гэгшэдтэ тангариглаһан үгэеэ дүүргэхын тула Эзэн Бурхантнай тэдэниие хажууһаатнай үлдэхэл. 6Тиимэһээ энэ һайхан газар үгэхэдөө, таанадай сэбэр сэхэ байһанай түлөө бэшэ гээд ойлгогты. Таанад, юрэдөө, үсэд лэ зон гээшэлта даа.

Алтан тугал

7Элһэн сүл губида Эзэн Бурханаа сухалдуулһанаа оройдоошье бү мартагты. Египедэй газар дайдаһаа гараһан үдэрһөө хойшо энэ газарта ерэтэрээ Эзэндэ таанад эсэргүүсээт. 8Хорээб хадын хажууда Эзэниие сухалдуулхадатнай, Тэрэ таанадые хюдан алдатараа уурлаа бэлэй. 9Таанадтай Эзэнэй баталһан хэлсээнэй шулуун хабтаһануудые абахаяа хада өөдэ би гаража, дүшэн үдэрэй, дүшэн һүниин туршада хада дээрэ эдеэ хоол барингүй, уһа уунгүй байхадам, 10Өөрынь гараар бэшэһэн бэшэгтэй хоёр шулуун хабтаһа намда Эзэн үгөө бэлэй. Та бүгэдын сугларһан тэрэ үдэр хада дээрэһээ, гал дүлэн сооһоо Эзэнэй таанадта айладхаһан бүхы үгэнүүд тэдээн дээрэ бэшээтэй байгаа. 11Иигэжэл дүшэн хоногой үнгэрһэн хойно Эзэн намда хоёр хабтагар шулуу – хэлсээнэй хабтаһануудые үгэһэн гээшэ. 12Тиигээд Эзэн намда айладаба: «Эндэһээ түргөөр доошоо буу, юуб гэхэдэ, Египедһээ гаргаһан арад түмэншни муу зантай болоо. Минии зааһан харгыһаа түргэхэнөөр тэдэ хадуураа, шудхамал хүрэг өөһэдтөө хээ».

13Эзэн үшөө намда иигэжэ дуулгаба: «Энэ арадые шобто хаража байнаб. Одоол үсэд зон даа. 14Намда һаалта бү хэ, Би тэдэниие хюдахам, алтан дэлхэй дээрэ нэрэньшье мартагдаха, харин тэдэнһээ хүсэтэй, олон тоото улад зониие шамһаа үдэн гаргахаб».

15Гартаа хэлсээнэй хоёр шулуун хабтаһа баринхай би һөөргөө эрьежэ, хадаһаа буубаб. Хада гал дүлэндэ абтанхай байгаа. 16Эзэн Бурханайнгаа урда таанадай нүгэл хэһые, тугалай шудхамал дүрсэ өөһэдтөө хэһые, Эзэнэй зааһан замһаа түргөөр хадуурһыетнай би хараа бэлэйб. 17Тиимэһээ би танай хараһаар байтар тэрэ хоёр хабтаһа газар руу шэдэжэ, бута сохёо һэм. 18Таанадай бүхы нүгэл шэбэлэй түлөө, Эзэнэй урдаһаа муу юумэ хэжэ, Тэрэниие сухалдуулһанайтнай түлөө би Эзэнэй урда дахин һүгэдэн унаад, урид байһандал адляар дүшэн хоногой туршада эдеэ хоол барингүй, уһа уунгүй байбаб. 19Юундэ тиигээбиб гэхэдэ, Эзэнэй уур хилэнһээ ехэ айгааб. Тэрэ таанадта угаа сухалдажа, хюдахаяа һанаһан юм. Теэд энэшье удаа минии үгэ Тэрэ дуулаба. 20Эзэн мүн лэ Аһароондо ехэ сухалдажа, хюдахаяа һанаһан байгаа. Теэд би Аһароонойшье түлөө тэрэ үедэ зальбараа һэм. 21Танай хэһэн нүгэлые – тугалай шудхамал дүрсэ абажа, гал дүлэндэ хаябаб. Бута сохижо, үнэһэн тоборог болоторынь бутаргаад, хадаһаа урдаһан горхон руу хаяа һэм.

22Табэраада, Массаада, Киброот-Һа-Таһаваада байхадаа таанад Эзэниие мүн лэ сухалдуулаат. 23Кадээш-Барнээ гэгшэһээ Эзэнэй таанадые эльгээжэ, «Минии таанадта үгэжэ байһан газар руу уруудан буужа эзэлэгты!» – гээд айладахадань, та бүгэдэн урдаһаань һөөргэдэжэ, этигэбэгүйт, үгыень дуулабагүйт. 24Таанадые мэдэхэ болоһон сагһаам хойшо Эзэндэ һөөргэдэн байнат.

25Тиимэһээ Би Эзэнэй урда һүгэдэн унажа, дүшэн хоногой туршада мүргэбэб. Юуб гэхэдэ, Тэрэнэй таанадые үгы хэхэеэ һанаһан тухай мэдэжэ байгааб. 26Эзэндэ иигэжэ зальбарааб: «Дээдэ Эзэн, Өөрын арад түмэниие, Өөрын хубиие бү усадхыт! Һүр жабхалангаараа тэдэниие абараа, бар хүсөөрөө Египедһээ гаргаа бэлэйт. 27Абраһаам, Исаак, Яков гэдэг өөрынгөө богоолнуудые ой ухаандаа оруулыт. Энэ арадай үсэдые мартыт, тэдэнэй буруу байдал, нүгэл шэбэл хэһыень бү тоогыт. 28„Найдуулан хэлэһэн газар дайдадаа Эзэн тэдэниие абаашажа шадаагүй. Тэдэниие үзэн ядаһан ушарһаа хосороохо гэжэ элһэн сүл губи руу абаашаа“, – гээд Египедэй зон хэлсэжэ болохол. 29Тииһээ тиитэрээ тэдэ – Танай арад, Танай хуби, асари ехэ хүсөөрөө, агууехэ шадалаараа тэдэниие Египедһээ гаргаат».