‏ Ecclesiastes 10

Сэсэшүүлэй һэргылэл

1Үхэһэн илааһан һайхан анхилалтай тоһые үмхэй болгодогтол адли багахан тэнэг ябадал сэсэн хүнэй алдар нэрэ гутаажа болодог. 2Ухаатай хүнэй зүрхэн эзэнээ зүб тээшэнь хүтэлдэг, тэнэгэй зүрхэн буруу тээшэ дахуулдаг. 3Тэнэг хүн гансаараа харгыда ябахадаашье урагшагүй, тэнэгынь бултанда эли байдаг.

4Зонхилдог даргын шамда уурлахада, абаһаар һуурияа бү орхи. Түбшэн даруу зан буруу ябадал зайлуулдаг. 5Зонхилдог удамаршын гэнэ боложо хэһэн эндүүтэй шиидхэбэри харааб. 6Мунхагууд үргэмжэлэгдэн, харин баяшуул доогуур һуудаг. 7Богоолой морин дээрэ һуухадань, үндэр изагууртын ябаган һалирха ушар байдаг.

8Нүхэ малтагша нүхэндөө унажа магад, хана нүхэлэгшэ могойдо хадхуулжа магад. 9Шулуу буталагша шулуундаа сохюулжа, түлеэ хахалагша тэрээнһээ гэмтэжэ болохо. 10Һүхын мохоходо эрииень заһаагүй һаа, ехэ хүсэ хүсэлхэ болоно, мэргэн ухаан тэрээниие заһадаг. 11Могойн хоро бууруулха арга биишье һаа, үрдижэ хазабалнь, бүхы шадабари хэрэггүй болохо жэшээтэй. Ямаршье хурдан хэлэтэ туһалхагүй. 12Сэсэн мэргэнэй аманһаа гараһан үгэ абарал хайра болохо, харин тэнэгэй аман өөрыень һүнөөхэ. 13Тэрэнэй яряанай эхилэл тэнэг, түгэсхэлынь балмад. 14Тэнэг хүн олон үгэтэй. Юунэй болохые хүн мэдэхэгүй, һүүлээрнь юун болохоб гэжэ хэн тэрээндэ хэлэхэб? 15Тэнэг хүн ажалһаа ядардаг, хото руугаа бусаха замаашье тэрэ мэдэхэгүй.

16Хааниинь гүлмэр, түшэмэлнүүдынь үглөөнһөө эхилжэ найрладаг орон нютагта атаархахаар бэшэ. 17Хааниинь изагуур һайтай, түшэмэлнүүдынь һогтохоо бэшэ, хүсэ орохын түлөө хоол баридаг орон нютаг дэмбэрэлтэй. 18Залхуу хүнэй гэрэй хушалта хотойжо, дуһаа дуһахань зайлашагүй. 19Хүнүүд найр нааданда баярлажа, үзэмэй дараһан архяар амидаралаа сэнгүүлдэг, мүнгэн бүхы юумэндэ харюу болодог. 20Ухаан соогоошье хааниие бү хараа, нойрсохо үргөөдөөшье баян тухай муу үгэ бү хэлэ. Тэнгэриин шубууд үгыеш дамжуулжа болохо, далита амитан үгыншни удха ойлгуужа магад.
Copyright information for BxrBBL2024