‏ Ecclesiastes 11

Удхатай амидарал гээшэ юун бэ?

1Өөрын талхые уһанай нюруугаар хаябал, олон хоногой удаа тэрэнээ оложо болохош. 2Таряагаа долоон гү, али найман хубида хубаагаарай, дэлхэй дээрэ юунэйшье болохые мэдэхэгүйш. 3Үүлэн бөөгнэрбэл, хура орожо магад; модон урда гү, али хойто зүг тээшэ унаа һаа, унаһан тэрэ газартаа үлэдэг. 4Һалхинай зүг хараһан хүн таряа тарихагүй, үүлэ харууһалаа һаа, таряа сохижо шадахагүй. 5Һалхинай шэг болон жэрмэһэн эхэнэрэй хээлидэ яһанай бүрилдэхые мэдэхэгүйтэй адли бүгэдые бүтээгшэ Бурханай хэрэгүүдые мэдэхэгүйш. 6Үглөөгүүр тарихаяа гара, үдэшэлэн гараа һула бү таби, юундэб гэхэдэ, эртэ орой тариһанай алиниинь үрэжэлтэйб гэжэ ши мэдэнэгүйш, адли урагшатай байжашье магад. 7Һаруул гэрэл таатай, нара харахада нюдэндэ урин. 8Олон жэлдэ хүн амидархадаа ходо сэнгэлэн байг, гэбэшье оло дахин ушарха барагар үдэрнүүд тухай һанажа байг. Иигээд ерэхэдээ, бүхы юумэн ушар удхагүй болоно.

9Залуу байгаа сагтаа баярлажа сэнгэ. Залуу наһанайш үдэрнүүдтэ зүрхэ сэдьхэлшни хүхюун тэнигэр байг. Сэдьхэлэй хүсэл, өөрынгөө нюдэнэй хараса дахан бай. Гэхэдээ энэ бүгэдынгөө түлөө Бурханай урда харюусаха саг ерэхэ гэжэ бү мартаарай. 10Иимэһээ сэдьхэлэй зоболон, бэеын шаналалһаа зайлажа ябаарай. Ушарынь хадаа залуу наһан, эршэ хүсэн гээшэ ойро зуурын юм.
Copyright information for BxrBBL2024