‏ Ecclesiastes 12

Бэе газарай тооһон болохо, һүлдэ Бурхандаа бусаха

1Хүшэр үдэрнүүд ерэжэ, амидаралай жаргал үзөөгүйб гэжэ хэлэхээр жэлнүүдэй ерэхэһээ урид шадал дундаа залуу ябахадаа, Зохёон бүтээгшые һанадаг бай. 2Һара наран, гэрэлтэ одод харанхыда унтаржа, бороогой һүүлдэ үүлэн эрьен ерэдэг. 3Орон гэрээ хамгаалдаг байһан эрэлхэг шадалшни бууража, үсөөхэн шүдэншни үльтирүүлхэ шадалгүй болохо, сонхо руу шагаадаг нюдэдшни юумэ онигохоёо болихо. 4Шэхэншни газаахи абяа шэмээе илгаруулхаяа болихо. Тээрмын абяан, басаганай дуунай аялга арай шамай дуулдадаг болохо. Үргэһэ нойроо алдажа, эрэ тахяагай донгодоходо бододог болохош. 5Үгсүүр газарһаа зүрхэ алдажа, замда гарахаяа түбэгшөөдэг болохош. Үһэншни бүйлсэ модоной сэсэг мэтэ үнгэтэй болохо, бэешни даагдахаа болижо, голёо шэнги мүлхидэг болохош. Удаань мүнхэ гэртэ ошоходош гашуудалай орилоон гудамжада зэдэлхэ. 6Мүнгэн утаһан таһаржа, алтан аяга хэмхэржэ, булагай хажууда домбо хахаржа, худагай хүрдэ унаха. 7Газарай тооһонһоо гараһан зүйл тэндээ бусажа, һүлдэнь тэрэниие үгэһэн Бурхандаа бусаха болоно.

8Хүлгөөн хөөрсэг, хамаг юумэн дэмы хүлгөөн гэжэ Багша хэлэбэ.

9Багша сэсэн мэргэн байхаһаа гадна арад зондоо мэдэлгэ үгөө. Тэрэ бүгэдые туршажа шудалаад, гуримтай болгобо. 10Багша оншотой сэсэн үгэ бэдэржэ, үнэниие байһан соонь бэшэхэ гэжэ оролдоо. 11Мэргэдэй үгэ зүүндэ ба хадаһан хадааһанда адли хаха шуу ородог, тэдэниие бэшэгшэдынь нэгэл Адуулагшаһаа гаранхай.

12Тэрээнһээ үлүү хэхэһээ зайла, ехэ ном зохёоходо түгэсхэл байхагүй, үлэмжэ ехээр уншахада бэедэ эсэбэритэй гэжэ һанажа ябаарайгты. 13Эдэ бүгэдын удха гэбэл: Бурханһаа түбэгшөөдэг бай, Тэрэнэй захяа заабари сахидаг бай, хүндэ хабаатай бүхы юумэн тэрээн соо байха. 14Бурхан нюусашье һаань, бүхы юумэ, һайтайнь муутайнь шүүжэ харадаг.
Copyright information for BxrBBL2024