‏ Ecclesiastes 3

Хүнэй бүхы хэрэгүүдһээ ашаг үрэ байхагүй

1Тэнгэри дорохи хамаг юумэн саг болзортой ба хамаг юумэн болохол сагтаа боложо байдаг: 2Үхэхэ түрэхэ саг, тариха ургуулха саг ба тариһаниие гэмтээн ходо татаха саг; 3ами хороон алаха саг ба анагааха саг; эбдэхэ һандаргааха саг ба бодхоон бариха саг; 4уйлаха муудаха саг ба энеэхэ эльгэлхэ саг; гомдохо гуниглаха саг ба хатар наада дэлгээхэ саг; 5шулуу хаяха тарааха саг ба шулуу суглуулха обоолхо саг; тэбэрихэ саг ба тэбэрилгэһээ табиха саг; 6бэдэрхэ олохо саг ба гээхэ хаяха саг; хадагалха гамнаха саг ба хаяха алдаха саг; 7хубсаһаа удар татаха саг ба хубсаһаа хадхаха оёхо саг; анираа хатаха саг ба амалан яриха саг; 8дурлаха хайрлаха саг ба үзэн ядаха саг; дайн дажарай саг ба найрамдалай саг.

9Хэһэн ажалһаань хүндэ ямар туһа байнаб? 10Бурханай зондо үгэһэн хэшээл хүдэлмэриин зоболонтойе би хараа һэм. 11Бурханай хэһэн бүхы юумэн тэрэ сагтаа һайхан байдаг, Бурханай үйлдэһэниие эхинһээнь эсэс хүрэтэр хүнүүдэй ойлгохогүйшье һаань, Тэрэ хүнүүдэй зүрхэндэ эгүүридэ мүнхые байгуулаа. 12Хүнэй хубида һайниие үйлэдэхэ ба баярлан бахаа ханахаһаа үлүү юумэн үгы гэжэ мэдээб. 13Хүн уугаад эдеэд, ажал хүдэлмэридөө сэдьхэлээ баярлуулаад байгаа һаа, энэнь Бурханай үгэһэн юумэн гээшэ.

14Бурханай хэһэн бүхы хэрэг мүнхэ гэжэ би мэдээб. Тэрээндэ нэмэхэ, тэрээниие хаһаха юуншье байхагүй. Бурханай хэһэн ушарынь Бурханһаа бэшэрэн һүгэдэхын тулада хэгдээ. 15Юун байнаб, тэрэнь урданьшье байгаа, ерээдүйдэ болохошье юумэн баһал хэзээ нэгэтэ байһан лэ юумэн гээшэ. Тиигэжэ Бурхан эрмэлзэһэн юумые нэхэн һануулдаг байна.

16Хуули шүүн шиидхэдэг газарта хуули буса ябадал, үнэн шударгын орондо ёрото муухай ушардаг гэжэ би нарата юртэмсэдэ мүн харааб. 17«Шударга сэхэ хүниие ба гэмтэй нүгэлтэниие Бурхан лэ шүүжэ харана» гэжэ би өөртөө хэлээб, ушарынь хадаа бүхы юумэндэ саг үйлэ гэжэ байха. 18Хүн хадаа адагуусан гэжэ харуулхаяа Бурхан хүнүүдые туршана гэжэ би өөртөө хэлээб. 19Хүнэй табилан адагуусанай хубитай адли, адагуусанай үхэдэгтэ адли хүншье үхэнэ, али алинайнь амисхал адли, хүнэй адагуусанһаа дээрэ юумэниинь огто үгы. Ушар иимэһээ энэ хуу дэмы хооһон. 20Булта нэгэ газар руу харгытай: шоройһоо гараһан юумэн шоройдоо бусана. 21Хүнэй амисхал дээшээ дэгдэжэ, адагуусанай амисхал доошоо уруудан шэнгэнэ гэжэ хэн хэлэхэб даа. 22Тиимэһээ хэжэ байһан юумээрээ баярлахаһаа үлүү юумэн хүнэй хубида үгы гэжэ ойлгооб. Энэ хадаа табилангынь, хойшодоо юун болохыень харуулхаар хэн тэрээниие дахуулхаб даа.
Copyright information for BxrBBL2024