‏ Ecclesiastes 4

Нарата юртэмсын дэмы хүлгөөн

1Нарата юртэмсэдэ бүхы дарлалтын үйлэ дахин дахин харабаб. Дарлуулагшадай нулимса хаража байхада, тэдэнэй һанаа заһаха хэншье олдохогүй. Дарлагшын талада хүсэн, харин дарлуулагшадые хайрлаха хэншье байхагүй. 2Тиимэһээ мүнөө хүрэтэр амиды байгшадһаа ами наһаа алдагшадай хуби үлүү дээрэ ха гэжэ ойлгобоб. 3Нарата юртэмсэдэ үзэгдэдэг бүхы бузар үйлэ хэзээшье хараагүй, амидарал үзөөгүйдэ бүришье һайн.

4Элдэб ажал ба амжалтануудынь хүнүүдэй дунда атаархал түрүүлдэг. Энэ дэмы хэрэг, һалхи намнагшатай адли. 5Тэнэг хүн гараа хабсараад һуужа, мяхаяа барадаг. 6Бэеэ зобоожо хоёр альгаяа тодогшоһоо нэгэ гарынь һула амаржа һуугшань дээрэ ха.

7Удаань би нарата юртэмсэдэ үшөө нэгэ дэмы хүлгөө үзэбэб. 8Хүн гансаардана, хажуудань хүн үгы, тэрэ хүбүүгүй, аха дүү гэжэ байхагүй. Ажалынь барагдахагүй, нюдэниинь өөрынгөө баялиг зөөридэ ханахагүй байна. «Хэнэй түлөө хүдэлнэ, һанаа сэдьхэлээ зобооно гээшэбиб?» гэһэн асуудал гарана. Энэнь мүн лэ дэмы хүлгөөн, зоболонтой ашаа болоно.

9Ганса байгшаһаа хоюулан байхань дээрэ, тиигэбэл ажал үйлэнь ашагтай, харюутай байха. 10Нэгэнэйгээ унабал, нүгөөдэнь нүхэрөө бодхоохо ушартай. Харин гансаараа байгаад унаа һаань, тэрээниие хэн бодхоохо болоноб? 11Хоюулаа суг хэбтэхэдэнь дулаан, харин гансаараа хайшан гэжэ дулаасаха болоноб? 12Ганса хүн диилдэхэ, хоюулан байгаа һаа, тэсэжэ шадахал. Гүрэмэл аргамжа бэлээр таһардаггүй.

13Заабари хүлеэн шагнадаггүй тэнэг үбгэн хаанһаа үгытэйшье һаа, ухаатай залуунь дээрэ. 14Тэнэг хаанай албатан соо үгытэй тэрэ түрөөшье һаа, шоронһоо мултаран гарахадаа хаан бологшо юм. 15Наран доро ябаһан хүн бүхэнэй хажууда уг залгамжалха залуунь ябалсана гэжэ харабаб. 16Зон гээшэ тоолошогүй олон, тэдэнэй урда амидарһан зониие тооложо болошогүй. Хожом ерэгшэдынь эртын үеынхидээ магтадаггүй. Энэ мүн лэ дэмы хооһон, һалхи намнагшатай адли. 17Бурханай гэр тээшэ болгоомжотой алхала. Мунхаглан тахил үргэгшэһөө Һүмэ соо ошоод шагнагшань дээрэ. Хүн гээшэ буруу үйлэеэ ойлгодоггүй.
Copyright information for BxrBBL2024