‏ Ecclesiastes 8

Сэсэшүүлэй заабари

1Юумэнэй удха тайлажа мэдэдэг мэргэн ухаатантай хэниие жэшэхэб? Мэргэн ухааниинь хүнэй нюур гэрэлтүүлжэ, барагар дүрыень зөөлэрүүлнэ. 2Бурханай урда үгэһэн тангаригай бии һэн тула хаанай зарлиг сахигты. 3Хааниие орхихо гэжэ бү яара, муу хэрэгтэ үсэрхэжэ бү бай. Юуб гэхэдэ, тэрэ хүсэһэнөө бүтээжэ шадаха. 4Хаанай зарлигай саана засаг гэжэ байдаг. Тэрээндэ «юу хэнэш» гэжэ хэншье хэлэхэгүй. 5Хаанай зарлиг сахигша зоболонгүй һуудаг. Мэргэнэй зүрхэн зохистой саг ба ёһо гурим мэдэдэг. 6– 7Хамаг юумэн сагтай ба ёһо гуримтай байдаг, хүн тэрээндэ нэрбэгдэжэ болохо. Юунэй тохёолдохые хүн мэдэхэгүй – хэн тэрээндэ хэлэжэ шадахаб? 8Хүн һалхи тогтоожо шадахагүй, һүнэһэнэй халиха үдэр тогтоохо арга тэрээндэ байхагүй. Үхэхэ үдэрөө хүн зонхилхо шадалгүй. Энэ тэмсэлдэ абарал гэжэ байхагүй, нүгэлтые нүгэлынь халхалхагүй. 9Дэлхэйдэ болоһон хамаг юумэ үзэхэдөө, эдэ бүгэдые би харааб. Хүн дээрэ засаг абахадаа, хүн тэрээндэ хоро хүргэхэ гэжэ байдаг.

10Нүгэлтэниие хүдөөлүүлхыень хараа бэлэйб, һүүлээрнь нангин газарһаа холодоходоо, хорото үйлэ хэһэн нүгэлтэниие хотын зон мартадаг. Энэ ехэ удхагүй байна. 11Бузар үйлэдэ эсэргүү шиидхэлынь тэрэ дары ерэдэггүй ушарһаа хүнэй сэдьхэл мууе үйлэдэхөөр бэлэн байдаг. 12Нүгэлтэ зуу дахин нүгэл үйлэдөөшье һаа, ута наһа наһалдаг ушар байдаг, гэбэшье Бурханһаа түбэгшөөн, Тэрээндэ һүгэдэгшэнь юунһээшье үлүү гэжэ мэдэнэм. 13Нүгэлтэ хүн өөдэлхэ гэжэ байгаагүй, Бурханиие тоодоггүй тэрэнэй үдэрнүүд һүүдэр мэтэ ходоржо, наранай ороходо һүнэдэг. 14Нүгэлтэтэй таараха юумэн үнэн шударга хүндэ тохёолдохо, үнэн шударга хүндэ зохихо юумые нүгэлтэн эзэмшэдэг удхагүй юумэн бии.

15Тиимэһээ баяр сэнгэлые үнэлэн илгабаб. Эдихэ ууха болон баярлан сэнгэхэһээ һайхан юумэн хүндэ үгы. Наран доро Бурханһаа хүндэ үгтэһэн амидаралай үдэрнүүдтэ хүдэлһэнэйнь үрэ тиимэ. 16Мэргэн ухаае таниха гэжэ үдэршье һүнишье үргэһэ нойргүй байдаг хүнэй хэрэгүүдые харахын тулада зүрхэ сэдьхэлээ зорюулбаб. 17Бурханай бүхы хэрэгүүдые хараад, хүн гээшэ наран доро үйлэдэгдэдэг хамаг юумэ ойлгохогүй гэжэ мэдэбэб. Хэдышье оролдоо һаа, нээлтэ хэжэ шадахагүй. Мэдэнэб гэжэ мэргэн хүн хэлээшье һаа, оньһо ухааень олохогүй, хэншье тэрээниие шадахагүй.
Copyright information for BxrBBL2024