Ecc 1 | BxrBBL2024 | STEP | Энэ хадаа Багшын, Иерусалимай хаан Давидай удам болохо хүнэй хэлэһэн үгэнүүд гэхэ.

‏ Ecclesiastes 1

Оршол

1 Энэ хадаа Багшын, Иерусалимай хаан Давидай удам болохо хүнэй хэлэһэн үгэнүүд гэхэ.

2 – Хүлгөөн хөөрсэг, хамаг юумэн дэмы хүлгөөд, хөөрсэгэнөөд дүүрэхэ, – гэжэ Багша хэлэбэ.

3 Нарата үдэрэй дүүрэтэр ажалаа хэжэл байдаг хүнэй хүдэлмэриин ашаг үрэ гэжэ юун байхаб?

4 Үеһөө үедэ һуудаг нэгэшүүлынь ябажа, нүгөө үеынхин ерэжэл байдаг, харин дэлхэй юртэмсэ эгүүридэ оршон байдаг.

5 Наран мандажа дээшэлһээр, мандаһан газар руугаа яаран буудаг.

6 Һалхин урда зүг тээшэ үлеэжэ, хойшоо хотирон ошодог, өөрын тойрогоор дахин дахин эрьедэг.

7 Бүхы гол мүрэнүүд далайда шудхан ородог, гэбэшье далай хэзээдэшье эрьеһээ халима дүүрэдэггүй; уһаниинь үүлэн боложо дэгдээд, эхилһэн газар тээшээ бусажа, голнууд урасхалаа дахинаа эхилдэг.

8 Хамаг юумэн ажал хэшээлһээ эхитэй, ажал гээшэ ажалтай, эдэ бүгэдые хөөрөөд яалтайб, нюдэн хараһаараа хужарлахагүй, шэхэн дуулаһаараа ханахагүй.

9 Юун байгаал һэм, тэрэл байха болоно, юун хэгдэжэ байгаа һэм, тэрэл хэгдэжэ байха, наран доро шэнэ юумэн гэжэ үгы.

10 Ямар нэгэ юумые «Харыш, энэ шэнэ зүйл» гэжэ болодог, харин тэрэншье манһаа холо урда байһан юм.

11 Урданай юумэн тухай дурсагдахагүй, дам саашадаа хожомынь болохо юумэн тухай хойто үеынхидэйнь һанаанда юуншье үлэхэгүйл.

Засаг түрэ толгойлогшын дүршэл

12 Би, Багша, Иерусалим хотодо Израилиин хаан түрые эзэлжэ һуугаа һэм. 13 Тэнгэри доро үйлэдэгдэдэг бүхы юумые мэргэн ухаагаар туршан шэнжэлхэ гэжэ эрмэлзээб. Энэ хадаа Бурханай хүнүүдтэ сэдьхэл амар бэшэ байхынь тулада үгэһэн орёо бэрхэ үүргэ байгаа. 14 Би нарата дэлхэйдэ үйлэдэгдэдэг бүхы юумэ үзөөб, энэ хадаа дэмы хүлгөөн хөөрсэг, сэдьхэлэй зоболон. 15 Гажаһаниие сэхэлжэ болохогүй, үгы юумые тоолохо аргагүй.

16 «Иерусалимда намһаа урид хаан түрэ эзэлэгшэдһээ үлүү боложо, ёһото мэргэн ухаан юун гээшэб гэжэ мэдэжэ абааб» гэжэ би зосоогоо сэдьхээ һэмби. 17 Мэргэн ухаа мэдэжэ абахын хажуугаар галзуу тэнэгые таниха гэжэ бүхы бодолоо зорюулааб. Энэ баһал сэдьхэлэй ехэ зоболон гэжэ ойлгооб. 18 Юундэб гэхэдэ, мэргэн ухаанһаа зоболон ехэдэнэ, мэдэлгэ нэмэхэдээ, шаналал нэмэгдэхэ байна.