‏ Ecclesiastes 7

Сэсэн мэргэн заабаринууд

1Үнэтэ һайн тоһонһоо һайн нэрэнь дээрэ, түрэхэ үдэрһөө үхэхэ үдэрынь дээрэ. 2Найр сэнгэлэй гэр руу ошогшоһоо гашуудалай гэр руу орогшонь дээрэ, ушарынь хадаа хүнэй үхэл иимэ гэжэ амиды байгша мэдэхэ ёһотой. 3Энеэхэһээ уйлахань дээрэ. Шарайнь гунигтай байбашье, сэдьхэлдээ баяртай байжа болохо. 4Ухаатайн зүрхэн гашуудагшын гэртэ, тэнэгэй зүрхэн сэнгэлэй гэртэ байдаг. 5Тэнэгэй дуулахые шагнагшаһаа ухаатайн зэмэлхые шагнагшань дээрэ. 6Тэнэгэй энеэхэнь тогоон дорохи гэшүүһэнэй нижаганаһантай адли тоолхогүй. Энэ дэмы хүлгөөн. 7Хүниие хашахадаа, мэргэд ухаагаа алдадаг, абалга эдилгэ сэдьхэл гутаадаг. 8Эсэс хэзээшье эхинһээ шухала, тэсэбэритэйнь бардамһаа дээрэ. 9Уурлахые урдаа бү таби, уур сухал тэнэгэй сээжэдэ. 10«Яагаад урдын үдэрнүүд мүнөөнэйхиһээ юугээрээ дээрэ юм бэ» гэжэ бү хэлэ. Иигэжэ асуухань сэсэн ухаанһаа бэшэ. 11Мэргэн ухаан угай зөөриһөө өөрэгүй баялиг, амиды ябагшада илангаяа аша туһатай. 12Тэрэ мүнгэн шэнгил хамгаалалта болохо аргатай, харин мэдэлгын булюу юумэниинь гээ һаа, мэргэн ухаан эзэмшэгшэдээ ами наһа түхөөдэг.

13Бурханай ажалые харагты: Тэрэнэй һарюу болгоһониие хэн сэхэлжэ шадахаб? 14Ажана тэгшэ үдэртэ аза жаргалаар ханадаг бай, урагшагүй үдэртэ сэдьхэн бодомжоло: али бүхые Бурхан бии болгодог һэн тула Тэрэнэй хэрэг хүн буруушааха бэшэ. 15Би удхагүй амидаралайнгаа үдэрнүүдтэ элдэб юумэ харааб: үнэн хүнэй үнэн шударга соогоо үхэжэ байхада, муу хүн муу соогоо удаан наһа наһалжа байдаг. 16Үлүү үнэн шударга бү боло, хэтэрмэ мэргэн ухаантай бү бай, өөрыгөө һүнөөхэгүйн тулада. 17Нүгэл бү үйлэдэ, галзуу тэнэг бү боло, сагһаа урид үхэхэ ёһотой юм гүш? 18Нэгэ хуули сахяад, нүгөөдыень орхингүй байхада һайн гэбэшье, Бурханһаа түбэгшөөдэг хүн хоёр хэтэрүүһээ зайлаха.

19Ухаатай мэргэн хотын арбан толгойлогшонорһоо хүсэтэй байдаг. 20Үнэниие гансал үйлэдөөд, юрэ нүгэл хэдэггүй хүн гэжэ дэлхэй дээрэ үгы. 21Яряанай бүхы үгэ бэедээ дүтэ бү аба, богоолойнгоо шамайе хараажа байхыень шагнажа болохош. 22Тэрээндэ адли олон удаа өөрөөшье бусадые хараажа байһанаа һанаха ёһотойш. 23Эдэ бүгэдые мэргэн ухаагаар шалгаад, «Би ухаатай болооб» гэжэ өөртөө хэлээшье һаам, мэргэн ухаан намһаа ямар холоб даа. 24Үнгэрһэн юумэн аласай холодо, гүн ехэ гүн соо байна, хэн тэрээниие нээжэ шадахаб? 25Би мэргэн ухааниие шэнжэлэн таниха, нүгэлтэ зоной тэнэглэл галзуугай ушарые олохо гэжэ сэдьхэлээ зорюулбаб.

26Үхэлһөө үлүү гашуун зүйл эхэнэр гэжэ олобоб: эмэ хүнэй зүрхэн занга, гарынь гэнжэ, Бурханда хэрэгтэй амитан тэрээнһээ зайлаха, харин нүгэлтэн тэрээндэ баригдаха. 27– 28Гүн ухаата багша хэлэбэ:

– Харагты, харюу тайлбари олохо гэжэ би энээниие суглуулааб. Харюу бэдэрһэн зандааб. Олоһон юумэн гэхэдэ, мянгаад зоной дунда нэгэ һайн эрэгтэйе олооб, нэгэшье эмэгтэйе олоогүйб. 29Минии оложо мэдэһэн зүйл хадаа Бурхан хүниие үнэн шударгыгаар бүтээгээ, теэд тэдэнь муу тээшэ олон зам нээгээ.
Copyright information for BxrBBL2024