Eph 1 | BxrBBL2024 | STEP | Иисүүс Христоостой нэгэдэһэн Эфес хотын һүзэгтэй Бурханай хүнүүд, Бурханай эрхэ мэдэлээр Иисүүс Христоосой элшэн болоһон Павел таанадые амаршална.

‏ Ephesians 1

1 Иисүүс Христоостой нэгэдэһэн Эфес хотын һүзэгтэй Бурханай хүнүүд, Бурханай эрхэ мэдэлээр Иисүүс Христоосой элшэн болоһон Павел таанадые амаршална. 2 Бурхан Эсэгэһээ болон манай Эзэн Иисүүс Христоосһоо үршөөл хайра ба амгалан тайбаниие таанадта хүсэнэб.

Бурханда баяр баясхалантай байлга

3 Манай Эзэн Иисүүс Христоосой Эсэгэ болохо Бурханда магтаал соло дуудаял! Маанадай Христоостой нэгэдэһэн ушарһаа дээдын тэнгэриһээ оюун ухаанда хабаатай буян хэшэг Тэрэ маанадта хайрлаа. 4 Бурханай урда арюун ба зэмдэггүй байхымнай тула Тэрэ бидэниие Христоостой нэгэдхэн Өөрын болгожо, газар дэлхэйн бүтээгдэхэһээ урда шэлэжэ абаа. Бурхан бидэндэ дуратай байжа, 5 Өөрынгөө һайн дураар, эрхэ хүсэлөөр Иисүүс Христоосоор дамжан бидэниие Өөрын үхибүүд болгохо гэжэ заяагаа. 6 Инаг хайрата Хүбүүнэйнгээ ашаар маанадые буян хэшэгтээ элбэг дэлбэг хүртөөһэнэйнь түлөө Бурханиие алдаршуулаял. 7 – 8 Тэрэ агууехэ буян хэшэгтээ маанадые элбэг дэлбэгээр хүртөөгөө. Тэрэнэйнь ашаар бидэ Хүбүүнтэйнь нэгэдээд, шуһанайнь сэнгээр сүлөөтэй боложо, нүгэлнүүдээ хүлисүүлээбди. Тэрэ сэсэн ухаагаараа, оюун мэдэлээрээ 9 зориһон юумээ бүтээгээ, Христоосоор дамжан бүтээхэ гэжэ анханһаа шиидэһэн Өөрынгөө эрхэ мэдэлэй нюусые бидэндэ нээгээ. 10 Һанаашалһан юумэеэ Бурхан хэрэгтэй сагта бэелүүлхэ, тиин Христоос огторгойн ба дэлхэйн бүхы юумые эблүүлэн нэгэдүүлхэ.

11 Бурхан Өөрынгөө зорилгоор, заяаһан ёһоороо маанадые Христоостой нэгэдхүүлэн Өөрын арад болгон шэлэжэ абаа. 12 Христоосто найдаһан түрүүшын хүнүүдэй дунда байһан хадаа Тэрэнээр алдаршуулжа байял!

13 Таанадшье баһа өөрынгөө абаралга тухай үнэн зүб Бурханай үгэ дуулаад, Христоосто этигээт, тиин Бурхан Арюун Һүлдэеэ таанадта үгэн, Өөрынгөө тамга таанад дээрэ дараба. 14 Бурханай Өөрынгөө хүнүүдтэ найдуулһан бүхэниие маанадай абаха тухай тэрэ Һүлдэнь батална, тиин Бурханай Өөрынгөө хүнүүдые бодото сүлөөтэй болгохо тухай баһа батална. Бидэ Тэрэнэй алдар солые дуудаха бахархалынь байял!

Павелай зальбаралга

15 Тиимэһээ таанадай Эзэн Иисүүстэ һүзэглэжэ, Бурханай хүнүүдые бүгэдыень энхэржэ хайрлажа ябадаг тухай дуулахадаа, 16 би зальбархадаа, таанадые һанан, таанадай түлөө үргэлжэ Бурханда баяр баясхалан хүргэжэ байдагби. 17 Манай Эзэн Иисүүс Христоосой Бурхан, алдарай Эсэгэ Өөрыень таанадай мэдэрхынтнай тулада сэсэн ухаан үршөөдэг Һүлдые таанадта хайрлаг лэ. 18 – 19 Бурханай таанадые дуудахада таанадта үгтэһэн найдабариин ямар байдагые, Өөһэдынгөө хүнүүдтэ Тэрэнэй үгэхэб гэһэн найдуулгын элбэг дэлбэг байдагые, Тэрээндэ этигэһэн бидэн соо хүдэлжэ байһан хүсэ шадалынь аргагүй ехэ байдагые мэдэжэ байхынтнай тулада оюун ухаанайтнай нюдые Тэрэ нээжэ үгэг лэ. 20 Тэрэл хүсэ шадалаараа Бурхан Христоосой үхэхэдэнь амидыруулаад, дээдын огторгойдо баруун таладаа 21 захирагшад, ноёд, эзэд, элдэб хүсэнүүдэй дээгүүр һуулгаба. Бурхан Тэрэниие мүнөөнэйшье сагта, ерээдүйдэшье бүхы нэрэ түрэнүүдэй дээгүүр үргэн табиба. 22 Бүхы юумые хүлдэнь хаяжа мэдэлдэнь оруулаад, бүхы юумэнэй Эзэн байһан хадань һүзэглэгшэдэй бүлгэмэй хүтэлэгшөөр томилоо. 23 Һүзэглэгшэдэй бүлгэм Христоосой бэень гээшэ, бүтээгдэһэн бүхы юумые Өөрөөрөө дүүргэдэг Тэрэниие һүзэглэгшэдэй бүлгэм бүрин түгэс болгоно.