Eph 2 | BxrBBL2024 | STEP | Урдань таанад өөһэдынгөө муу муухай хэрэгүүдһээ болон нүгэл шэбэлһээ боложо үхэһэн амитад байгаат.

‏ Ephesians 2

Үхэлһөө амидыруулга тээшэ

1 Урдань таанад өөһэдынгөө муу муухай хэрэгүүдһээ болон нүгэл шэбэлһээ боложо үхэһэн амитад байгаат. 2 Тиихэдэ таанад газар дэлхэйн нүгэл шэбэлтэ замаар ябажа, Бурханай мэдэлдэ байдаггүй хүнүүдые мүнөөшье захиржа байдаг һүлдын, хара хүсэнүүдэй ноёной мэдэлдэ байгаат. 3 Бидэ булта тэдэ зондол адли мүн шанарайнгаа жама ёһоор амидаран, өөһэдын бэеын ба һанал бодолой хүсэлэнгүүдые ханган, хүн бүхэндэл адли Бурханай уур сухал хүргэжэ байгаабди.

4 Харин үршөөл хайраар элбэг Бурхан бидэндэ аргагүй ехээр дуратай байжа, 5 нүгэл шэбэлһээ боложо үхэһэн бидэниие Христоостой хамта амидыруулаа. Таанад Бурханай үршөөл хайраар абарагдабат. 6 Бурхан бидэниие Иисүүстэй хамта амидыруулаад, Тэрэнэй хажууда дээдын огторгойдо һуулгаа. 7 Иигэжэ Бурхан Иисүүсээр дамжуулан маанадта тон ехээр дуратай байһанаа, аргагүй ехэ үршөөл хайраа ерээдүй сагуудта харуулаа. 8 Этигэл һүзэгэйтнай ашаар таанадые Бурханай үршөөл хайра абараа. Тиин тэрэ этигэл һүзэгтнай өөһэдһөөтнай бэшэ, харин Бурханай үршөөһэн бэлэг гээшэ. 9 Тэрэ болбол танай оролдолгын үрэ дүн бэшэ, тиимэһээ хэншье өөрыгөө магтахые бү һануужа. 10 Ямар байнабди, тиимээр Бурхан бидэниие бүтээгөө, бидэниие Иисүүс Христоостой нэгэдүүлэн һайн һайхан хэрэгүүдые хэдэг заншалтай байхыемнай анханһаа түлэблэн бүтээгөө.

Христоостой нэгэдэлгэ

11 Таанад түрэхын еврей-бэшэнүүд байгаат, өөһэдыгөө отолуулһан (бэеын эрхэтэниие гараараа отолхо гэһэн удхатай) гэжэ нэрлэдэг еврейнүүд таанадые «отолуулаагүй» гэжэ нэрлэдэг байгаа, урдань хэд байһанаа бү мартагты, 12 тиихэдэ таанад Христоосгүй амидараат. Таанад Бурханай шэлэһэн Израилиин арадай тоодо ородоггүй һэнта. Бурханай Өөрынгөө хүнүүдтэ үгэһэн найдуулгада, Тэрэнэй Хэлсээндэ таанад ямаршье хабаагүй һэнта. Таанад энэ газар дэлхэй дээрэ найдалгагүй, Бурхангүй амидаржа байгаа һэнта. 13 Харин мүнөө Иисүүс Христоостой нэгэдээд, урдань Бурханһаа холо байһан хүнүүд Христоосой шуһаар Тэрээндэ ойртобот. 14 Христоос Өөрөө еврейнүүдые болон бусад арадуудые нэгэ арад болгон, бидэндэ энхэ тайбаниие асараа. Тэрэ маанадые хубаажа, эбыемнай таһалжа байһан ханые Өөрөөрөө эбдээ. 15 Тэрэ хоёр арадһаа Өөртэйгөө хамта нэгэ шэнэ арад нэгэдүүлэн бүтээжэ, энхэ тайбаниие мандуулхын тула Моисейн Хуули тогтоолнуудтайнь болон дүримүүдтэйнь хүсэнгүй болгоо. 16 Христоос хэрээһэн дээрэ үхэхэдөө, тэдэнэй үһөө хиһаае усадхаад, нэгэ бэе соо хоёр арадые эблүүлээд, тэдэниие һөөргэнь Бурханда асараа. 17 Христоос ерэжэ бүхы хүнүүдтэ, Бурханһаа холо байһан бусад арадуудташье, Бурханай ойро байһан еврейнүүдтэшье энхэ тайбан тухай Һайн Мэдээсэл номноо. 18 Еврейнүүдшье, ондоо яһатаншье, бидэ булта Христоосой ашаар нэгэ Һүлдөөр Эсэгэдэ ойртохо аргатайбди.

19 Тиимэһээ таанад, еврей бэшэ зон, хариин гү, али ерүүл зон бэшэт, харин Бурханай хүнүүдтэй нэгэ хотын зон гээшэт, Бурханай бүлын гэшүүд гээшэт. 20 Таанад элшэнэрэй ба лүндэншэдэй табиһан һуури дээрэ бодхоогдоот. Тэрэ һууриин түшэг тулгуурынь Иисүүс Христоос Өөрөө гээшэ. 21 Тэрэ Өөрөөрөө байшангые холбожо бүхэлөөд, Эзэндэ зорюулагдаһан Һүмэ болгон дээшэнь бодхоно. 22 Христоостой нэгэдэн, таанадшье баһа Һүлдын ашаар Бурханай байдаг байра болохын тулада бодхоогдожо байнат.